AMC huamchhunga mi panga aia tam awmkhawm khapna hlip; Pathianni a lirthei tlan chhuah khapna hlip bawk

Aizawl | January 17, 2021: Aizawl bawrhsapin AMC huamchhunga mi panga aia tam awmkhawm a khap mek chu nimin atang khan hlih a ni.

Sorkar thuchhuahin a sawi danin Aizawl district bawrhsapin phalna nei lova mi panga aia tam awmkhawm a khapna hnuhnung ber January ni 11 a thupek chhuah chu hlih a ni ta a. Hei bakah hian State Disaster Management Authority hnuaia State Executive Committee-in zan lama pawnchhuah a khap hun pawh tidanglamin zan lam pawnchhuah khap tan hun zan dar 8 ni thin chu nizan atang khan dar 8 leh a chanve-ah sawn tlai a ni a. Hei hi district khawpui dangah pawh kalpui a ni ang. February atangin Inrinni leh Pathianni chhun lama inkhawm phal a ni tawh dawn a, inkaihhruaina zawm chunga inkhawm tur a ni a, zan lam inkhawm leh biakin chhunga zaiho chu khap zui a ni a. Zirtawpni, January ni 22 atang khian board ekzam hmachhawn tur pawl 10 leh pawl 12 zirlaite tan sikul hawn tan a ni ang a, hostel-a luh pawh phalsak an ni a, hri an vei leh vei loh endik vek a ngai thung.
Sorkar thupek thar berah chuan lirthei tlan dan tur pawh siam danglam a ni a. Thawhtanni atanga Zirtawpni inkarah intlanchhawk dan kalpui tur a ni a. Inrinni, Pathianni leh sorkar pisa chawlhte chu intlanchhawk hian a huam lovang a, Pathianni a lirthei tlan chhuah khap chu hlih a ni. 
Thawhtanni chu lirthei number 1 leh 2 a tawpte tlanchhuah loh ni a ni a, Thawhlehni chu number 3 leh 4, Nilaini chu number 5 leh 6, Ningani chu number 7 leh 8 leh Zirtawpni chu number 9 leh biala tawpte tlanchhuah phal loh ni a ni ang.

Lirthei intlanchhawk hian zing dar 9:00 atanga tlai dar 4:30 inkar chhung a huam ang a. Mizoram District dang lirthei zawng zawng te, State pawna lirthei register te, mimal Motor leh Bungraw phur motor Aizawl khawpui chhunga awm leh tlan lut tur reng rengte pawh intlanchhawk hian a huam dawn a. Taxi bik chu Sticker A, B leh C hmanga intlanchhawk kalpui mek ang hian zing Dar 9:00 atanga tlai Dar 6:30 inkar an intlanchhawk ang. Inrinni bikah chawhnu Dar 1:00 atangin Taxi-te hi an vaia tlanchhuah phalsak an ni. Pathianni leh Sorkar pisa chawlhah chuan Taxi te hi an vai a tlanchhuah phalsak an ni ang.
   
 Two Wheeler Taxi bik chu Sticker A, B, C, D leh E hmanga an tlan dan tur kalpui mek angin zing Dar 9:00 anga tlai Dar 6:30 inkarah an tlan ang. Inrinni bikah chawhnu Dar 1:00 atangin tlangdung kawngpui-ah an vai a tlanchhuah phalsak an ni. Pathianni leh Sorkar pisa chawlhni-ah te chuan Two Wheeler Taxi te hi an vai a tlanchhuah phalsak an ni ang. Intlanchhawkin a huam loh turte chu a hma a inkaihhruaina awmsa ang deuh kha a ni zui dawn a ni.

Inkaihhruaina tharah hian state pawn atanga lo lutte tan inthlahdul chin a awm na-in, khuahkhirhna dan kalpui zui a nih tur thu tarlan a ni a. Mizoram atanga zinchhuak, darkar 96 chhunga rawn let leh te chu an lo luhna hmunah uluk taka lo endik a ni ang a, Rapid Antigen Test (RAgT) tih a ni bawk ang. RAgT hmanga endikna a hri kai lo tih hriatte leh hri kai lang chhuak lo te chu khunghran an ngai lovang a. Europe atanga 1o haw te erawh chu khunghran ngei ngei tur an ni a, in lama inkhunghran phalsak an ni lovang.

Intlanchawk dan tura sawrkar thuchhuah kimchang hetah hian a awm e.

- AIR Aizawl 

Post a Comment

He post chungchanga i ngaihdan lo sawi ve rawh:

Previous Post Next Post