COVID-19 KA VEI!

- Malsawmtluangi Chhakchhuak

Mumang te hi a ang ka ti thin. March 2020 atang tawh a ka lo vei em em, Covid-19 do nan tiin Hand sanitiser siam leh PPE thui tura ka thawhna Women’s Polytechnic, Aizawl a ka lo in volunteer ve na, chu hripui hlauhawm tak chu ka taksaah ngei ka lo kai ve chu a ni ta mai a. Ka hriat tirh (August 27, 2020) chuan min deng ve dawt mai.

Mi reng rengin thi mai tur thlah a min thlahliam hnu chuan Zoram Medical College (ZMC) ka va lut ve ta rawih a. Mak tak maiin, a hmunah chuan hlauhna a bo nghal daih mai, rilru damna ka chang nghal pang! Ka kaina ni a chhuizawn te nen room khatah kan han inhmu chu, “In downline ka nih hi, min lo duat viau rawh u,” ka han ti nghal thawr a, kan hlim chho nghal hle mai.

ZMC chu luh mai pawhin damna alo ni nghal mai a nih chu! Doctor leh nurse ten min en a. Min rawn khawih mai pawha kai ve theihna chance a tam dawn tehreng nen duat takin kan natna min enkawlsak hi a ropui ka ti em em a ni. PPE an inbel vek a, an hmel hriat hran theih an ni lo erawh chu a buaithlak ka ti ve deuh.

Vei atana kan duh loh ber mai hripui chu han vei takah chuan 'dam lo riau' ni a in hriat tum pawn kan dam em em mai si a. keimahni-ah symptoms engmah a lanchhuah loh chuan Hritlang pangngai pawh a hreawm zawk hial a hriat te pawh a awl rum rum a ni.  Pawn lam atanga kan hriat ang em em chuan a veite chuan kan manganpui ta miah lo mai! Kan kai dan lah hi sawi thiam a'n harsa em em a, reilote kan contact a kan kai mai kha, kan mutpui, kan chaw kilpui kan chhungte lah chuan an kai ve der bawk si lo. “A tlak tlak vanduai” tih chu a lo ni deuh a ni ang e.

“Lalpa, he hri hi ka lo kai ve ta a nih si chuan, keimah vanga kai thei dinhmuna ding list thui taka tlar te hi tumah kai tir ve lo ang che,” tiin Pathian ka kar ve tlat a. (Contact list a lang tur kan dawr tlawhtu register a inziak zat hi iRin Infomedia, Zarkawtah - mi 100, iRin Minimart, Mission Veng - mi 124 an ni). Pathian chuan a ropuina hmu turin hri hi min lo pe phawt chu niin, khimi inziak tlar zingah khian tuman an kai ve ta lo a ni. Pathian han ropuizia chu maw, tawngtaina thiltihtheihna chu a taka hmu turin Pathianin he natna hi min lo pe a lo ni si!

He hripui hi a tawp dawn lo. A damdawi pawh kan la nei thei lo. Kan taksa a luhna hi kan dang thei lo. Heng zawng zawng chungah hian Pathian kan nei tlat. Kan taksa a a luh chiah hian kan damdawi aia tha Pathian chuan hna a rawn thawk ta zawk thin a ni. Mizote hian Pathian kan nei, tawngtai i uar sauh sauh ang u.

ZMC COVID-19 kai te enkawlna tur bika kan damdawi in hi Mizo mipuiten tawngtaina nasa taka an hlan tawh a nih hi. A chhungah damna a awm a, Khum zawng zawng hi damna khum vek an ni.

Kan ram hruaitute leh kan mithiam doctor ten kan ram dinhmun mil tur zela kan zawm tur dan an siam hi a tha tawk a, i zawm zel ang u.

He hri hi a reh rih mai dawn lo. Chuvang chuan, Kan fimkhur belh zel a ngai. Kut silfai leh social distancing hi a la pawimawh zel ang. Theihthawpa kan fimkhur chung pawha he hri kan lo kai palh ta a nih pawhin vanduai bikah inngai lo ila.  Heti zawng hian ka ngaihtuah a, He hri kan kai vanga mi ten min tawngtaipuina hi kai lo ila kan dawng dawn lo.

Hri veiten, a chhunga kan induhsakna leh kan tawngtai hona hman thin ringawt pawh hi a hlu em asin. Ward chhungah te exercise kan han la suau suau mai bawk a. Inhmu ngai miah lo turin inhmuin, Inhre ngai lo kan inhria a, thian leh hmelhriata kan insiam te kha a hlimawm dangdai ve a sin. Ei turte pawh a zo a vaiin kan han inban tawn vek a. 'Sem sem dam dam ei bil thi thi' nun kha kan tem! A kaite, a pu darhtute hi dem mai lo ila, tuman duh vangin an kai bik lo a nia.

Hawh u, Chiai pui mai lovin, COVID-19 nena lenho thiam hi i zir tan ang u!

Post a Comment

0 Comments