AIZAWL HI KUM 132 A UPA A LO NI TA

By Commissioner Lalkiamlova

President : Clean Aizawl City

Pu K C Lalvunga article, Shillonga Christmas an hman chanchin a ziah kha ka chhiar a, a kum leh a article thupui ka hre reng ta lo. Fatu hovin sa an chan a, an sa hrang khat chu leiah an titla a, a bal hman lo vang, Mizo kan ni alawm, eng mah pawi lo an ti a, sil lovin an dah ve ta mai a. Ka ngaihtuah zui a, Mizo nih chu ‘țawp’ tihna a lo ni dawn maw, ka ti a” a ti a ni. Hman lai khan hetiang hi hmun tin tihtheihah kan chet dan leh kan Mizo nih kan sawi chhuah duh dan a ni fo mai. Thil țha lem lo lama ‘Mizo kan nia lawm’ han tihthlak zen kha kan ching em em a ni. Hei hian kan Mizo nun hi thui tak min hruaia, ngaihsamna, bawlhlawh leh thil țawp ngaihtheihna nun min siamsak a. Chu nun chu tihbo harsa kan ti hle mai. Ram changkanga zin tur Mizoten an huphurh ber fo chu – ei leh barna hmuna chet fel, a nih dan tur ang taka engkim tih thlap thlap te hi a ni țhin.

Hnam upa zawk leh changkang zawkte chuan chaw einaah Table manner te an lo nei thlap a. An chaw ei dawhkan a faiin a thianghlim a, thleng leh hmanraw tinreng te chu set thlap a ni a; chung zawm chu harsa an ti a ni. Heng hi anni tan chuan a harsa lo, a chhan chu an naupan lai ațanga an inchhunga an tih dan, an pianpui a ni. Keini pawh table manner nei lo chu kan ni hlei nem, kan table manner erawhin awmze mumal a nei lo va, a standard a hniam deuh a ni. ‘Mizo kan nia lawm, ti mai mai ang’ kan tih zel avangin chung zawm chu kan peih lo va, harsa kan ti țhin. Hei hi kan inchhung khawsak dan pawn lama kan chhawm chhuah chu a ni. Zawi zawiin kan kalsan hret hret a, tunah chuan kan che felin, kan che thianghlim ve ta khawp mai a, hmasawn zawngin kan țhang zel turah ngai ila, a lawmawm hle a ni. Kan țhan erawh a rual lo hle. Kan hnam pum thlir chauh ni lovin, kan khawpui nun leh chet dan pawhin standard mumal a la nei lo hle. Kan thingpui dawr leh restaurant tam tak hian, ‘Mizo kan nia lawm, ti mai mai ang tih standard kha kan phak tawk a la ni tlat.  

Lehlamah chuan kan khaw hawi a sang em em a, Skywalk, Golf Course , Phul lem phah Ui kaih leh uite puak chenin. Incheina lam ni se, khawvel mi lar ber ber te inchei dan lain, thawmhnaw man to tinrengin kan in thuam a. Kan incheina te lah chu a man to hlawm tehlul nen,  a lian a te min tuam zo lo deuh hlir. Rev. Lalhmingchhuangan, Pathianin Evi leh Adama a pek Savun kawrfual kha chu anmahni tuam zo zan a ni a tih ang chu a ni lo deuh hlawm a ni. Engpawhnise, heng inchei dan te hi ka hriatthiam loh leh duh loh em em vanga sawi ka ni lem lo a nia. 

Ka sawi tum tak zawk chu, changkang em ema kan inchei a, kan inthuam a, kan khawsak a, sawrkar pawhin thil ropui changkang tak tak an ngaihtuah lai hian, kan Aizawl khawpui hi thlir ila. Mipui te tan țan lakna tur ava la tam em! Kan inchei dan leh khawsak dan ațang chuan ‘kan bur leh bottle paih tur pawh silfai thlap thlap stage-a awm tawh a mawi kan ni. Chutih laiin kan meizial bung, kan kuhva eina chhak sen, a hnah them paih leh chinai bang kan tah var ngei nguai te hi thil tenawm leh khawpui tihmelchhetu a ni tih kan hre duh lo tlat hi a pawi a ni. Tlai khat chu Chief Secretary Bangalow chhak Footpath-ah hian, pa nge tlangval ka hre lo, unau hmelhaih velah hian a ui kaih a e hlauh mai a. A țhutchilh a, a hrufai vek mai a, lawmawm ka ti hle mai. A thlalak ka duh nen a thim tawh si a. 

Kan Aizawl khawpui duat em em leh chhuan em em hi, a fai thianghlim theih lohna chhan chu a mi chengte kan ni. Kan khawpui kan vawnfai leh vawn thianghlim hi kan mawina atan, kan hriselna atan leh a mi chengte kan zahawmna atan te an pawimawh. Chuvangin, mi tinin țan la ila, kan sawrkar lam AMC leh mawhphurtu department te nen kan Aizawl khawpui hi a chhuanawm lehzual theih nan leh a chim chhiat mai loh nana fai leh thianghlim taka vawng turin țan ila ang u. Clean Aizawl City pawlin, Aizawl khawpui mipui te, February ni 25, Aizawl khawpui kum 132-na chibai a buk a che u.