ZSE TIH DIKNA

Zofa Society of Emirates (ZSE) Executive Commitee 20/June/2020 chuan, A hmasain kan thuchhuah min lo hlutsak a, min lo chhuizui saktute chungah kan lawm a. UAE a maids thawn chungchangah hian PR mumal tak kan lo siam tawh a, ngaihsak a hlawh lem lo a, tunah beisei phak loh khawpa țhain mipuite leh sawrhkar lama hotu țhenkhatte beng a thleng ve ta hi kan lawm hle a ni. Hei hian rah țha chhuah se, hun lo kal leh turah dik leh felfai zawka thil a kal theih phah ngei kan beisei tlat a ni. 

Chutih laiin kan thuchhuaha hming lo lang DANMAWIA, SAIKHAMAKAWN VENG tih a veng hming hi a rawn thawnthlakte hnen a țanga kan hriat dan a ni a, mahse, SAIKHAMAKAWN VENG LOCAL TASK FORCE te'n rang taka min lo bawhzui sakin DANMAWIA hi an vengmi a ni lo va, a veng hming mumal hriat a ni ta lo a ni. A lo thawnthlakte hriat dan pawh a in ang chuang lo. Hemi chungchanga SAIKHAMAKAWN VENG hming kan lo tih hliauna ah pawi kan ti a ni. Tin, min thawhpuia kan thu hla min lo ngaihvenpui a vangin kan lawm em em bawk. Chuti'ang bawkin DIVINE MERCY REPUBLIC te hian maids an thawn ngailo niin an rawn sawi bawk a, An hming mawi tak kan lo thailan tel a vangin pawi kan ti.

Zofa Society Of Emirates (ZSE) hian tihtheih tlem hle mah se theih ang angin kan mizopuite kan ngaihsak ve țhin a, kan hnampui, kan unaute dan hrulah thudik chanve nena DUBAI hna tawktarh an ni fo hi pawi kan ti a, Chuti'ang dan dik tawk lo va mizopuite bum țhin mite chu theih tawpin a do zel dawn a ni. Mizo țhalaite a tam thei ang ber lo kalin hnate thawk ve se kan duhsak em em a, chutih rualin kan hnathawk tur zirchiang a, hrechiang hmasa țhin turin kan chah duh che u a, Mizoram sawrhkar leh mipuite pawh min thawhpui turin kan sawm che u a ni. Kan lawm e.



Zofa Society of Emirates
Vice President: Lalrosiama Hauzel
Secretary: Lalchawimawii


| DUBAI HOUSEMAID AH LO KAL DUH SUH! |

Link @ https://www.exploremizoram.com/2020/06/dubai-housemaid-ah-lo-kal-duh-suh.html

Post a Comment

0 Comments