ZONUNMAWII



BUNG--1 NA
By:- Rs Thangluah

Ka muhil lai chu ka harh zawk a,ka taksa chu eng emaw hian a rawn tawk a ni. Ka harh chiang chu ka van hlau teh kher ve le,ka pa(ka pa hrawn)chuan min lo khawih mek chu niin. Âu chhuah tuma ka kâ ka ân lai tak chuan ka hmui chu a rawn hmet hmui nghal a,"I âu vaih chuan i nu bulah dawtin ka hêk che a nga,ka vuak tir ang che,"tiin min vo bet a. Kei hmeichhe naupang kum 6 mi lek tan chuan kha vau na ṭawngkam kha a hlauhawmin a rapawm takzet a ni. Ka pa chuan a duhtawkin min khawih a,a duhtawk a ngah hnuah chuan min vau zui leh a,"I hria em? I nu bulah i sawi vaih chuan,i nu ka vuak tir ang che. I sawi dawn em?,"a ti leh khur khur a. Ka hlauh êm avang chuan ṭawng pawh ka ṭawng thei lo a ni,ngawi rengin khur der der chungin ka lu ka thing nawk nawk ringawt a. Ka pa chuan nui chungin,"I fel lutuk e,naupang fel tak i ni,"tih pah chuan room aṭang chuan min chhuahsan nghal a.





Kum 20 liamta a ka chunga thil thleng chuan min la rawn umzui reng a,ka mumang thleng thlengin min kiansan a tum si lo. Theihnghilh tum viau ṭhin mah ila,ka theihnghilh thei si lo. Nitin natna min pe a,kha thil avang khan ka nunna hial pawh lâk ka tum a;mahse,Pathianin rem a ti lo a ni ngei ang. Tun thleng hian dam takin ka la awm a,ka thinlunga ser leh hliam erawh chuan damni hmel an hmu ngai lo a ni.

Min hringtu pa hi a thi nge a dam tih pawh ka hre lova. Ka nu hian ka pa chanchin min hrilh ngai hek lo,ka pa chu khawiahnge a awm ang le? Tunah te hian engnge a tih ang le? Nungdamin a la awm ang em? Khing zawng zawng khi keimah leh keimah ka inzawt ṭhin. Mahse,chhanna erawh ka in pe thei chuang si lo. Ka nu bula ka zawh lah chuan engmah min hrilh ṭha duh ngai bawk si lo,ka pa chu engang mi nge a nih a? Engang hmelpu nge a nih tih hre lo mah ila,hmuh ka chak thei em em ṭhin. Mahse,a hming takngial pawh ka hre si lo.

Ka nu chuan pa thar ka neih tur thu min hrilh a. Mahse,ka lungawi lo khawp mai pa thar neih chu ka duh lo a ni. Mahse,duh lo engang mah ila ka nu chuan a nei dawn tho si a. Kan chhungkua kan harsat avangin ka nu chuan,ka unaupa neihchhunchu ka pite bulah a awm tir ta a. Ka unaupa nen pawh chuan kan inbe khât ṭhin khawp mai.

Ka nu pasal thar chu ka nêl mawh khawp mai a. Ka nu chuan,"I pa tur a nih hi aw,a thu awih hle ang che,"a ti hmak hmak zel mai bawk si. Ka nu pasal thar lah chuan,"Aaa a la naupang a,a la hrethiam lo deuh a nih hi. Nakinah a lo upat deuh hunah a la hrethiam ve mai ang,"tiin min duat vel ṭhin khawp mai. Mahse,he mihring pa hi2 ka nêl thei hlawl lo a ni,ka nu in duhtak leh hmangaih taka a neih a nih vang chauhin zah takin ka be ṭhin. Chuti ni lo se chuan,biak pawh ka be ngai lo ang.

Ka unaupa chu ngaiin thlahlel ve viau ṭhin mah ila,ka hmuh phakah a awm tawh si lo. Duh hun hunah kan inbe thei lova,ka ngai thei khawp mai. Kei pawh ka theihtawpin lehkha ka zir a,min hringtu ka pa chu engang hmelpu nge tih te,tunge a hming tih hre lo mah ila; zawn hmuh ngei ka tum tlat a ni. Ka nu chuan min hringtu ka pa chanchin min hrilh ngai lova,zawh chi a nih leh nih loh erawh ka hre lo. Zawt ta ila engtinnge min chhan ang? Ka rilru chu a insual ve nasa ṭhin khawp mai.

Kum naupang te mah ni ila,In chhung chet zawng zawng chu ka kutah a tlak vek avangin,ka kum rualpui tam tak te aiin ka puitling zawk a ni. Nitin School-ah ka kal ngai ṭhin mah se,In chhung chet ka ṭhulh phah chuang lo. Ka hunawl neih ang chhun chhunah chuan lehkha ka zir ve mai ṭhin. Ṭhian pawh ka kawm tam lo khawp mai.

Ka nu lah chuan a pasal thusawi chu a kawi a ngilin a awih vek mai bawk si. A fanu aiin a pasal chu a hmangaih zawk ti ila ka sawi sual lo ang. Kei a fanu naupang te hi min ngaihsak lem lo a ni;mahse,ka nu a nihna a bo chuang si lo. Ti tura min tih apiang chu lungawi tak leh thuawih takin ka ti mai ṭhin.

