FAK DÃWL LO HNAM

-Dr C Lalrampana

Pathian pawn sawichhiat ãi chuan fak A lãwm zawk. Mihringte phei chuan fak kan lãwm hle. Eng hnam pawhin fak an lãwm vek. Mahse, chapona tel lovin mi fak leh chãwimãwi an dawngsawng thin. Tribal-te hian fak leh chãwimãwi kan dãwl thin lo. Mahni inlãklen nante leh intihvei nan te, invaupūm nan leh inchhekarbãwm nante kan hmang zui fo thin.
Covid-19 avanga mi harsate dãwm chhuahna tur thawhlãwm chihrang hrang thawh chungchamgah pawh ramdang leh vaiho aia titha uchuak bik ang maiin Social Media-ah inchãwimãwi leh insawimãwi kan uar sãwt hle. *"Mizo nih a nuam, Mizote anga tlãwmngai an awm lo, Mizo nge nge...kan chuti khati bik.... Mite pawhin min fak, National paper-ah pawh kan lang"* etc. tih kan ching. Hei hi sim hmak teh ang u. Khawvēlah hian keini aia mirethei chhumchhia khãichhuah nana thawhhlãwk leh inpezo hi an tam lutuk. Heng bible chãngte hi ngun takin chhiar teh.



*"Mahni insawimãwi kan tan leh dawn ta maw?.... "*
(2 Kor. 3:1)

*"Thenkhat mahni insawimãwite zingah chuan ..."*. (2 Kor. 10:12)

*Mat 6:1 "In thil tha tihte mi hmuh atan, mihring mithmuha ti lo turin fimkhur rawh u; chutilochuan in Pa vana mi hnenah chuan lawmman in nei lo vang.* Mat:6;1
Mizo thufingah pawh- *"Mahni infak leh sakhi ngalah engmah a bet lo"* tih a ni a, finna a sãng zel a, kan ã ta tulh tulh zawk em ni? Mahni infak leh insawimãwi kan tan leh tãk chiam chiam mai le!
Hman kum lawka Assam police Family Quarters a kan tum khan kangmei tuar chhungkaw 40-te khan an hãk lai bak chang lovin an kãng fãl vek kha a ni a. Guwahati-a ka awm remchan lai tak a ni hlauh a. Ka va tlawh ve a, nitin thawmhnaw hãk tur chihrang hrang an rawn phur lūt zut zut mai a; tukthuan leh zanriah ei tur pawh a hun takah an rawn pe zar zar a. "Khawia mi nge?" tia ka zawh chuan *Marwari* hausa intelkhawmin Assam Sorkar punbuai miah lova an pek a lo ni reng a, mahse, keini angin DDK, ZONET, LPS leh Social Media-ah an vawrh darh chiam chiam ãwm rêng rêng ka hre lo, ka hre fuh lo pawh chu a ni mahna...?
Covid-19 do nan pawh India ram chauh thlir ta ila. Indian celebrities zingah leh NGO, Company hrang hrante'n PM Relief Fund leh hriipui dolet nan thawhlãwm dang dang leh bungrua, pawisa tam takan thawh nuk mai! Mahse, *"keini vaiho nge nge, vai nih hi a nuam bik, kan tlãwmngai bik"* an ti an ti ve lo. Chung thawhtute chu a tlangpui chauh tarlang ila:

1. South superstar Thala Ajith Kumar - 1.30 crore.

2 Kangana Ranaut - Rs 25 lakhs.

3 Akshay Kumar - Rs 25 Crore.

4 Vicky Kaushal - Rs 1 Crore.

5. Singer Lata Mangeshkar - Rs 25 lakh.

6. Singer Lata Mangeshkar - Rs 25 lakh.

7. Cricketer Rohit Sharma - Rs 80 lakhs.

8. Celebrity couple Shilpa Shetty and Raj Kundra - Rs 21 lakhs.

9 MS Dhoni - Rs 1 lakh

10. Sachin Tendulkar - Rs 55 lakhs.

11. Varun Dhawan - Rs 55 lakhs.

12. Badminton player PV Sindhu - Rs 10 lakhs.

13. Cricketer Suresh Raina - Rs 52 lakhs.

14. Baahubali' actor Prabhas - Rs 4 crore.

15. Actor turned politician Pawan Kalyan - Rs 2 Crore.

16. Veteran superstar of Telugu cinema Chiranjeevi - Rs 1 crore

17 Young superstar of Telugu cinema Mahesh Babu - Rs 1 Crore.

18. Stylish star Allu Arjun - Rs 1.5 crore.

19. Ram Charan Teja - Rs 70 Lakhs.

20. Comedy King Kapil Sharma - Rs 50 lakh.

Pe ve ngei tura intiam, pêk zãt tur sawi mai rih lo leh NGO, Company, Service Association etc. sawi lan loh tam tak an la awm.
Israel rama khawpui (town) pakhatah khuan Lockdown an neih tirh March atanga May thla chawhnu thleng khan an vengchhung mi hausa pakhat chuan nitin tuktin chawfun leh eitur dangte a thlãwnin a sem chur chur a, tunge sênso tumtu tih an hre rēng rēng lova, Social media--ah an chhuah ve chuai chuai lo Keini ni ve ta ila chu Media lamin an virleh hut hut emaw, kan inpho lang leh chuai chuai mahna le?
Kum 2018 inthlanpui dawna MLA candidate te affidavit kha thlir lēt ila. Khatah khan Sum leh pai hlutna an ngah hlawm hle tih kan hre thei awm e. Tuna kan Sport Minister hi a ngah ber kha niin a lang. Mahse, Covid fund atan engzatnge an pēk ve tawh hlawm le? Affidavit-a tilang ve lo mihausa engzatnge kan la neih? Indian celebrities & mihausate ang khuan an la che chhuak ve miah lo tluk a nih hmel. Che chhuak se'ng chuan kan hre ngeiin a rinawm.
Hetiang kan la ni cheu chunga mi fak dãwl lo lutuk hnam kan ni leh mahni hnam kan infaka kan insawimawi chiam chiam mai hi chu zaha ip chawih chawihna tham niin a lang.

CM Relief Fund leh Covid-19 kaihhnawiha thawhlãwm leh tha thawhtute hi an fakawmin an inpekna hi a ropui takzet a, kan entawn atan a tha hle. Pathianin a let tam takin malsawmna vur rawh se.
SBI hotu pakhat chuan lockdown hnu hian kumdanga sorkar kumthar bãwr vela Bank-a sum deposit a kiam duak thin ang kha ni lovin kumdang lēt hnih deuh thaw hialin bank-ah deposit a lut tam zãwk niin a sawi. Hetiang a nih chuan MLA Election dawna Affidavit-a tilang ve ngai lo, mihausa inthup, a rūka hausa tam tak kan la nei tihna a ni ngei ang. Hengte hian engzãt tak la thawh ve ang maw? I lo thlir phawt teh ang.
Engpawhnise, kan thiltha tihte hi chapopui mai thin lo ila, Mizote chauh hi miretheite khaichhuaktu bik anga lan bik talhte hi tum lo ila, Mizote chauh hi tlãwmngaihna vawng nung anga chapopuite hi ching lo ila, kan nihna ang ang hian mihring mithmuh leh Pathian mithmuhah i lang ngam zawk teh ang u.

Post a Comment

0 Comments