Aizawl | July 3, 2022: India ram pawna professional boxing an khelh hmasak berah Vanlalawmpuia leh F Zoramchhana'n mittlung takin hnehna an chang a, anmahni thlawptu Mizo mipui chungah lawmthu an sawi.
Niminah Spaceplus, Bangkok-ah Awmpa'n hnuhma tha a neih chhunzawmin khawtual boxer Aekkawee Kaewmanee-a lakah inhnek a thunun hneh hle a, round ruk chhungin hneh takin a nawr a, phu takin a chak.
Professional boxing a luhchilh atangin vawi nga a khelhna a ni a, tlawm nei lovin a tum li nan a chak a, Indian boxer ni lo ram dang mi nena an intawn hmasak berah kum 25 mi Khuangthing fighter hian round hmasa ber atangin amah aia kum 15-a upa Kaewmanee a thunun thei a, an inbeih chhungin Thai boxer a inveng tluan a, a hman thiam a vei lamin hnek let fo mah se awmzia a nei tham lo a ni.
A thianpa Zotea nen ram pawna an fehchhuah hmasak ber a ni a, Awpa hian video kal tlangin Zoram mipui hnenah tawngtaipui turin a ngen a, hnehna chhinchhiahtlak tak a chan hnuah Mizo mipui hnenah lawmthu a sawi a, an khua Khuangthing mai bakah bialtu MLA Pu Ramthanmawia chuan chhuanawm a tiin a lawmpui tak zet a, chawimawina pek an tum hial a ni.
Cherhlun tlangval, Republic vengthlanga cheng mek - Zotea'n inhnek a hmachhawn tawha pawimawh em emah thiamna leh theihna tha tak a lantir a, bantamweight huangah round ruk an inhnek chhungin WBA Asia Flyweight champion ni tawh Yutthana Kaensa aiin a chungnung tluan a, Thai khawpuia Thai boxer hnehin hnehna ban a phar a ni.
November 27 khan Aizawlah Sandeep Singh Bhatti hneh lovin Zotea a tlawm a, a dinhmun a hniam lai takin hmabak huphurhawm tak hmachhawn turin a inbuatsaih a, rim taka a beihna rah sengin Kaensa-a hmaah boxer tha zawk a nihzia chiang takin a hmuh theih a ni.
A tlawmna chhang letin hlim takin hun a hmang a, kawng dika kir leh tura amah thlawpa tantute zawng zawng chungah lawmthu a sawi a, professional boxing vawi li a khelh tawhah a tum thum nan a chak a ni.
Inhnek pui berah Thai chhuanvawr Tewa Kiram chuan round 10 an inbeih hnuah Afghan boxer Mohammad Zamani hnehin WBA Asia super welterweight title a la a, welterweight huangah Indian Neeraj Goyat chuan round hnihnaah technical knockout-in Thai tlangval Rachata Khaophimai a hneh a, hmeichhe inhnek awm chhunah Delhi nula Shivani Dahiya chuan Thai tleirawl Sundania Looksaikongdin a hneh bawk a, Mizo pahnih telin Indian boxer pali an chak vek a ni.
Mizo tlangvalte hi LPS Promotion hming/hnuaia kal an ni.
- T-a
You have shared a magnificent post about Boxing Personal Trainer Sydney I totally agree with all the points you mentioned here. Thank you for providing such an informative post.
ReplyDeletePost a Comment
He post chungchanga i ngaihdan lo sawi ve rawh: