JOURNALIST ṬAWMKAI LO

~ Lena Jongte

Zaithiam Hmelchhe ber thlan:

Varṭian Weekly kha copy 7000 chuangte kan chhu ṭhin a. A kawm full colour mawi tak a nih bawk avang khan hralh a kal hle. Khatih lai khan Lelte Weekly deuh chiah hi kartin chanchinbuah chuan kan tluk loh a ni.

Thawk khat lai kha kan chanchinbu kha a hniam deuhin ka hria a. Keima hriat leh thiam danin boruak siam kha ka tum ta a.

Public Opinion Poll (mipui ngaihdan lakna) ṭul lo zet kha ka ngaihtuah chhuak ta alawm. Khatih laia kan Editor Pu Jonah L Pachuau khan thuneihna min pe sang angreng a. Ka thuziak reng reng leh ṭhaa ka hriat ka kalpui kha min hnial ngai lem lo.

Tichuan, kan chanchinbuah chuan cheh thlak a, a chhanna mipuiin an rawn thawnlet theih turin opinion poll chu ka siam ta a.

Chuta kan zawhna chu - tunge Zaithiam hmelṭha ber, hmelchhe ber; zei ber, zei lo ber; pa ber, pa lo ber, tih vel kha a nia! Zaithiam mipa leh hmeichhiaah a hrana chhan theih turin ka siam hrang a. A hunlai khan ka phurpui hle.

Tichuan, kan opinion poll chhanna chu, kan office, Ramhlun Indoor hnungah chuan a rawn thleng ta zut zut a. Ka chiang ta chiah lo a, chhanna kha 1000 dawn lai kan dawngin ka hria!

Kan chanchinbuah vek chuan result chu kan puang ta a. Lawm lo an tam teh e! Boruak kha a awm ta hat reng a! A hunlaia chanchinbu lam chhiar ṭhin chuan an la hre hlawm awm e.

Ṭum khat chu kan chanchinbu leh Press enkawltu ber ka pu, Rev LB Pachuau (muangin a chawl tawh) khan, "Lenmawi, i thiltih hi a ṭha nge maw ṭha lo le, phone call kan dawng tam khawp mai," a tia. Kei chuan, "A hlawhtling tihna a nih chu," ka ti liam puat a.

Ka pu kha mi rilru tihnat hlau em em, thinlung ṭha tak a ni si a, a lu ka tihai hle ta awm e!

A chhe lama ber kai - hmelchhe ber, pa lo ber, zei lo ber etc. tih vel ho kha an lo lawm reng reng lo mai a. A lawmawm lo tak bawk a. Tichuan, kha khawvelah khan zaithiamte nen kan ri ve nak nak a.

Chhunah news zawngin ka chhuakvak a, Varṭian office-ah khan tlaiah ka kal chauh ṭhin a. Mobile phone chhuah hma a ni a, ka awm loh lai khan phone call an lo dawng fo ṭhin a.

Ṭum khat chu ka tlai lam office kal, ni deuh chhur tawh chuan phone call ka dawng ve a. Thinrim deuha mi rawn phone-tu zaithiam pakhat chhungte (a thiante pawh a ni mai thei e) nen chuan kan inchhang ta a.

"Hmelchhe bera inthlan chu a na ve alawm!"

"Kan thlan a ni hleinem. Mipui hnenah zawhna kan siam a, an ngaihdan kan la a, i duh chuan rawn en rawh, hei an rawn chhanna pawh kan la dah ṭha vek"

"In thiltih dan reng reng hi..." a sawi zawm duah a. Keia tlai lam boruak deuh tawh chuan, "A! a hmelchhe em bawk a ni," ka ti ta! Min be zui lo chiang hle!

Hetih lai vel hian The Aizawl Post ṭhalai huang vanglai a ni a, Ṭhalai huang ziaktu Sangzuala Hmar khan he boruak hi a rawn vaw hot thiam khawp a.

Zaithiam pa lo bera thlan Pu Ngurthangvela an kawmna kha a tichhuak a. "Pa lo min tih chuan an farnute rawn hruai sela an hre mai," kha a tia!

Hetih lai hi kan Enpuii nen Upper Republic, LZ Coloney-a kan awm lai a nia.

Tuk khat kan zing chaw eikham chu ka nau Enpuii hnenah chuan, "Insiam rawh le," ka ti thut mai a. "U, e'nge ni ta?" a ti he haw a. Kei chuan, "Á! Pu Ngurthangvela'n 'ka pa leh pa loh an hriat duh chuan an farnute rawn hruai sela' a tia. Pu Ngurthangvela te In Bethlehem lamah kan kal a ngai," ka tia. Ka fiamthu tih a man ta a, a nui ṭhaw a!

Tunhnu daih a ka hriat chhuah leh chu - Varṭian chanchinbu aṭang khan MZP inthlan ka chuh ve duh avangin ka chawl ta a. Ka tling ta chuang si lo, ka vak rawlai satliah kha Zozam Times, nitin chanchinbu khan Sir Maliana zarah News Editor turin min rawn sawm a. Kha chanchinbua ṭhalaite huang ziaktu chu ka nau Robert Zoliana a ni a. A ni khan zaithiam hrang hrang a kawm lo thei si lo a. Kei, a chhe lam lo thlang vak tawh, zaithiam ṭhenkhat ei loh tak min thawhpui kha a tim deuh tih a sawi.

Eng pawh nise, he thil ka ti hi tunhnu hian ka inchhir tak meuh a. Siam ṭhat duh neih vanga mi rilru tihnat leh pawisawi chu thudang, chutiang pawh ni chuang lo a, awmze awm hlei loa mite rilru ka ti-na kha ka inchhir hle a ni.