UPSC Civil Services Exam 2019 Topper Lo neitu fapa Pradeep Singh

Aizawl | August 4, 2020: Vawiin hian UPSC in Civil Services Examination result a puang a, chuta pakhatna chu thingtlang lo neitu fapa Govt Primary school chhuak a ni a, beidawn ram ram chang pawh a nei, mahse taimakna, tumruhna hmangin a tum tak IAS chu a sual chhuak ta a ni. Mizo IAS nih tum tuna bei mek leh naupang zawk te fuihtu a nih tak hlauh in ka rawn chhawp chhuak ve leh thawr a nih hi.

Pradeep Singh, Haryana state chhunga Sonepat district a mi chu UPSC Civil services exam 2019, results  vawiin Thawhlehni a puanah khan pakhatna a ni. Pradeep hian  UPSC civil services exam  hi kum hmasa lamah khan a lo zo tawh a, tunah hian  Indian Revenue Service (IRS) training-in Faridabad, Haryana ah a awm mek a ni. 

Pradeep Singh pa  Sukhbir Singh hi Sonepat district a thingtlang khua Tewri ah VC (Sarpanch)  Ganaur block hnuaiah a ni tawh a. A pa hi VCP  (village Sarpanch) vawi hnih a ni a, a pu hi vawi khat a ni bawk. Pradeep Singh nu leh pa hi  Omax City, Sonepat-ah an awm mek a ni. 

Pradeep hian a sawi dan chuan a pa lo neiha ei zawng  hian IAS ni turin a rilru a hneh hle tih a sawi a, a ni pawhin lo neitute hamțhatna atan he hna hi thawh ngei a duh thu a sawi bawk. 

“Ka inbuatsaih lai hian nitina ka tum ber chu zir tur huam chhunga mi a tam thei ang ber zir a ni. UPSC  Exam-a hlawhtling tur hian thawk lehkhata beih phut hi a ni lo a, țhahnemngai taka beih tlat leh tlawm mai mai loha tlo tak leh chhel leh taimak tlat hi a phutin a ngai hle a, kei pawh hi a chang chuan taima leh chhel tawk lo hle hian ka inhre țhin a, ka bei te hi a dawng rum rum a, chutiang hunah tak chuan ka nu leh pa hian taima tur te, chhel tlat tur leh paukhauh tlat tur hian min fuih țhin a ni. Ka pa hi thingtlang khua a awm lo neitu mai a ni a, ka nu lah thiamna nei chuang lo in lam hna thawk ve mai bawk a ni a, chhuan tur reng kan nei lo, " a ti. 

“ Graduate ka nih hnu hian Staff selection commission (SSC) exam buatsaih  exam turin (exam pe tur ni loin) coaching class ka kal a, ka hna hmuh hmasak ber chu kum 5 kal ta khan  Income Tax officer, Delhi a thawk turin a ni a. UPSC exam hi vawi li lai ka hma chhawn tawh a, nikum khan 260na ka ni a, IRS pek ka ni a, tunah hian  Indian Revenue Officer niin Faridabad ah chu hna chu ka thawk mek a ni”, a ti. 

Pradeep Singh chuan hna thawk chung exam harsa ber zinga mi hma chhawn tura inbuatsaih chu a hautakin harsa a tih hle thu a sawi bawk. 

“Hlawhtlinna nei tur hian ka țhian țhenkhatten min pui nasa hle a, coaching class  kal lo a mahni  inzir  hlawhtling ka ni a, thawk khat lai phei kha chuan ka bei hi a dawng rum rum a,  IAS ni tura inbuatsaihna zawng zawng pawh chawlhsan vek ka tum hial a, mahse ka pa chuan dawh theihna leh taimakna țha zawk nei turin min fuih a,  hautak hle mahse, taimak chhuah  lehzual sauh tur chuan keimah leh keimah chu ka infuih mawlh mawlh hi a ni ber a, zir nasa, bei nasa hlea inhriain keimah leh keimah chu ka lo in khawngaih hman hle a lo ni a. Chu phuarna hrui chu sat chatin ka tum ram thleng ngei tur chuan mahni chu ka infuih phur (sel fmotivation) chho țan ta a, chu chu ka hlawhtlin theihna tura thil țangkai ber niin ka hre hial a ni. Midangten  thil tam tak a harsatzia thu te, tlin a har thu te an sawi  țhin hi hlawhchhamna kawng anih avang ngaithla duh hlek suh, mahnia theihna awm hai chhuak theitu chu midang ni loin mahni tho hi kan ni a, chumi hai chhuak thei tur chuan huaisen, taimak, chhel a ngai a ni, " a ti.

UPSC topper Pradeep Singh  hian pawl 7 thleng chu an khua Tewri Government School ah a zir tih a sawi a, hemi hnu hian an chhung chu Sonepat ah an pem a, class 12 hi  Shambhu Dayal modern school, Sonepat ah kum  2008 khan a zo a, Engineering Graduate chu Murthal University, Sonepat ah kum  2012 khan a zo leh a ni.( A school, College zir chhuahna hi India ram huapa zirna țha ber zingah zawn pawhin a vang khawp mai).

Pradeep Singh pa Sukhbir Singh thingtlang khaw te zawk ațanga kum 2000 chhoa Sonepat khawpuia a chhungte a pempuina chhan chu a fate zirlai a ngaihtuah vang anih thu a sawi. 

“Pradeep  hnenah hian IAS ni thei tura nasa taka chawl loa inbuatsaih turin ka fuih țhin a, a lehkha zirna tura harsa taka sum ka thawh chhuah dan te hre reng turin ka fuih mawlh mawlh reng a. Tunah chuan he ka fapa hi keimah mai ni lo, Haryana state chhuan a lo ni thei ta a ni. Vawiin khan UPSC  in result an puang tih min hrilh a, Mama eng nge i result tiin ka zawt a, ka bulah lokal hnaiin min rawn kuah a, India ram pumah pakhatna a nih thu min hrilh a, ka lawmin ka va han hlim tak em!  Lo neitu leh kut hnathawktu (all farmers’ and labourers) zawng zawng hrilh chhuah vek ka duh chu an fapain nihna hlu tak IAS dinhmun a luah ve ta a ni tih hi a ni”, a pa chuan a ti. 

"  _Tun thleng hian UPSC Civil Services Exam-a hlawhtling tur hian thawhrimna nena thleng theih a la ni reng, mahni in khawngaih miah lo a, theih tawp aia nasa chhuah a ngai țhin_". 

-Clement Liankunga (L) 

IAS Rtd. 

Source :

Hindustan Times 

August 04, 2020 

@ 17:38 IST 

====04==08==20==

Huna Kawlvawm