~ Lena Jongte
An silai AK 47 chu an han load rap a, a magazine chu phawiin silai chu ka kutah min pe a. "Kap rawh le," an ti a. Airgun bak la kapchhin lo tan chuan a zamawm lek lek. A boruak a dang tlat. Ka han kap ta poh a, an target min siam sak chu ka ṭhelh chiang hle.
Chumi hnu chuan 9mm pistol chu min load sak leh a, a magazine chu an phawi leh a, ka kap leh a. Ka ṭhelh chiang lekpek hle.
A tawp berah M16 chu an han load rap a, a magazine chu an phawi leh a. "Kap rawh le," an ti leh a, ka kap leh ta a. Ka target atana an dah, sapthei lian chi chu ka verh ve ta sat a! "M16 hi a kah a dik ber a nih hi," ka'n ti liam ve puat a.
Hei hi kum 2008 October thla-a HPCD ho buzawl ka kal ṭum a thil thleng a ni.
Khatih laia Mizorama hel hriat hlawh tak chu Hmar Peoples Convention (Democratic) an ni a. HPC(D) te hi hmar hnam tana din an ni a, Hmar hnam tan an ṭang nasa hle a. Ralthuam ṭha tak tak neia rammu an nih avangin India emaw Mizoram emaw Manipur sorkar emaw tan pawh namnul mai mai chi an ni lo.
A chhan ka hre lo a, September ni 2 zing lam dar 4:00 khan HPCD helte chuan, Saipum daiah Mizoram police 4 lai mai an kapthlum a. Mizoram a nghawr nghing a, Mizoram thin a rim! Boruak a sosang hle.
Tichuan, hetiang boruak sosang tak karah hian HPCD kawm tumin ka lo vir buai ve a. Kei, Journalist tlachhe lam kha ka lo inrawlh ve var a. HPCD helte kawm theih dan tur kha ka dap ta a ni.
An ni an ralṭi em em a, tun anga inbiakpawhna awlsam hi a la ni si lo. Anmahni thu hmu hmasa lova an awmna (nia ngaih) pan ngawt kha a him si lo. Chuti chuan, anmahni biak pawh theih dan tur ka zawng ta a.
An hming ka sawi lo mai ang a, an puihna azarah HPCD chu ka be pawp thei ta a. "Lokal rawh, kan lo kawm ang che. Tumah rawn hruai a ngai lovang. Nangmah chauhin lokal tawp mai rawh. Cameraman tur pawh kan nei e," an ti ta a.
Tichuan, HPCD hmu tur chuan ka inruahman ta a.
Lengpui Airport aṭangin Imphal Airport ka pan a. Thlawhna ṭumhmunah chuan car-in min lo hmuak a. Ngawi rengin ka zui ve mai a. Hel pawl boruak la tawng lo ka nih avangin ka ralmuang lo hle a. An thu thuin an kutah chuan ka awm ta tawp a. Ngaih ngam taka awm erawh a har hle.
Churachandpur lamah min hruai phei a. Ka thlen in turah min dah a. Thlen in fel deuh min pekah, Rengkaiah chuan ka thleng ta a ni.
Zanah chuan HPCD President Pu Lalhmingthang Sinate leh a body guard (an tih mai) chu an rawn leng a. Pu Hmingtea pistol rawn paite chu kan en sak a. A ṭhianpa pawh khan a pai tih ka hria.
Amah Pu Hmingtea hi pa lian lem lo, zen thlerh thlawrh, Pathian thu ngaina leh Pathiana innghat deuh mai a ni a. A hmel en mai chuan a zuamawm lek lek a, a mitmeng erawh a fiah a, a dawihzep lovang tih a hriat theih.
A thusawi reng reng chu Pathian thu vek ni mai hian ka hria a. Ka hmuh tum dan leh rin dan a ni lo hle. "Pathian ṭih fu si mi chu in kaphlum ṭeuh zel a ni bawk sia.." ka ti rilru a.
"Interview-naah chuan engte nge min zawh i duh?"
"Zawhna tluangtlam panngai a ni mai. Engnge in demand ber? Engvangin nge Mizoram Police 4 lai kha inkahhlum? tih vel bawr a ni mai"
"A nih tak chu"
Ka zawhna inrinlawk zawng zawng chu ka hrilh duh bik lova. Journalist hriam ve taka inngai ka nih avangin an thu thua awm ka tum bik lo a ni. "An chhan chak loh tak zawhna te pawh ka zawt ve bawk ang chu," tiin ka ngaihtuah a.
Ka thlen inte chuan an in sak mek, an in Assam type nena inzawm, room ṭhenkhat an luah luh tawh, an la sak zawh loh chhawng khatna room pakhatah chuan min riah tir ta a ni.
Ka mut dawn chuan bathlarah ka dingchhuak a. Churachadpur khawthleng chu nuam hlein ka hria a. Chutih lai chuan hel tamna khawpui tih ka ral hriat, ṭum khat ka kalna a ni bawk a, eng a thawl lo hle. Bathlarah chuan rei pawh ding duh lovin room-ah ka lut a, tukverh parda ka kaithla a.
