HSSLC Arts result-ah tihsual awm; Topper pahnih Christina Lalchhandami leh Lalhlimpuii an awm!

Aizawl | July 18, 2020: Mizoram Board of School Education (MBSE) in July 14 a Higher Secondary School Leaving Certificate (HSSLC) result a tihchhuah-ah tihsual awmin, Arts stream Topper pakhat atangin pahnih an ni ta!

He thu hi Mizoram Board of School Education (MBSE) chuan thuchhuah siamin an tarlang a. HSSLC result chhuakah, Arts stream result tihsual palh an neih thu an tarlang.

Mark 500-a mark 454 hmutu, Lalhlimpuii d/o Vanlallura, St Joseph Higher Secondary School Aizawl chu a mark belh that a nih hnuah pakhatna dinhmun hauhtu ni a puan hmasak, Christina Lalchhandami, Greenland Higher Secondary School Aizawl nen an mark hmuh a inzat a. Heti hian Arts stream-ah pakhatna dihmun hauhtu pahnih an awm ta a ni. MBSE chuan an tihsualah pawi an tih thu sawiin mipuite hriatthiamna an ngen a ni.

HSSLC Art Stream To-10 result tihdanglam leh tak chungchangah MBSE Chairman Pu Lianhmingthanga chuan, "Re-evaluation kan nei a, photo copy kan lo dil a, chumi atang chuan rinhlelhawm  hi kan hmu ta a ni. Candidate kha a mark dinhmun kan han en a, subject danga a mark hmuh aiin a complaint subject hi a hniam hle a, Geography-ah 59 chauh a hmu a, a dang zawnga mark 90 bawr vel vek a hmu si. Pakhata a hniam bik lutuk kha a rinhlelhawmin kan hria a. Mithiam kan endik tira, an mahni lecturer mi pahnih a hrang ve ve a endik tir an nih hnuah a endik hmasa zawkin nasa takin a ti sual ngei a ni tih an hmu ta a ni" a ti.

MBSE Chairman, "MBSE-in dan kan lo neih angin result tihchhuah tawhah thildanglam a thleng leh thei a. candidate failed tawh pawh a lo pass thei a, Chuti a nih mek laiin merit list-a a thiam sawm thlan chhuah puan tawh zinga pakhatna chu tih danglam theih a ni lo thung. Candidate-in re-evaluation result-a a mark hmuh kha rank holder tu pawhin a mark dang nena a lo in tluk emaw a lo sang zawk a nih chuan candidate hi joint holder-a mark hmuh chu top 10 a lo awm sate hnaih berah, a chung lamah emaw a hnuai lamah emaw joint holder in a awm thei ang, tih dan a awm. Chumi dan hmang chuan HSSLC-a pakhatna dinhmun luahtu nen an mark a intluk ta a. Top ten merit list ti danglam si loin pakhatna nen joint holder hmangin pakhatnaah kan puang ta a ni" a ti. Hming ziah dan pawh hawrawp indawt dana ziah niin tuna mi hi a hnuai zawkah dah a nih thu MBSE Chairman chuan a sawi.

HSSLC Art Stream-a pakhatna-a puan tak Lalhlimpui d/o Vanlallura, Darlawn khua, tuna Ramhlun Venglaia khawsa mek chuan Geography subject a chhan dan atangin mark 59 chauh hmuh theiin a inrin loh avangin, geography subject a chhanna chu ennawn an dila, chumi atang chuan a result a danglam phah ta a ni.

Topper a puan thar leh tak Lalhlimpuii hi pawl 1 atanga pawl 5 thleng a mit a that loh avangin Durtlanga Special Blind school-ah a kala, chumi hnuah Presbyterian English School, Darlawnah zir zawm lehin pawl 10 thleng Darlawnah a kala, pawl tinah pakhatna a hauh chho vek a ni. St.Joseph HSS-ah kal lehin hetah pawh hian pakhatna a hauh chho leh vek bawk.

Lalhlimpuii hi a mit a tha lo hle a, tarmit hi -10 power vuahin a lehkha chhiar dawnin tarmit nena tangrual chung pawhin a hnai thei ang berah lehkha a chhiar a ngai a. Lehkha a ziah dawn pawhin hnaiteah a en angai thin. Chutiang khawpa mit khawhmuh lama harsatna a nei chungin heti ang result tha a nei thei hi a lawmpuiawm zual a, a tumruhna leh thawhrimna hi a ngaihsanawm em em a ni.

Darlawn Joint YMA chuan thuchhuah siamin Lalhlimpuii  HSSLC Exama Mizoram pum huapa Topper a tling chu an chhuangin an lawmpui thu an tarlang a, Darlawn khaw ti hmingthatu a nih avangin an chhuang takzet tih tarlangin a kal leh zelna turah duhsakna sang ber an hlan nghal bawk a ni.

1 Comments

He post chungchanga i ngaihdan lo sawi ve rawh:

  1. Lalhlimpuii chu a lawmpuiawmin a chhuanawm hle mai. Mit lama harsatna nei chunga hetiang dinhmuna ding thei tura a taimak dan tur hi suangtuah phak bak thil a ni hial zawk e.

    ReplyDelete

Post a Comment

He post chungchanga i ngaihdan lo sawi ve rawh:

Previous Post Next Post