HV Lalzuimawia khawl siam patent ta; Patent nan kum 10 a bei!

Aizawl | June 25, 2021: Mizote tana rahbi thar kai lehin HV Lalzuimawia, Salem Veng, Aizawl chuan  a khawl thar  siam chhuah, Portable Multi-utility Machine chu  a patent ve ta.


He a khawl siam hi Patent Office , Government of India chuan Patent Certificate pawh tichhuakin , HB Lalzuimawia chuan June 21, 2021 khan he certificate hlu tak hi email-in a dawng .

Heti hian hriat theih chinah HV Lalzuimawia hi Mizo zinga khawl thar siam chhuah patent certificate nei pahnihna a ni a, pakhatna chu Pu Lalbiakzuala Ralte te țhiandun inkawp an ni.


Pu Zuia khawl siam hi hlo leh hnim thlawhna, leh  lei laih khuarna inkawp a ni a, khawvel pumpuia tuma la siam chhuah loh a ni.




Ama sawi danin, Mizorama lo nei mite tana lo nghet enkawl nana hmanraw țangkai  tak tura siam a ni. A khawl hrechiang duh chuan amah zawhfiah a țha ber ang.



January 21, 2011 khan patent hmu tur hian National Innovation Foundation(NIF), Ahmedabad kaltlangin a file țan a, kum sawm hnuah patent certificate hi a hmu ta a ni. A buaipui chhung pawh a rei ngar ngar hle mai.


Pu  Zuia hi mi thluak țha leh taima, harsatna hrang hrang kara Mizoram tana țangkai tur khawl siam chhuah tuma  bei ngar ngar a ni a.  Tunah pawh hian a khawl siam chhuah țhenkhat chu Science and Technology nen țang hovin patent nei tura file mek a ni bawk.

Pu Zuia hi Science and Technology-a a hminga CSO ka nih chhunga min puibawm tlattute zinga mi a ni a. Heti anga a khawl siam chhuah thar pakhat a lo patent ve ta hi ka lawmpui hle mai.

Anni ang, Mizote tana țangkai tur khawl thar siamchhuaktute (inventor / innovator)-te hi Mizo mipuite leh Sorkar hian ngaihlu ila ; hetiang lamah hian  i harh thar  ang u.

- Dr RK Lallianthanga


Post a Comment

0 Comments