Ka duh tih an hriat 'sekmai' min pek chu ka khiat khawlh khawlh a. Ka mu ta a.
Zingah chuan an motor-in min rawn lam a, "Interview neih tur," an rawn ti a. Kan kalna tur hmun leh chin pawh hre lo chuan an motor rawn chhawpah chuan ka chuang lut ve rawih a.
Churachandpur aṭanga hla vak lo, khawte pakhatah min hruai a. Motor aṭanga ka chhuk chu ka danglam deuh tlat. Uniform ṭial ha, tleirawl te te chu silai ṭha deuh deuh nen an lo zi huai huai a. Sorkar sipai an ni lo tih ka chiang si. Ka zam ru veng veng mai a ni.
In pakhatah min luh pui a. Ṭukṭhuan atan arsa min lo siam sak a. Thil ṭha deuh an lo nei bawk a, ka zu in nasat lai a ni nen, ka zam ve deuh nen an 'thil' chu ka hnar duh bik ta lo a. A ṭawng phur tawk vel turin zing 'thil' chu no hnih vel chu ka in sak ve a.
Tukṭhuan kan kil zawh chuan min phurchhuak leh a. Kan interview-na hmun tur thlam pakhatah chuan min hruai ta a. A hmun kan thlen chuan HCPD General Secretary H Zosangbera chuan min lo dawngsawng a. Amah chu ka interview tura an tih chu a ni.
An President interview loa an GS Pu H Zosangbera min interview tir tur chu ka lunghnur viau a. Dik tak chuan ka phurna a reh a ni. Ka duhdan ka sawi ngam tawh bawk si lo va, an tih ang chuan Pu Zosangbera chu ka duh duh ka zawt ta a. Video Cameraman an lo inchhawp sa bawk a. Kan inkawm rei hle.
Zawhna dengkhawng angreng tak takte pawh ka zawt nual a, chhan har tih deuh pawh a neiin ka hria.
Kan interview zawh chuan thlate kan la ho a. An silai ka ak bawr ṭeuh laite pawh thla ka la nghe nghe.
An fel viau a, mi an duat em em avang chuan kei pawh chu ka tlangnel ta viau a.
Kan interview zawh, tlai lamah chuan ka thlen in lamah min thlah haw leh a.
Chumi zan chuan an reh vang vang a.
Hemi zan hian inleng dang kan nei lo bawk a, ka thlen in pa nen chuan kan inkawm tui hle a. Sorkar hna sang tak thawk a ni bawk a, a titipui tlak hle a. Keimah ber zawk kha titipui tlak ka ni lo mah zawkin ka inhria.
Ka thlen inte hi hmar e ti lovin hmarcha an ei mang tlat lo mai a. Keimah ber chu hmarcha hehah ka han ṭang a.
An fapa te lah chu ka cousin-te nena Kolkata-a sikul lo lut ho tawh an lo ni a. Kan innel ta phian a.
A tuk khua a lo var a, HPCD lam chuan min rawn pan leh a. "Interview ṭhat leh a ngai. Nimina kan interview-na kha a ṭha tawk lo," an tia. Video cameraman kha an mahni mi a nih avangin a disc kha an kawl a, min pek phawt loh kha chuan ka tan chet ngaihna a awm lo. Bakah an thu awih loh ngam ni hek lo, an motor chuan mi phur chhuak leh ta poh a.
Interview ṭhat leh a ngai, an rawn ti hi ka lawm vak lo a. Ka sawi ngam si lo. A chhan chu an GS kha zawhna harsa tak taka ka ngaih, uluk taka ka lo inbuatsaihna zawng zawng kha ka zawt thut thut a. Chhan har tih leh chhan fuh loh deuh pawh a neiin ka hria. Kha tak kha a 'hit' lai tur niin ka hria. Interview ṭha thawkhat viauin ka inhria a ni.
Motor-a ka chuan lai chuan ka ngaihtuah chhuah tak chu: Zanah khan uluk takin ka interview-na kha an thlir ho a, an sawiho a, chhang ṭha tawk lo an intih lai a awm a. Uluk taka ka zawhna tur zawng zawng zir lawk leh sawiho lawk sain Interview neih ṭhat leh an rawt tih chu ka hre thiam ta a ni.
"An fing hle mai," ka tia, motor-ah chuan ka nui ta var var a.
Churachandpur khaw dai hmun pakhatah hian min hruai leh a. Kan interview ṭha leh ta a.
Hemi ṭum hi chuan an President Pu Lalhmingthang Sinate ngei chuan min hmachhawn ta a. An president ngei ka interview theih tak avang chuan ka hnual lutuk tur pawh a zia ta deuh a.
Tichuan, a tukah chuan chu kan interview-na disc ka hlut tak keng chung chuan Imphal ṭumhmun aṭangin ka rawn thlawk haw leh ta a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: