DUBAI HOUSEMAID AH LO KAL DUH SUH!

- Lalrosiama Hauzel,

ZSE Vice-President Dubai

Dubai hi UAE-a an khawpui pakhat a ni a, Abu Dhabi hi an ram Khawpui ber chu a ni. A ram neitu hi Arabic(Muslim) an nia, mahse an ramchhunga awm tam zawk chu ramdang a țanga kal khawmte kan ni.Hmun hrang hrang a bikin: Mizoram, Myanmar, Manipur,Meghalaya leh hmun dang a țangin Zofate kan kal khawm ve nual a. Zofa hnam hrang hrang te chu kum 2008 khan insuihkhawm in a hmingah “Zofa Society of Emirates(ZSE)”, tiin a hming kan vuah a,’Summer leh winter meet’ nuam tak kan hmang thin.

Kum hnih kalta vel atang khan Mizoram atangin Housemaid(Mi Awmpui) an lo chhuk ta zeuh zeuh a, an dikna chanvo rap beta dawt hmanga Mizoram lama Agency anga in chhal ten an rawn bum thla a,buaina an tawk ta fo mai. Dubai a housemaid lo kal lo turin ngenna 2019 khan ZSE hmingin PR te kan siam tawh a nih kha . An chanchin leh a lo thawn thintu (AGENT INTI)te'n an bumdan hi an mahni sawi ngei kan rawn tarlang dawn a ni. Tute nge lo thawn a enge an bum dan leh an rawn tirh thlak dan hrang hrang an inpuanna lungchhiat takmai kan rawn tarlang dawn a ni.

Dubai-ah Housemaid-in eng vangin nge i lo kal loh ang :

Housemaid hrang hrang ZSE memberte kan kawm kuala, tunah hian hriat theih chinah mi 25-35 aia tlemlo an lo chhuk tawh a, an harsatna tawh hi a in ang deuh vek a ni.Harsatna em em tawk lo tlem te an awm ve mai thei, mahse an zavai in harsatna sawitur an nei deuh vek an mahni tawrhchhel loh vang leh sual vang a ni lemlo bawk. Thenkhat phei chu an mahni awmna ten kut an thlak mai bakah hmeichhiat mipatna hmanpui tumtu pawh an awm a, an khawngaihthlak awm hle. Mahse, chhantu tur an neilo a sin! An lo kal hma in heihi lo hria in an mahni lo thawntute pawh hian thudik tak hrilh hmasa se kan duh hle.Chhungkaw harsatna a vanga pawisa thawk chhuak tura lokal si, harsatna an tawrh belh chhah ai chuan kal lo tur leh hrechiang hmasa turin ka rawn ngen zawk a ni e.

 

Housemaid lo awm tawh te chuan ti hian an chanchin lungchhiat thlak tak mai chu an rawn sawi a:

“A hmasaber in Dubai housemaid chungchang hi kan lo hre ve nual tawh in a rinawm a, mahse a tam zawk chuan thudik leh a kal hmang dik tak kan hre lovin a rinawm. Kei ngei pawh hi Dubai-a lo tawng a, lo hre ve tawh tu ka nih avang in an sawi ang leh a hmun a an kal hmang țhenkhat in anglo tak tak te ka rawn sawi dawn a ni.

Dubai housemaid tih hi advertisement a kan lo hmuh a kan hriat dan tlangpui a ni a mahse hei hi thudik tluantling a nilo, Dubai a awm hi chu za a pakhat bak kan nilo. Dubai chhehvel Sharjah, Ajman, Abu Dhabi, Sharjah, Al Ain, Ras Al Khaimah (RAK), Fujairah, Muslim Sahkhhuana la kulmuk deuh deuhte zingah kan awm a, chung ho chu United Arab Emirates (UAE) ram kan tih chu a ni. Dubai an tih hi chu mi hip nan leh kan Mizo tam zawk an thawn thlak theih nan a an hmanraw pakhat mai a ni. Kan lo hre lawk lo va a pawi takzet.

Dubai a housemaid hi chu a hlawk a loan a awmlo an han ti ngei bawk ang a, thu dik chu a ni ngei mai mahse UAE i thleng thla ang a.Min buaipuitu turin anmahni(Agent) inluah hreawm leh chep tak Ajman (Dubai ah pawh kan awm phak lo) ah min dah lailawk phawt a, a hmasa berin mi ram kal nan leh kan himna kan ralthuam neih that ber kan Passport leh Mobile phone min laksak nghal vek a. Room chhungah mi an khungkhawm tawp mai a, tihtheih pakhatmah kan nei si lo, a hreawmin ngaihtuahna a kal thui nghal hle. Mihring mihrinna ah chuan kan bulțan dan chu aw tiin mahni khawvel pawh tawptir mai a duh awm rum rum mai a lawm. A chhan chu hetiang teh tawp a foreign thlen tirh a kan chhungte pawh be theilo a han awm nghal kha chu a tawngtu chauh lo chuan a hreawm zia in hrethiam pha lovang. Chutah anmahni phone hmangin kan chhungte min call tira mi pakhat bak kan be theilo a, a rei berah minute nga bak kan inbe theilo bawk.

Kan thlen tuk ațang in Labour's Recruitment Office(Hna latu leh a zawngte in tawh khawmna, Ajman) ah chuan min kal pui in, chu tah chuan kan employer (Min awmpuitu) tur te kan lo nghak kan ti thei ang. Office ah chuan mi chi hrang hrang lokal in kan zingah an duh an rawn thlang mai thin a ni, ‘Min zuar’ a nih ber chu(haha). Min lei duhtu kan han hmu a an in ah ni 4 trial (Endika thawh chhinna) nei tur in min hruai a, chutah fel leh tling min tih loh chuan ni 4 hnu ah office ah min dah let leh dawn a ni. Kan experience leh kan fel dan a zirin kan man a sangin a hniam bawk (Heta min hralhna Commission hi UAE Agent chuan Mizoram lama min bum thlatu te an sem thin, mi pakhatah sing ruk atang Nuaikhat chuang vel mi pakhatah an lakluh ka ring, a zat chiah chiah erawh ka chianglo). Dah let kan nih chuan min buaipuitunu thinrim hmachhawn kha a ni mai, a hlimawm viau lo. Min hmangaihtu nu leh pate an ngaihawm vawng vawng țhin.

A bikin Mizote hi kan khawngaihthlak lehzual a, English emaw Hindi kan thiam mumal bawk silo a, min ruaitu tur employer pathum chuangin min hnawla min dah let chuan, kan Madam Sumi (Nepali Nu UAE Housemaid Agent min buaipuitu) chuan kan visa a zawhtep tawh thu leh chumi hma a Employer kan hmu loh chuan police hnen a a pek tur thu in min vau nghe nghe a ni. Mizorama haw kan duh a nih phei chuan an pawisa sen zawng zawng kha kan pek let leh a ngai a, kan ba kan rulh chuan kan haw theih tur thu min hrilh nghe nghe.

​

Kan employer te chuan ni 4 trial zawh hnu chuan kan phone leh wifi min pek tur thu an sawi a mahse wifi min pe lo leh phone kawl tur phallo employer pawh an awm nual a, eitur pe tha lo leh rilțam ngawih ngawih a awm pawh an tam hle a ni. Wifi leh ei tur min pek that loh phei chuan hlawh min offer ang ni ta bawk silo chu hlawh tlem nen a buaithlak duh hle. Fapa tlanbo ianga midang te chaw tui ti tak ei lai hmel hmuh hreawm zia chu, i fate chanah han dah la i lungawi bik dawn em ni?

Employer accommodation ah thla thum emaw a aia tam ilo awm ta a eng emaw rokhawlna thil leh i haw chak vang hrim hrim pawh nilo in haw thut lo ngaiin haw lo tum ta la, i employerte hnenah i visa man leh i chung a an pawisa sen ang hu i pek let leh vek a ngai dawn a ni. A tlangpuiin dirham 6000-17,000Aed(India pawisa120,000-340,000 Rupees vel a nia), chu tak chu kan buaina a ni leh ta a, pawisa min phut ang kan pek loh chuan agency a let kan dil a nih pawn an phal kher lo. Pawisa min phut lo a Agency a kan lo let a nih pawn kan rama haw tur chuan kan aiawh tur housemaid-dang hmundang atangin kan chahthlak a ngai a, a khirh hle, duh hun huna haw ngawt theih a ni lo.

Mizoramah agency nilo facebook leh whatsapp hmanga direct a min chahthlatu te hi an hlauhawm a, midang an chahthlak duh avang in thudik pawh sawi ngam lovin dawt hmang in kan mizo puite ngei an chahthla ta thin a ni. mahni ram a haw duh si, mahni intlanna tur sum nei silo a direct a Labour's Recruitment Office ami te nen a in thurual a, harsatna pawh sawi duhlo a midangte chahthla thin pawh housemaid zingah an awm a ni. housemaid an leina sum ah pawh chan(commission) an nei ve a tichuan kan ram ah pawh awlsam te in an rawn let ve leh thei bawk a ni(Human trafficking an sawi thin kha kan lo tawngreng a lo ni).

Tin, heng Mizoram Agency te leh mimal agency ang a in chhal te hian buaina kan tawh hian min țanpui thei lo tawp chu ka ti theilo mahse tih theih an nei tlem hle tih erawh kan hriat tlan a țha. Mimal agency ang a inchhal te phei chu min buaipui ber angin an lang na a, a hun takah chuan call an pickup theih loh leh message an reply theilo a, an busy nitin hi a nimai lo fimkhur mawlh teh u. Mizorama Agency ho pawh hi an bang chuang lo, an nau ten harsatna an tawh in țanpui a hnek in midangte hnen a thudiklo thehdarh ah te puh in an warning ta zawk țhin a ni. An buaipui ve hi chu tlem te tak tak a ni. UAE office lam biak sak in an harsatna an sawi sak a, mahse eng teh ual an ang ngailo. Harsatna min sutkian sak ngai loh avangin kan biak pawhin beidawn tihreh nan a hming a va biak ve mai mai a ni ber e.

A pawimawh ber work visa ni lovin visit visa in min thawn thla a,diklo takin Airport immigration atangin bul min tanpui a, employer kan hmuh chuan visa chu min siam țhatsak leh ta chauh țhin a ni. Chuvang chuan Mizoram agency emaw mimal agency ang a inchhal te pawh hi rintlak an awm lo hle a ni. Dubaia maid kal turin India sawrkar in Maid visa an process duh tawh lo va, maid harsatna tawk buaipui sen loh khawpa tam an awm a vangin.

  

 

A bikin heng a hnuai a mi te hi Mizoram Agency inti hovin min bumna tlangpui a ni a, sawi dawn chuan a tam a mahse kan sawi vek seng silo a. A tlangpui hi tarlang mai ila:-

1.In Visa chu Delhi velah chauh a lak theih a office ah in thlenthlak hunah i lam angai an ti a. Delhi ah chuan work visa nilo in tourist visit visa min pe.

2. Visa leh ticket buaipui man kan tum vek ang an tia, heihi dawt vek a ni. UAE lama an agent te tum sak a ni zawk e.

3. Hlawh tam thei ang ber min offer a kan hlawh tak chu tlem te.

4. Offday min offer țha hle a, a hmunah chuan No offday a ni tawp mai.

5. Eitur leh pawimawh engkim min buaipui tur thu an sawi a,mahse eitur neilo leh rilțam a awm an tam hle. Mi zawng zawng chu an ni kher lo.

6. Kan employer te an tha lo a nih chuan agency ah kan let thei an ti a, mahse let leh hi chu thil harsa tak a ni. A theih loh ang tluk a nih chu.

7. Thenkhat chu beauty saloon emaw spa lamah in thawk dawn nia tiin an thlem thla bawk, mahse UAE an thlen tawh chuan duhthlan tur reng a awmsilo, hrilhhai thlak takin maid ah an nawrliam ta thin.

8.Contract te hi kumkhat inthawk chhin ang a experience neihnan an tia, in duhloh chuan a haw theih an tia,dawt vek. Contract kum hnih a nia, mahni duh duh dana tihdanglam theih a nilo.

9. Loan rulh a ngailo haw duh chuan mahni pawisa in tum a haw theih ni ang in an sawi a, mahse he thu hi chu dawt a ni. Haw duh chuan visa man flight ticket leh thildang a an in sen na zawng zawng kan rulh let leh vek phawt a ngai.

UAE lam a kan awm chhung a housemaid kan chahthlak hnem viau chuan Labour's Recruitment Office lamah an thu ve thei dawn niin alang kan thiante sawi danin. Mimal pawisa engmah an sen ve angai lova, mi lo zawn tawp kha an hna ani a, pawimawh engkim chu UAE office lamin an buaipui vek.

Tichuan, UAE housemaid hi ramdang ang a nilo, kan employer te hi Muslim sakhua leh hnam chapo tak ni in an tawrh hlelhawm in an thin a chhe hle bawk. Hlawh pe țha duh lo an awm nual a, țhenkhat phei chu thla tam tak an awm hnu pawn phone kawl pawh phal lovin an kawlsak tlat. Zingah hma tawk ah min kai tho a, zanah dar 12 hnu lamah te kan mu chauh a. Mut hun tlem bawk si rest hun payback neih loh nen chuan kan in sal chhawr hi kan tilo theilo. Chu mai a ni lo hmel leh pian nalh chu thu hran nula/hmeichhia hrim hrim chu mi hi an it ngawih ngawiha hun tha neiha min awmpui tlat an tum thin bawk”, ti in a thil tawn hreawm tak an lo paltlang tawh chu hreh leh harsa ti tak chungin an sawi a.

