Middle School Leaving Certificate (MSLC) siam thar leh tum a ni - School Education minister Lalchhandama Ralte,

Aizawl | July 18, 2020: School Education Minister Lalchhandama Ralte chuan Middle School Leaving Certificate siam thar leh tum a ni tih  Ratu Higher Secondary School Building sak thar hawnna-ah a sawi.

Minister chuan Rs 28,05,869/- senga sak Ratu Higher Secondary School Building thar hawnna a a thusawiah, kan ramah tun aia mumal zawka zirna a kal theih nan sorkarin hma a la mek a, thil thenkhat thlakthlengte pawh a awm a,  kan zirna hi national standard tling pha tura ruahmanna te pawh a awm a ti a. Zirna quality siam that nan hun reiloteah Middle School Leaving Certificate Examination siam thar leh tum a ni a, school inspection pawh mumal zawka kalpui anih theih nan ruahmanna siam a ni a ti bawk. Pu Lalchhandama Ralte chuan khawtlangah zirnain hmun sang a channa hmunah chuan zirna quality a tha thin a ti a. Kan ram zirna hmun leh compound te chu khawtlang hruaitute leh nu leh paten vil ngunpui a, tuaihnum a pawimawh thu a sawi a, zirna chu sorkar kutah ringawt dah chi a nih loh thu leh mipui nen tanrual a tul thu a sawi bawk. Minister chuan hmar tlangdung thim tieng turin zirna a pawimawh tih sorkarin a hria a, Science zirna te pawh dah belh a ni a, zirtirtu pawh thahnem tak dah belh a ni a ti a, heng sorkar hmalakna te hi a hmang tangkaitu ni turin tlang dung mipuite chu a sawm a ni.

Pu James Lalrinchhana Director School Education pawhin he hunah hian thusawiin tun hripui leng mek avanga school hawn theih loh chhungin class I-XII zirlaite awm awl mai lova an awm theih nan SCERT leh MBSE ten Week wise plan an siam a ni a ti a. Hengte hi school hawn theih hunah assessment atan hman a nih dawn avangin nu leh pate pawh an fate lo ngaihvenpui turin a sawm a ni.

Ratu Higher Secondary School hi Lump sum Grant in aid a ni a, zirlaite hi Ratu khua bakah khaw thenawm Lungsum, New Vervek leh East Damdiai atangtein an kal a, kum hluiah khan zirlai 42 an nei a, hripui leng karah kumin session-ah hian zirlai ngah zawk an beisei.

School building thar hawn tak hi office 18x24ft leh Class room 18x24 pahnih a ni a, zirlaite hman tur inthiarna 3 leh thawktute hman tur a awm bawk. Building thar sak nan hian Rs 28,05,869/- hman a ni a, school kawt zawl cement a zut mam anih bakah waiting shed sak a ni bawk.

Minister hian Ratuah hian Swach Bharat Mission (Grameen) suma sak Vantlang inthiarna a hawng bawk a, vantlang inthiarna hi cheng nuai 6 a sak a ni a, mipa leh hmeichhia  inthiarna a hrangin siam a ni a, a sirah dawrte siam a ni bawk a, dawrte hi a luahtuten a thlawnin an luah ang a, inthiarna enkawl hna an thawk thung dawn a ni.

Ratu Higher Secondary School Building thar hawnna inkhawmah hian kumina HSSLC Examination pass tharte lawmna hun hman a ni bawk a, pass tharte hi chawimawina thuziak leh parthi te hlan an ni.

Building thar hawnna School kawt zawla neihah hian Minister hi Pu Malsawma Darngawn Chairman SHC, Pu James Lalrinchhana Director School Education, Pu Lalhmachhuana SPD Samagra Shiksha, Pu Ramthianghlima DEO Aizawl leh MNF General Headquarters hruaitute leh Block hruaituten an tawiawm a. Hawnna inkhawmah hian Ratu khuaa sorkar mi pawimawhte, khawtlang hruaitute, zirtirtute leh zirlaite an tel a ni.

- DIPR