TÛN KÂR CHHÛNGA MIZORAMA THIL THLENG LANGSÂR ZUALTE

Buatsaihtu: V Kungtea

Email: kungteavandiau0785@gmail.com

June 14, 2020: ZMC-ah sample 682 test ațangin positive 5 hmuh belh a ni a; Delhi ațanga lo haw, Mamit district-a chêng, hmeichhia kum 21-23 inkâr, quarantine facility-a awm, symptoms nei lo vek an ni.

June 15, 2020: YMA DAY vawi 85-na a ni a, Covid-19 hri lêng vângin kum dang angin hman theih a ni lo va, a remchân dan angin hmun hrang hrangah hman a ni.

• ZMC-ah sample 705 test niin Covid - 19 positive 4, mipa 1 hmeichhe 3 hmuh belh an ni. Kum 24-30 inkâr, Aizâwl district-a chêng; quarantine facility-a awm, symptoms nei lo vek an ni.

• Ngaih hai avângin Tualpui nula B.Lalhlimmâwii chuan Pu Laldawngliana kut a tuar. Laldawngliana hian a nupui emaw tiin zân dâr 7:30 vêl khân chempuiin a sât a, a hmaiah hliam na tak a tuar a, Champhai hospital panpui nghâl a ni.

*17.06.2020:* ZMC-a mi 615 en dik zîngah mi 9-in covid - 19 an kai tih hmuh chhuah a ni.

• Zân dar 8:00 bâwr vêl khân Zyhno (Zâwngling) khua Pu Alabasta in sak zawh hlim la luah loh chu lei minin a hnâwl.

June 18, 2020: Lunglei Ramthar BCM biak ina khung hran mêk hmeichhe 8; hri an kai leh kai loh en dik tûra sample lâksak tawh, an test result chhuah har lutuk avânga chaw ngheite sample chungchângah thil fel lo a awm avângin sample lâk țhat leh a ni.

• Chawhma dâr 10:30 khân Champhai Zion Vênga mipa naupang kum 9 mi (?), pâwl 3 zirlai chu a inâwk hlum.

• Tlai lam (?) khân Pu R. Lalnunzira, Zobâwk Vêngthar chu a fapa Lalhriatpuia (27) nên intibuaiin a fapa hian chemtêin a hnung lam ațangin a vit a, damdâwi in thlenpui a niha oxygen te pek a nih laiin a boral. A pain kut thlâk a tum; chumi a invênna lama a lo vih palh nia sawi a awm bawk.

June 19, 2020: Champhaiah pafa,  Singngaihsuta, kum 57 leh a fapa Pausawmthanga, kum 28-te chu kum 2015 November ni 29 zanlai pelha Champhai Vêngthara an fapa thi tawh nupuite chhungkaw chênna in hâl thubuaiah thiam loh chantîrin Additional Sessions Judge, Pu R.Vânlalena’n Video conferencing hmanga an thubuai ngaihtuahin dam chhûng hrehawm taka jail tâng tûr leh pawisa chêng 8,000/- ve ve châwi tûrin a hrem. He an in hâlah hian a chhûnga mu, naupang kum 2 leh kum 5 mi bâkah an pi an kâng hlum.

• Tun thla tîra Covid -19 positive hmuh chhuah, Zoram Medical College-a enkawl, Kolasib district mi 6 leh Aizâwl district mi 2-te chu dam felah puan niin ZMC an chhuahsan.

• Tûn thla June ni 1-a a chin hriat lohva bo, Pi Zobeli (61) chu Tlawng hnâr lam Bairabi ațanga KM 10 vêla hlaah a ruang hmuh a ni.

• Mizoram aiawha Rajya Sabha-a ṭhu tûr Member of Parliament thlanna Assembly House-ah neih a ni a, member 40 zingah 39 in vote an thlâk. Vote tlate hi tlai lamah chhiar niin MNF party candidate Pu K.Vânlalvêna (50) chu vote 27 hmuin tlinga puan a ni.

• ZMC-a sample process 954 zîngah Covid - 19 positive 10 (M-4, F-6) hmuh a ni.

• Covid - 19 hripui laka Mizoram vêng him tûra ramria duty laia che suala hliam tuar, Pu Lalpianvula (65) h/o Lalchhanhimi, Zâwlnuam Bawrai vêng chu zân dâr 7 vêl khân Aizâwl civil hospital-ah a thi.

June 20, 2020: Champhai district-a mi Delhi ațanga haw June 8-a Covid - 19 kai mi 5 zînga 4 chu Covid - 19 an kai tawh lo tih finfiah an ni. Fîmkhur thilah recovery ward-ah ni 7 enkawl an la nih dâwn bakah an sample țum khat en dik leh an ni ang. Hetih lai hian Covid - 19 kai thar 4 hmuh belh a ni.

• Hemi ni tûk hian Dr ZR Thiamsânga, MLA, Vice Chairman, Health & Family Welfare Board chuan Champhai police station-a CCTV 6 leh Khankâwn police check post-a 3-te chu țangkai taka hmang tûrin Champhai police station-ah a hawng.

# He thu buatsaih lai hian Mizoramah Covid - 19 vei enkawl lai mi 132 an awm.

Thlalatu: Armand Malsawmdawngzela