Keini, Zofa Society of Emirates chuan kan hnampui housemaid a lo kalte kan lainat takzet a, an tan theihtawp kan chhuah a, dinhmun in anglo tak tak te an nih a vangin tumah kan dem lo a, kan khawngaih takzet a, a chheber thleng pawh tawk ila ZSE chuan a thlamuan tlat dawn a ni.

Kan Member Nu chhuanawm tak pakhat chuan nikum lam a UAE-a hnathawk tura bum thlak , Sales a thawk tur a an tih chu, housemaid-in Ras Al Khaimah (UAE a Khawpui pakhat) ah mahni sum leh pai tam tham tak sengin kumin March thla khan a lo chhanchhuak tawh bawk a. A chhanchhuaktu hi kan chhuang hle, Zo nunze mawi leh hmangaihna nena theihtawp a chhuahna ah lawmthu kan sawi e. Zahna leh chawimawina Nopui dawm a phu khawp mai. Kan ram sawrkar leh NGO te pawh in min hriatpui se kan duh hle.

UAE lama an Agent hi Sumi (Nepali) Ajman a awm mek a nia, a ni hian hetah tumah a bumin diklo takin a ti lo a, a phone hial a man tir zawk thin, mahse an lo kal hma in Mizoram lam agent ho in an Mizopuite an bumthla zawk a ni e.

Mizoram ațang UAE a dik famkim lo taka housemaid lo thawn thin tu nia hriat te:

*1.Estheri(Essi Pachua@facebook)E&K EmploymentAgency, Vaivakawn*

• An hotu ber a ni. Chhangurkawn, Chawlhhmun ah a awm mek.

*2.Rabon Lalhmingliani(Fb Name)-E&K Employment Agency*

• Bawngkawn Greenwood hnuai(Maid ve thin, Essi nen inzawmna thuk tak an nei)

*3.Nupuii Lhpi Ahriati(Facebook Profile Name)- Apuii- Ramhlun Vengthar*

*4.Catherine VLChhanchhuahi Catie(Fb Name)-Lunglei*

*5.Devine Mercy Rebublic Agency*

*6.Danmawi, Saikhamakawn*

Anni ho hian gulf ram hmundang ah leh Oman lamah pawh an thawn nual a ni awm e. Mahse a bikin Dubai(UAE) lokal tur chuan ZSE hruaitu te leh helaia Maid-a thawk mek leh awm tawhte be thei ula kan lawm hle ang. Thil kal hmang leh thudik tak kan lo kawh hmuh ang che u, lo kal duh suh, mahse i lo kal ngei ngei duh a nih chuan a awmsa te biala, theihtawpin an lo hrilh fiah ang che u.

A tawp ber ah chuan Nangni Mizorama Agency inti te u(Sawrkar pawh hian a pawmpui che u em?) heihi lo hre rawh u, in duham, hlep leh nawmsak duh vanga in Mizo puite bum tawh suh u.Midangte in rawn thawn zel duh a nih pawhin thu dik famkim nen hrilhfiah hmasa turin kan phut a che u. Company rules leh regulation thlenga hrilhfiah hmasa turin kan duh bawk a che u.

He article avanga a lo kal tawh te chungah harsatna siam in tumin in vau tur a ni lo bawk, tanpuitu tur tap chungin an dil a, an paidam thei tawhlo a an puak keh tawh anih hi. Mahni nunna hial an lak hma hian chhanchuaha hnem hi keini Zofa Society of Emirates chuan kan tum tlat a ni. Ram danga eizawng tur thih leh dam in kar a kan U leh Naute lo kal mangang au thawm hi kan haider ve theilo a ni e.

Zoram Nu leh Pa U leh Nau te pawh harh ula diklo taka i hnampuiten hreawmna sala i hmuhphakloh leh chhanphaklo a khualkhua a i fanu/farnu mangang taka nawr liam mek zel an ni, an authawm hi lo ngaithla la, midang lo kal tur te chu chelh ding ta che, a tlai hma hian.

“Aw Zofa Nula chhhuanwm tak tak te u, in saltanna laka ta chhanchhuak turin kan ram sawrkar leh NGO te mai bakah tlangval huaisen leh chhunawm tak takte pawh hian kan au thawm hi min hriat sak rawh se”.

NB: (He thu hi true story a nia. Mimal intih mualpho tumna a ni lo. Maid leh hna zawng tur a lo kal duhte tan fin zawk nan leh mahni chanvo leh dikna hre tura fuihna a ni.)

Zofa Society of Emirates Hruaitute biakpawh duh tan:

Lalrosiama Hauzel: Vice President- +971 526260071

Lalchawimwii: Secretary-+971 581543686/917005465764​

Benedict Hnamte: Executive Committee Member+971 588422304

| ZSE TIH DIKNA | Link @ https://www.exploremizoram.com/2020/06/zse-tih-dikna.html
-