MZP leh College SU te'n offline-a college class kalpui duh

Aizawl  | Feb 25, 2022: Mizo Zirlai Pawl (MZP) general headquarters chuan vawiin khan MZP Conference Hall ah College SU hrang hrangte nen offline-a college class kalpui tur chungchang ngaihtuahin an ṭhukhawm.

He meeting hi MZP president Lalnubmawia Pautu in a kaihruai a, College zirlai hruaitu hrang hrang te ngaihdan ngaihthlak a nih hnuin 'College class hi offline ngeia kalpui ni rawh se' tiin thutlukna an siam

MZP leh College zirlai hruaitute chuan, Sawrkarah Offline class kalpui tura ngen nise an ti a, ngenna hi March 4 thleng nghakin, hemi hnua an ngenna a la hlawhtlin loh chuan lungawi lohna lantir an tum.

He huna kalkhawmte hian college class hi offline a kalpui an duh a, zirlai zawng zawng offline a class lak nise, a theih loh pawhin final semester tal nise, an ti a. Offline class kalpui theih loh a, online a class kalpui a nih rau rau chuan, MZU exam pawha online veka kalpui nise, an ti bawk.

He hunah hian Aizawl khawpui chhunga college hrang hrang Students' Union te kalin, kal thei lo Aizawl khawpui pawna mite pawhin ziakin an ngaihdan an thlen a ni.

MZP PRESS RELEASE

No. E-93/MZP-GHQ/2021-2023/15             Dated, Aizawl, the 25th February, 2022

Mizo Zirlai Pawl (MZP) General Headquarters chuan vawiin February 25, 2022 chawhnu dar 2 khan MZP Conference Hall, Aizawl-ah College SU hrang hrangte nen offline-a college class kalpui tur chungchang ngaihtuahin thutkhawm a ni.

He thutkhawm hi MZP President Pu Lalnunmawia Pautu in a kaihruai a, College zirlai hruaitu hrang hrang te ngaihdan ngaihthlak a ni a. Offline class kal chungchangah hian January ni 19, 2022 khan Mizoram Chief Minister Pu Zoramthang chu a office-ah hmuh tawh a ni a, sawrkar thuneitu hrang hrangte hnenah pawh thlen a nih tawh bawk. Tunah hian Mizoram sawrkarin Gym, Spa, Picnic Spot, dawr leh Bazar hawn a phalsak tawh dante, puipunna thenkhat neih  phalsak a ni tawh laia College zirlaite hrileng laka fimkhur thiam rual vek tawhte offlinea class kal phalsak a la ni lova. Chuvangin zirlaite quality pawhin a tuar tawh hle a ni. Heng chhan hrang hrangte ngaihtuah chungin MZP leh College hrang hrang Students’ Union leaders’ thukhawm chuan heng a hnuaia mi ang hian thutlukna a siam.

1. MZP leh College zirlai hruaitute chuan College class hi offline ngeia kalpui ni rawh se.

2. Sawrkarah Offline class kalpui tura ngen nise, Sawrkar-a ngenna hi March 4 thleng ngaihchan nise, hemi hnua ngenna a la hlawhtlin loh chuan March ni 8, 2022 hian Vanapa Hall kawtah lungawi lohna lantir ni rawh se.

3. Zirlai zawng zawng offline a class kalpui nise, a theih loh pawhin final semester tal offline class kal tir ni rawh se. 

4. Offline class kalpui theih loh a, online-a class kalpui a nih rau rau chuan, MZU hnuaia Degree Course hrang hrang exam pawh online veka kalpui ni rawh se.

He hunah hian Aizawl khawpui chhunga college hrang hrang Students' Union te kalin, kal thei lo Aizawl khawpui pawna mite pawhin ziakin an ngaihdan an thlen a ni.

Sd/-

(JACOB LALMUANPUIA)

General Secretary