Thangram mipuite'n Mizoram-a beh an duh; Thangram Indigenious Peoples’ Movement-in Mizoram mipuite thlawpna ngen


Aizawl | Feb 25, 2022: Thangram Indigenious Peoples’ Movement hruaitute chuan vawiin khan Aizawl Press Club-ah thuthar thehdarhtute kawmin, Thangram mipuite'n Mizorama beh an duh thu leh hemi atana Mizoram mipuite thlawpna an ngen.

Press Conference Video:



TIPM finance secretary J Lalrinmawia Skachep chuan, "Thangram hi Kanhmun, Mamit District (Langkaih Valley) leh Thinghlun, Mamit District (Singla Valley) hrula awm a ni a, square miles 180 a zau a ni. North Eastern Area (Reorganisation) Act 1971, 1st Edition 1974 Survey of India in a report ah Toposheet number 83D7 hi la tihchian loh a ni.( But have yet to be verified)" tiin thutharthehdarhtute a hrilh.

"Mizote inpui Zofate Jerusalem hi belh tlakah kan ngai a, kan hmalak zel dan turah Mizo mipuite kutah kan innghat tawp mai a ni." tiin a sawi bawk.

"Thangram Indigenious Peoples’ Movement hi ni 18th October, 2020 khan din a ni a. Thangram chhunga chengte hi Mizo hnahthlak heng Hrangkhol, Chorei, Ranglong, Molsom, Kaipeng leh Sakachep te kan ni. British lo luh hma daih tawh a lo awm tawh kan ni, British lo luh hnuin Syhlet district-ah min dah a, chumi zawh ah, Cachar District-ah min dah leh a. Tunah hian kan duh reng vang  pawh ni lovin Karimganj District hnuaiah kan awm ta ani. Pipute hun a rorelna khat hnuaia awm thin chu rorelna fello avangin then hranin kan awm a, chu chu Thangram a Mizo awmte hian kan unau thisen zawmpuite nena Mizoram chhung rorelna khat hnuaia awm leh kan duh bera, chuvang chuan he Movement (TIPM) hi alo ding ta a ni." a ti bawk.


Ni 18th November, 2020 khan MZP General Headquarters hruaitute nen Kanhmun, BRC Hall-ah in hmuin meeting hlawhtling tak an nei a, vawiin thlengin MZP ten hma an lakpui zel a ni.

TIPM hian Ni 10th December, 2020 khan India ram Prime Minister, Union Home Minister leh Union Home Secretary te hnenah Memorundum  ‘Prayer for merging of Thangram under Mizoram State’ tih chu an lo thlen tawh a. Hemi bakah hian, Ni 24th & 25th February, 2021-ah Thangram Cultural meet pawh Mualmawi ah hlawhtling taka hman a ni a, MP (Rajya Sabha)  K Vanlalvena chu khuallian a ni.


TIPM hian hma la chho zelin kawng zawh, Awarness Campaign leh sorkar hruaitute dawr chhunzawm rengin, He Movement a hlawhtlin ngei theih nan hian Mizorama kan unau te hian kawng engkimah anmahni thlawp a, tawiawm a, tanpui an ngaihna apiangah tanpui turin All NGO, Political Party, Kohhran, Sorkar leh mimal te n ngen a ni.












Post a Comment

He post chungchanga i ngaihdan lo sawi ve rawh:

Previous Post Next Post