Lungkawlh khaw pa Savawmin seh hlum

Aizawl | March 2, 2022: Lungkawlh khaw pa R. Chhunthangvunga (54) s/o Chhantluanga chu nimin tlai khan Ṭiau kamah savawm no nei hlimin a seh hlum.

Pu Chhuna ruang hi tukin zing dar 2:30 vel khan an khua thlenpui niin, zing dar 9 vel khan postmortem turin N Vanlaiphai panpui niin, postmortem zawhah vawiin hian a ruang hi vuiliam a ni ang.


Thil thlen dan a hmun atang dawnin a tarlan danin, R Chhunthangvunga hi a nu leh pate in sakna turin Tiau kamah a fapa Rozama rawl thar kum 14 mi nen balu lain an riak a. Tiau kamah hian midangte pawh balu la-a riak an awm nuala, an pafain buk hranah an riak a ni. Nimin khan tiau balu thiar thin truck nei hoin intihhlim pahin chaw ei an buatsaih a, chaw ei tura an sawm angin an ei ve a, ni dang aiin zanriah an ei hma deuh. 

Nimin tlaia an chaw ei kham chu, chawhmeh hruizik ilo zawng turin thimhlim dar 6:30 velah a chhuak a, savawm no nei hlim a va pal chhuak ta hlauh mai niin a lang. Tiau kama riak ve dangte chuan hla deuh taka savawm te thawm an hriatin an ngaih a tha chiah lova, savawm thawm a reh hnuah an han kuk a, chhawntu an awm lova, an ngaih tha lo chuan thawm awmna lam chu an pan ta a. A ram a chhengchhiain kal a harsa hle a, zan dar 9 vela Pu Chhuna an va hmuh chuan a lo chatthla fel tawh niin an sawi.

upa atana nemngheh a ni lai

Mita hmutuin a sawi danin Pu Chhuna hi savawm hian a malpui ding lamah nasa takin a seh a, a thisenzam pui a chat niin a lang. A kaihza tha a chat a, a kheimit chungah na takin a hliam bawk. A malpuia a sehna atang hian thsen a chhuak nasa niin a lang a, thisen chhuak nasa lutuk avangin a boral niin an ring.

Ruang awmna atanga hla vak lovah savawm note mit keu hlim 2 an hmu a, a pui erawh a lo kal bo hman a ni. Savawm note hi ngaihsak hman pawh an awm lova, an kalsan ta mai a, a pui hian a rawn zawn hmuh leh thuai a rinawm. 

Pu R. Chhunthangvunga ruang awmna hi ram rem lo tak mai a ni a, Tiau kama in lak thlen pawh a hautak viau mai. Tiau kama an bukah thil an tih fel hnuah, khua atanga tlawmngai rawn thlengte nen ruang hi khaw lam an pan pui a, zing dar 2:30 velah khua thlenpui a ni. Lungkawlh atangin Tiau kam hi km 9 vela hla a ni a, a kawng a chhe hle. 

Ruang hi nizanah tlaivarpui a ni a, tukin zing dar 9 vel khan N. Vanlaiphai damdawi in-a postmortem turin Vanlaiphai an pan puia, post mortem zawh hnuah vawiin lamah vui a ni ang.

Pu R. Chhunthangvunga hian a nupui Pi Biakkheni nen fa 4, mipa 3 leh hmeichhia 1 an nei a, an fa u berin nupui nei tawhin in hrang a chang tawh a, a dangte hi lehkha zir laite an ni hlawm.

R Chhunthangvunga hi nupui fanaute nen in hrang chang tawh an ni a, a nu leh pate hian tunlaiin in an puahchah ve avangin an fin lai a ni. Lungkawlh Presbyterian Kohhran-ah kohhran upa a ni a, nikum October thla khan Upa atana nemngheh ni.


With input from: MSR/ Mizo WhatsApp / Omomi Hmar from Lungkawlh

1 Comments

He post chungchanga i ngaihdan lo sawi ve rawh:

  1. A va pawi ve aw... an chhungkua an hlimin beiseina an neih sân lai a ni dawn asin le.....

    ReplyDelete

Post a Comment

He post chungchanga i ngaihdan lo sawi ve rawh:

Previous Post Next Post