GAY PAKHAT INPUANNA

Part 1

(Gay nihna ka inpawm chhoh dan)

Mihring 'pà tak' ka ni lem lo a, school kal lai atang tawhin 'Tuai-a' ti-a chhaih ka tawk nasa a, vawi khat phei chu middle school ah tiffin kan ei lai hian, "Uluk deuhin l*  che ila, i rai ve thei ang a.." min rawn ti ringawt a, class zawng zawng an nui dur dur a, an kal leh daih a.

Class 8 kan nih lai khan bialnu ka nei ve ngei a, tun thleng hian kan la inkawm nghe nghe a, class 9-ah kan inthen leh a, a chhan ber pawh keimah khan a hun lai khan duh ve viau mah ila dik lohna kha ka nei tih ka inhre tlat a ni ber mai. Chutih lai vel chu fb kan khawih ve ṭan hun lai kha a ni a. Patling pakhat hian min lo be thin a, inbiak pangngai tak hian kan inbia a, mahse a rei hnu khan zahmawh rawngkai hian min be chho tan a, a tirah chuan mak ka ti a, ka hrethiam lo a, amah pawh kha ka hlau em em a, a hnu lawk ah ka block ta nghe nghe a, mahse gay khawvel min hmelhriattirtu a lo ni ta der a ni.  Teenager kan nih chhoh khan ka it zawng chu ka anpuite an ni tih ka hrethiam nghal vat a, rilru a thlabarin, mahni inhriatthiam lohna pawh kha a nasa, mahse ka it miau a, a dik lo angah chuan ka ngai. Mahse ka inthunun theih piah lam kha a ni si.

Hetih hun lai vel hi a ni a facebook-a 'Mizo Gay Society' group ka hmelhriat chhoh hun lai pawh, a tirah chuan ka real account-in ka join a, kan school-a kan senior pawh a lo awm nghe nghe, mahse a hnuah midangte rualpawlin fake account ka siam ve ta zawk a, tun thleng hian ka la khawih nghe nghe.

Class 11 leh 12 kan nih chhoh lai hi keimah gay ka ni tih ka inpawm chho ṭan hun lai kha a ni a. Kelkang harhna vanglai a ni a, kei pawh a tam thei ang ber intawlh ve ka tum a, ka mipatpui ka it thu ka hrilh hmasak ber pawh class 11 kan nih laiin gospel counsellor a ni nghe nghe a, khami tum a ka ṭah nasatzia kha ka la theihngilh thei lo. Mahse, vawi khat ka sawi chhuah khan keimahah chakna nasa tak min pe tih tunah hian ka hria a, ka inchhir lo chu ti ila, a dik lo thui lem lovang.

 

Pathian hnenah mi pangngaia min siam turin nasa takin ka ngen a, a hun lai boruak khan a zir bawk nen, ni thum chhung chaw nghei te khan ka tawngtai a. Ka theihtawp chuan ka ringin ka hria, mahse tun thleng hian ka duh zawng leh ka it zawngte chu an la danglam lo chu a ni e.

Beidawng takin hun ka hmang a, ka rilru hah chhawkna turin FB-a group atangte chuan biak tur ka zawng chho ta a, online chass pawh pathum vel lai chu ka nei ve hman, pakhat nen phei chuan tun thleng hian Instagram lamah kan la in-follow a, biak erawh kan inbe ngai lem lo. Mahse, a takah mi tu mah ka hmu lem lo a, thingtlang lama mi hlir ka bia a, a chhan ber pawh hetih hunlai hi chuan Mizo Gay Community nunze pangngai ka man chho viau tawh a, s* ngawr ngawr hi mite zawn a ni tih ka hriatthiam ruai tawh vangin chumi culture lak aṭang chuan inlak hran hram hram ka tum a.

 

Class 12 kan han zo ve a, college admission kan buaipui chhoh hun lai hian, tleirawl at huai lai tih takah, mi pakhat hi ka inhmuhpui ve ngei a, kei aiin kum 3 in a upa a, kan ina lo leng turin ka sawm a. Chhunah ka chhungte tu mah ina an awm loh avang chuan zalen takin kan inhmu thei a, chu chu ka first kiss a ni. Khatah khan in-kiss piah lamah ruak vekin kan awm hman a, thil dang pawh kan ti. Mahse, s* em chu kan hmang lo a, khata ka lo hnar thei kha ka nun a ka inchhir loh ber tum a ni ta ve ang, tun thleng hian khami ṭum ai thui kha chu ka la thleng leh ta lo.

A lungchhiatthlak ber chu kha pa kha tu nge a hming tih leh eng ang hmel pu nge tih pawh hi ka hre tawh lo a, ka nuna ka kiss hmasak ber lah a ni lawi si.

