Mizo hmeichhe PUBG kheltute'n Bungtlang South kangmei tuarte tanpui

Aizawl | May 13, 2021: Mizo Hmeichhe PUBG (Mobile) khel thin intelkhawm Mizo PUBGM Ladies Association (MPLA) chuan Bungtlang South kangmei tuarte an tanpui.

Mizo PUBGM Ladies Association (MPLA) te hian vawiin khan April 25-a Bungtlang South, Lawngtlai district-a in 14 lai mai kangral tate tana an sum thawhkhawm cheng 30,160 chu an hlan. Heng an sum thawhkhawm hi Bungtlang South VCP account-ah an thun a ni.

Kha kangmei chhuak-ah khan In 14, Vawk 8 leh Ar 25 a kang ral a, Bungtlang South chuan an tuar nasa hle  a ni.

Mizo PUBGM Ladies Association (MPLA) te chuan chhungkaw tam tak kangmei tuara in leh lo an chan leh silh leh fen an chan chu an hriatin an khawngaih hle a, an tan an theih tawk leh remchan angte an thawhkhawm a, chung an sum thawhkhawm tlingkhawm chu an hlan ta a ni.

Mizo PUBGM Ladies Association (MPLA) ah hian Mizo hmeichhe PUBG khel thin clan hrang hrang an tel a, tunah hian clan 70 an inziaklut mek a ni.

Heng hmeichhiate hian games-a tournament an khelh a an lawmman te an thawh a, thenkhat chuan anmahni pawisa te thawh khawmin an remchan ang angin kangmei tuarte tan hian an luangchhuak ta a ni.

An zinga mi pakhat chuan, insit tak chungin, "Hripui vanga buai vangin mi tin kan harsa tlang a, clan thenkhatin an rawn thawh remchang thei lova, tam tak pawh kan hlan thei lo a ni." a ti a. "Thenkhat hi chuan Games kan khelhna atanga pawisa kan lakluh te kan hlan tawp tawp a ni." a ti bawk.

Hetianga thalaite tuina leh khelh duh zawngte hi an tan sum lakluhna tha zawk a awm theih nan lawmman tha tak awma tournament buatsaih sak thei te hi awm se, Miss leh Idol kan tuipui anga han tuipui a, 'hunawl khawhralna' tia sawichhiatsak ringawt lova an tana kawng tha zawk hawnsaktu tur te hi awm se an tan a lawmawmin nihlawhna a ni ngei ang. Tin, Mizo gamer-ho hi Net chak lo tak kara khel si hian India leh khawvel huapah pawh langpha tur khawpa thiam an tam hle a ni.

Hetia sum lakluhna tha tak an la nei lo chung hian, 'mi hman lutuk' tia miin an sawi chhiat thinte hian April thla pawh khan Gamer clan thenkhat chuan thawmhnaw chahin an zuar a, chuta an hlawk/hlep chuan an vengchhhunga mi harsate an lo tanpui tawh bawk a ni.

I chhiar tel duh takin: Bungtlang Soutth-ah In 14 kang; ran thahnem tak kang hlum