India emergency puan champha vawi 46 pualin black day hmang


Aizawl | June 25, 2021: Vawiin June 25th 2021 hi Prime Minister Indira Gandhi, Congress Sorkarin Emergency a puan champha Vawi-46-na a ni a, Congress Party in India mipuite a nghaisakna kan lo thleng leh ta hi BJP Mizoram Pradesh chuan lungchhiatthlak tiin black day an hmanh a. Vawiin hian India ram pumah ‘BLACK DAY’ hi hman a ni.


BJP Mizoram Pradesh chuan Video Conferencing kaltlangin he hun hi hmangin, Pu JB Rualchhinga BJP State State Vice President in thusawina hun a nei a ni.

Pu JB Rualchhinga chuan, India ramin Kum 1975 June ni 25 zanlai a, Democracy leh India Constitution in hliampui a tawrhna nasa ber 1975 -1977 chhunga India mipui tawrhna rapthlakzia hi ngaihtuah chian angai hle a, Mizoram chhung ngei ah pawh Congress sorkarin MISA  dan hmanga Mizo politician, Brig T.Sailo hovin  journalist 10 chuang zet te nen an chungthu pawh trial thei lova jail a khung te pawh an lo awm tawh a ni.




PM Indira Gandhi, Rai Bareilly bial a Congress ticket a thlan tlin chu sum leh pai, official te hmanga a campaign avangin Raj Narain-an Allahabad High Court ah a khing a. High Court hian Pi Indira Gandhi chu thiamloh chantirin MP a nihna leh kum 6 chhung in candidate thei lo turin thiamloh a chantir a. Indira Gandhi hian Supreme Court ah a khinglet in, Supreme Court hian High Court thu hi a lo nemnghet (uplift) a ni. Chuvangin, Indira Gandhi hian Prime Minister anih theih dawn loh avangin Article 352 leh Article 359 hmangin EMERGENCY a puang ta a ni.

Kum 2 dawn 1975-1977 Emergency chhung hian, Congress hruaitu ropui Indira Gandhi hma ah chuan Constitution in awmzia a nei ta hauh lo mai a, Fundamental Rights Article 14, 19, 21 leh 22 te mipui zalenna leh mipui chanvo zawng zawng chu chhuhsak a ni ta a. India history ah Constitution pawngsualna rapthlak ber Judiciary rahbehna a thleng a, Tunlaia Myanmar rama, Min Aung Hlaing thuneihna atchilh ang khi kan thleng ve hman teuh hle a ni. Kha hunah khan, Sorkar kut tuar ringawt mihring nunna sing 3 chuang leh man tawk  jail tang nuai 1 chuang an awm hman a ni.



Hetiang anga hun rapthlak, Democracy leh Constitution pawngsualna hi thleng tawh lo turin BJP chuan kan duh tak zet zet  a, Lalna leh thuneihna ringawt atchilh a, Ram leh mipui Development ngaihthah leh tlat si Congress hruaitu ah khan alo awm theih reng ani tih vawiin 25th June 2021 ah hian hre thar ila, India Constitution vawn him zel nan BJP Mizoram Pradesh chuan he hun hi kan hmang ta ni a ti bawk.





He hun ah hian Pu Vanlalhmuaka, State President in lawmthusawina hun a hmang a, Dr BD Chakma MLA, State Vice President te bakah BJP Member ten Video Conferencing hmangin an lo zawm bawk a ni.

Post a Comment

0 Comments