Chumi hnu chuan college te kan han kal a, ka thil tih kha ka inchhir a, ngaihtuah loh hram hram ka tum thin a, college-ah pawh ka thian tharte Evangelical Union inkhawm-ah te hruaitu ber ka ni thin a, mahse a nihna takah chuan, college, nula chhelo kal khawm suau suau na hmunah pawh khan ka mit latu ber chu nula chhelo tak takte kha ni lovin, anmahni thlir thintu tlangval duhawm tak takte kha an ni zawk a. Kan khawtlang tehnaah mi tenawm ka ni a, ka thiante bulah ka duhzawng ka sawi ngam lo a, Pathian mithmuha thihpui tlak sual chu tih chakin ka rilru hian minute tinin min thlem reng bawk a.

Keimah leh keimah 'gay' nihna inpawm kha a tir chuan a har lai ber a ni a, mahse ka it zawng ka hria a, ka duh ka hre bawk si. Ka beih chhoh dan zawng zawng kha tunah hian  ngaihtuah let tur pawhin chakna ka nei lo a ni ber, mahse tunah chuan inchhuang tak leh lawm takin in zavai hnenah kan sawi ang e, kei hi gay ka ni a, ka lawm a, keimah hi ka inhmangaih em em tawh a ni.

Hemi vanga ka tawrhna lam hi tlemte ka lo sawi ang e. Ruihtheihthil hi kum 20 ka tlin hma kha chu ka khawih chhin miah  loh avangin hetih hun lai hi chuan ka la fihlim a, mahse dam hian awmzia a nei khan ka hre thin lo. Vawi thum intihhlum ka tum tawh a, a hmasa berah chuan damdawi OD ka tum a, kan school-a naupang sualho (ti tawp mai ang) kha pawisa ka pe a, damdawi chi khat, an ruih thin kha ka leitir a, strip khatin ka ei zo nghal vek a, mahse engtin mah ka awm ta lo. Chutah chuan pawl 10 chauh ka la ni, ka rualpuite deuhsawhna leh hmuhsitna ka tuar zawng zawng kha tun thleng hian ka la inkhawngaih  A tum hnihna kha chu eng tiang chiah nge ka hre tawh lo, a tum thumna chu pawl 12 ka zir lai a ni a, chutah phei chuan Pathian thu-a ka inchiah thuk em avang khan dam tlaka ka inngaih lohna kha a nasa lehzual em em a, hruizen nen ka inpeih vek tawh a, mahse school-a kan zirtirtu pakhat in min lo phone a, zirlai chungchang te sawiin, ka laka an beiseina sanzia thu kha a rawn sawi a, ka thulh phah ta kha a ni a.

College te kan kal chho a, ka la dai ngai loh thil tam tak ka dai chho a, sawi tur pawh tam tak a la awm.  Mizo Gay Society bawlhhlawhzia atangin, mahse ni tin tleirawl/naupang tu emaw in group an rawn join ziah chungchang leh, kan Mizo hnama gay naupangte tân a an ṭhan lenna atana ka duh lohzia te, ka rawn la ziak leh turah ngai ila.

Hemi chin hi keima mimal nuna ka harsatna leh ka beihna te an ni ber a, ka lo tarlan duh chhan chu ka tawn ang, ka harsatna ang tawktu hi mi dang an awm ve tih ka hria a, chu mite chuan an mal lo a ni tih an inhriat ka duh a. Tin, mipui nawlpui pawhin ril zawka kan harsatnate min hriatpui chuan min thinhrikna leh min hmuhsitna te dah tha a, mihring ve tho, anmahni anga harsatna nei kan nihna hi an hmuh a, sel leh rel tel lova min en liam theih beiseina nen ka lo inphawrh mualpho a ni.

Hemi piah lam hi a tul chuan rawn tarlan a, Mizo Gay Community nihna te pawh tarlan theih ka inbeisei a, a chhunga keima nun ngei pawh. Mahse, mi dangte tana harsatna siamtu nih hi ka duh lo a, ka tum ber chu inpawm tawnna thlentu nih hi a ni a, he thu ziak hi in lo chhiar a nih chuan, nangmahni a zirin a hmasa berah chuan in mal lo tih leh, harsa mahse in paltlang thei tih kha hre turin ka duh che u a. Chuan, kan dinhmun min hriatthiampui lotute tan, nangmahni tawkah harsatna in nei ve tho tih ka hria, keini pawhin harsatna lian tak kan nei a, in khawngaihna dilin kan nun harsa tak hi min tih harsat zual saktu ni lo turin ka ngen che u a ni.

- Amber Renthlei

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]

EXPLORE MIZORAM

https://www.exploremizoram.com

email: admin@exploremizoram.com

FB: https://www.facebook.com/exploremizoramportal

Instagram: https://www.instagram.com/explore.mizoram

(Website leh a hnuaia fakna hi lo hmet ve rawh.)