Ka nu hian sumdawnna lam a khawih vangin zin chhuah zeuh zeuh a ngai ṭhin a. Ka nu a zin chhuah dawn hi chuan ka huphurh ru viau zel,min ngaihsak lovin min thlahlel lo viau ṭhin mah se,ka nu a nih chhung chuan ka thlahlel lo thei si lova.

Zan a ni a,ka nu chu a zin avangin a awm lova. Ka pa(pahrawh tih tawp hian a mawi lo êm mai,ka pa tiin ka sawi zel tawh dawn a. Chhiartu ten in lo hrethiam mai dawn nia aw) nen chauh chuan kan awm ta a,min biak hmasak loh chuan ka be hmasa bik lem lo. Zanriah eikhamah chuan lehkha te ka zir a,ka zir zawhah ka mu nghal a. Hemi zan hi a ni,ka nun zawng zawng leh ka zahawmna chhiatna bul chu..

Ka muhil tui lai chu ka harh hlawl a,ka pa chuan hnai takah enin min lo nuih vur vur a. Ka hlau ngei mai,ka phu dawrh nghe nghe a,"Engnge i rawn tih dawn? Min kalsan rawh,"ka ti nghal mawlh mawlh a. Ka pa chuan min kuahbet nghal a,"Ngawi reng khan awm hle hle mai rawh. Âu hlek suh ang che,chhantu tur che pawh i neih loh hi,"a ti khur khur a. Ka pa hmel chu ka râp takzet a ni,a tha leh ka tha chu a inang lo nasa mai si. Ka theihtawpin tâl chhuah tumin bei chiam mah ila awmzia a awm si lo. Ani lah chuan a duhtawkin min khawih mawlh mawlh tawh mai bawk si,a van hrehawm tak êm! Ka nu kha chu awm se,tiang hian min ti hauh lo ang. A duhtawk a ngah hnuah chuan,"I nu bulah engmah sawi suh ang che. I sawi vaih chuan i nu ka vuak tir hrep ang che,i sawi dawn nge dawn lo?,"tiin min vo/vau bet zui a.(vau leh vo hi a dik zawk ka hre lova,khawngaihin a dik zawk hria chuan min lo hrilh mai dawn nia aw) Ka hlau lutuk chu chet pawh ka che ngam tawh lo,ka taksa chu a khawng vek ni maiin ka hria. Ka pa chu en pawh ka en ngam tawh lo,ngawi rengin ka lu ka bu nghut ringawt a.

Ka nu zin pawh a lo haw ve ta a;mahse,ka nu bulah chuan engmah ka sawi ngam rih lo a ni. Ka pa erawh a hma aiin ka nêl lo lehzual,a ten in ka ten a ni tawp mai. Khami zan aṭang khan "Ka Pa" tih pawn ka ko tawh ngai lo. School kalnaah pawh ka mizia ka thlak vek a,ka ṭawng ngai lova ṭhian ka kawm tawh ngai hek lo. Ka nun chu a in thlak danglam vek a ni ber mai,ka nu lah chuan a fanu mize danglam tak chu a hrethiam mawlh si lo.

Ka nu a zin loh lai pawn ka pa chuan remchang a zawng ru reng ṭhin. Ka nu erawhin a hrethiam mawlh si lo,ka tan chuan khawvel hi a thim mup a ni ber mai. Ka pa chuan a vawihnih na atan min khawih leh ta,sex min hmanpui lo mah se,a kut hmangin a duhtawkin min khawih ṭhin a ni. Kan School kalnaah Sex Education Period-ah sex chungchang kan zir aṭangin thil tam tak ka hriatfiah phah a. Dik tak chuan,ka nu hian sex chungchang hi min zirtirin min sawipui ngai lova. School-a kan zir bak hi hriat ka nei tam lo khawp mai,ka pa min khawih pawh chu ka tan a pawizia pawh ka hre chho mawlh mawlh bawk a. A vawihnihnaah chuan ka ngawi thei ta bik lova,huphurh tak leh rilru na tak chungin ka nu bulah chuan ka pa in min khawih dan chanchin chu ka sawi ve ta nge nge a. Ka nu chuan,"I pa chu ka lo be dawn nia,"tiin min chhang a. Ka lo rindan chuan ka nu chuan a fanu a chhan avang leh a fanu a hmangaih avangin,a pasal chu man tirin a ṭhen ka lo ring ve ringawt a;mahse,a ni si lo.

Sitting room-ah chuan ngawi rengin T.V ka en a,choka lam aṭang chuan ka nu chuan âwka vin ṭhak hian,"Zonunmawi,rawn phei teh le,"a rawn ti nghal ṭhawt mai a. Ka phu deuh zawk a,ngawi rengin choka lamah chuan ka phei nghal a. Ka nu chu hmawlh nen a lo ding reng tawh a,"I pa hi engtinnge dawt muhlumin i puh theih zawk a? Naupang i nihkha i hria em? Zah pawh i zak lo em ni?,"tih pahin ka chawnah chuan min hlap nghal zawt zawt mai a. Ka pa lah chuan kil khat aṭangin ngawi rengin min lo thlir reng ringawt a,ka nu chu ka chhang let miah lova. Min vuakna aiin ka nu in min rin lohna chu nâ ka ti zawk a ni.

##A hnuaia fakna hi lo hmet ve rawh.##

2 Comments

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post