- Lalnghinglova Hmar (Tetea Hmar)
Hri a lêng miau a, mi zawng zawng a tihlawm theih loh.
Khawilaiah emaw hi chuan kan tuar dâwn a, chhiatpui vek chhungkua/dawr/firm/industry hi a awm dawn hrim hrim. A pawi dâwn mang e - mahse history enin hripui ken tel a ni miau si.
Ka ngaihdan chuan - expert rawn tur. Lockdown leh lockdown loh tih velah thu thiam naran te, ziaktu te , sorkar lama khawilai hotu nih vang ringawta inrawn aiin expert rawn hi ka duh ber.
Journalist tihte hi hre ber emaw kan inti fo a, pawl (NGO) hruaitute hi thil tawng tam na nâ nâ chu hriata mual mual kan neia hre ber emaw intih a awl khawp mai - chutiangin kohhran hruaitu lam pawh a ni tho mai.
Hripuiah hi chuan Health expert leh Economist kan neihte nen sawiho se, Agriculture scientist (kan neihte hi eng anga hmantlak nge an nih ka hre lo) lamte rawn hmasa se a ṭhat ka lo ring ve ber.
Tlawmngai pawl lamte han rawn hluai zel mai hi chu a buaithlak duh deuh - meeting a nih tawh reng reng chuan (ka tel ve chinah) pawl hruaitu ni ṭhang hian an sawi thiam a, an sawi huai a, an ding zak lo a, an rawt chak a, an rawtna a tlang duh khawp mai.
Kan hriat ve reng ngai chu *khawvelah hri a lêng* tih hi a ni. Chu chu a lo luh tak tak chuan *'tuna khawngaihthlak nia kan hriatte hi an khawngaihthlak zual dâwn a, kan zavai hian khawngaihthlak takin kan awm thei'* tih hi a ni - khawvel sumdawnna hmunpui New York a rûm tih hriatreng tur a ni a, fashion hmunpui Italy khawpui liante an ṭap.
Mirethei lama ṭan hi a thuin a awl a, a him bawka (a thu mai chuan), mahse a takah chuan a harsa - Mirethei hi ṭun lockdown chhung hian pawisain emaw, chawhmeh tal pawhin kan pui tak tak em? Mirethei hma ngai riaua inhriaa kan inthlahdul huau hian a hri hi lo lut palh se a rethei bawk hi an na zual ang a, an retheihna belhchhahin a awm dâwn tihte dâwn tel a ngai.
Nizanah Nagaland ah Covid-19 Positive thar a awm. Kan lockdown aṭanga ni 20-na dawnah positive thar a la awm. A travel history neih chhun lah thlà khat dawn kal taa Kolkata a zin daih kha a ni awm e. Hetiang te te hi chhut tel a ngai.
Tuna kan inthlahdul thut a, khawiah emaw a hri a lo awma a darh si chuan, kan thawhrim sâ, kan inkhung sâ, kan tawrh sâ, kan hun paih sâ kan sum hloh sâ kha a thlawn leh vek thei - kan do hi Misual an ni lo a, *hripui* a nih miau avangin rel thiam a ngai - thu ṭha pui pui sawi ringawt a hun lo deuh ka ti ve tlat.
Ka mimal ngaihdanah chuan ramri hi veng uluk ila, kan police neih zozai pawh chhawr nasat zual a hun e. Chief Secretary in lockdown ṭan tirha a phalsak ang khan *thingtlangah an feh thei tho a,* feh zel mai se - feh rem lohna ramri hrul khuaa mite chhawmdawlna sorkar hian pe se (pe thei tak maw?)
A tuar ber chu khawpuia Mirethei an ni. Anni tán hian government package awm thei se aw... (kan budget enin beisei tur a tam a ni si lo).
Thingtlang an feh theih a, lo an neih theih chuan anni lam chu an inchingfel thei zaw-mah ang - khawpui lam aiin.
Chuti a nih chuan khawpuia hna thenkhat bul an ṭan theih ang chi chu phalsak mai se, ti dawn ila - Mirethei inhlawhna kan sawi hi mihausa tel loa che thei a awm meuh lo.
Mistiri leh labour chin erawh an thawk thei ang a, dawr nghak, thil zuar kharchhawng, private firm-a inhlawh, mechanic, painter, printing press worker, puanthui, driver leh lirthei behchhana ei zawng, beautician etc hi an hnathawhna ber hi hawn/bul ṭan a la remchang chiah bawk si lo - a buaithlak a ni. Hripui ni miau hek le.
Damlo pakhat enkawl hautak zia hre rual kan ni a, damlo (positive) 20 lek pawh nei ila he state hian a enkawl zo meuh ang em? A hmanrua, damdawi leh Doctor kan nei daih em?
Thu ṭha deuh deuh sawi/ziah/thehdarh aiin *damdawi kha* hi kan la mamawh zawk lo maw?
Kar hnih kan in lockdown leh ngam/thei chiah ila chu ramri kan ven bawk chuan ngaihngam takin he state hi a kal leh thei tawhin ka beisei. Kar hnih hi kan tluk chhiat phah em lo ang chu!
(He thuziak hi WhatsApp group pakhata titi, ama phalnaa dah a ni.)
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Ava tha kher em
ReplyDeletePost a Comment
He post chungchanga i ngaihdan lo sawi ve rawh: