FOOTBALL KA CHAWLHSAN CHHAN

K Remruatfela
(25.6.2021)


Tukin ka zing tho chu Sony Ten 2-ah France leh Italy World Cup 2006 Final Highlight a lo lang a. France Goal Keeper, Fabian Barthez ka han hmu chu naupan lai ka hriatchhuah thu leh kan inkhelh ve lai chuan Barthez hi kan ngaihsân thin zia te, keeper nih kan inchuh phah thin ziate chu u te fa ho bulah ka han sawi ta luam a. Chutah zet chuan an meng phâwk ta hru a, mak tih hmel zet hian, "Pate, i naupan laiin i lo inkhel ve thin e law?", min ti ta hû hlawm a. Chutah aw ka han thian kâk a, chokaah pheiin kam ka thuah fai thuak thuak a, chumi hnuah TV bula lêt phei lehin he ka hringnun thawnthu hi ka puang chhuak ta a..


Mizo mipa naupang tih takah naupan têt ata naupang dangte ang bawkin Football hi kan han tui ve nghal em em khawp a. Kan thiam emaw thiam lo emaw chu thuhran, sikul kan han bângte hi kan han inthlâk nghal sawk sawk a, kan tualzawl neih that ber,  Govt. JM High School  kawtah ngei Ball tê hian kan in khel ta thin a, nuam hi kan tiin kan thlan te hi a tla hluam zel. Inkhelh rei zâwng hunbi tuk kha a awm hran lova, inkhelh tâwp hun chu khuain min thiam hnan hun emaw an chhûngten ball neitu an lo auh haw hun hun kha a ni tawp mai thin!


Tichuan, kan nghahhleh em em Serchhip level Under 14 Tournament-te a lo awm chho a. A phur hian ka han phur em em khawp mai a. Zânah pawh mu tha thei tawh lovin khua a vâr veleh chhungte tih harh hlau em em hian exer la turin ka tho chhuak phut a, kan kawtzawl leh kawngphei velah te hian ka han zuang auh auh thin a. Mahni tâwkah fit hi ka inti ve em em thin a ni. Tournament ni chu a lo thleng a, chhûngten kan fapa chu a inkhel ve thei ta tiin phur em em hian Ballboot leh inkhelh mawza thar tha ber ber min han lei sak a, keima lamah chuan ka inpeih ta at mai. Mahse, a hun a lo thlen chuan field chhûnga lût ve phâk lovin field sira lo nghâktu (substitute) ah kan han thu leh ta kur thin a. Sikul luhna Principal hnenah leave kan lo la ve tawh laklawh thin si a, classmate leh zirtirtute class bângin Ballboot leh mawza thar fai tliang hlar nena field sira hmel ngui tak chunga thiante inkhel kan han thlir dauh dauh lai min han hmuh châng kha chuan hnâr a lian duh thin khawp mai. A châng phei hi chuan min hmuh leh hlauin Coach bula zung tur anga insawiin ka biru tawp thin 😂


Vawikhat pawh Class X kan nih kai hian High School games kan thleng a. Pâwl sang ber nih ve tawh tâkah chuan vanneihthlâk takin Sir Bta (Marian High School, Serchhip) hian Football Team zingah min han thlang ve mauh mai a. Ka lâwm tluk zetin chhûngte pawh an lâwm. An fapa duh takin High School Games-a School aiawha Football a han khêl ve tur chu min phurpui em em a. Ka inkhelh chauh hlauin Artui hel te min hîp tir a, ka pual khân Bâwnghnute kha an theka phah hialin ka hria! Chutah Inkhelh ni chu a lo thleng leh a. Vawikhat chak loh kha tlâk nghalna kha a lo ni si a, ball vawikhat pawh ka chhuih ve hma hauhin kan tla fel leh ta dêr mai a. A van pawi thin tak em! Hemi tum hian St. Peters, Chhingchhip zirlai mikhual hmeichhe pathum lâi ka nei a. Anni lakah ka lo inti football thiam ve laklawh tawh bawk si a, kan school te inkhelh lai kha an lo en fuh palh ang tih mawlh kha ka hlau tak zet! An thlen in pa hmêl kha field chhungah an han zawng ve ngei ang a, an han hmuh zawh leh si loh chuan In haw hunah engtinnge chhuanlam ka siam tâk ang tih thlengte hian ka rilru a lo insual hman pek a 😛


Chutah khua a lo thim, lohtheihlovin In haw a lo ngai a. Keilah item danga telna nei lo, Football chauha insawrbing ka ni si a, Ballboot leh mawza fai piala chhungte leh mikhualten min hmuh kha ka zak tlat pek a. Chuvangin, In thlen dâwn hnaihah ka Ballboot leh mawza-ah te chuan chirh ka han tât bâl lui vel a. In thlen hunah chhûngten vawiin i inkhel chu i chau bawk em tih zawhna min zawh mawlh kha ka hlau a ni 😂 In ka han lût chiah chu hlauhthâwn ang ngeiin mikhual nula pathum awm lai ngei mai chuan chhungten chu zawhna chu min han zâwt ta mauh mai a. Engtin tak nge ka chhân tâk kha tih pawh ka hre chang tawh lo. A hnua thianten fiamthu titiha chhûngte leh mikhual hmeichhiate bulah chuan vawi 1 pet goal angin a insawi an tih kha chu dâwt mai mai a ni😂😂😛

Chutiang chu ka tuina ber leh ka atchilh, ka football hringnun a nih tâk zel si-ah chuan tlâi khat chu tihian ka inngaihtuah harh ta a. India rama kan football thiampuipa ber Bhaichung Bhutia pawh International level chu sawi loh, English ho zingah ringawt pawh English Premier Leaque (EPL) pawh khêl phâk lo, Second Division club-ah pawh First 11 takngial  a la chang pha lo a nia. Chutah kei, khawvela Football thiam ram tehnaa 138-na lawiha awm mek, India ramah pawh Football-a thleng hniam pawl Mizoram, chutah pawh Football lama District hnufuama an sawi, Serchhip District chhunga veng mal pakhat, Vengchungah pawh senior team ni lo, Under 14 team-ah ringawt pawh kan la khêl pha lo cheu a ni a. Sikul lam lah ni se, khawvel leh India ram chu sawi loh, India hmarchhak kilkhawra District tê berte zinga Sikul pakhat, vawikhat inkhelhnaa chak lo nghal teamah pawh Artui hel, Bawnghnute tuipawlh loh leh Ballboot leh mawza thar nena intuituah chiam hnu pawha la khêl phâk lo cheu kha kan ni a. Chuvangin, a ropui lo em mai, Football hi ka kawng tura Pathian min ruat sak a ni lul lo a ni ang e tiin ui tak leh hreh tak chungin ka Ballboot chu ka khâi ta a ni 😥🤪🙈

1 Comments

He post chungchanga i ngaihdan lo sawi ve rawh:

  1. Jm velah kha chuan midfield ah khan ka dah thin che kha

    ReplyDelete

Post a Comment

He post chungchanga i ngaihdan lo sawi ve rawh:

Previous Post Next Post