Lunglei | April 13, 2020: Lunglei High Powered Committee Vice Chairman Pu Lawmawma Tochhawng chuan SEDP hnuaia vaimin chin beihpui thlakna scheme SEDP-Maize chu vawiin khan Lunglei District Agriculture Office kawtzawlah tlangzarh a. Tin, HPC Lunglei, Agriculture Department leh Horticulture Department-te tangkawp hmalakna kuthnathawktute hnena thlai chi tlawm zawka (subsidized rate) pek chhuah ruahmanna a tlangzarh nghal a ni.
Hawnna program tawi Pu Tlangtimawia Zote, DAO Lunglei kaihhruaiah Lunglei HPC Vice Chairman chuan kuthnathawktute hmakhua ngaia an tan ruahmanna tha tak siam saktu Agriculture leh Horticulture Department-te chungah lawmthu a sawi a. Inkharkhip chhungin District mipuiten thlai thar tlachham miahlova hnianghnar taka kan ei thei hi kuthnathawktute thawhrim rah a ni tiin kuthnathawktute hlut zia mitinin kan hriat thar leh theuh a tul hle a ni, a ti a. Mipuite thlai thar leh thei mamawh pe chhuak tura a lak khawm leh sem chhuah buaipuitu District Supply Chain Committee te hmalakna pawh fakawm a tih thu a tarlang. Lunglei District huam chhunga Village Level Task Force-te thahnemngaihna leh tlawmngaihna chu ropui a tih thu sawiin chhun zan zawma duty a, mipuite mamawh an buaipui sak avangin an chungah lawmthu a sawi a. Sawrkar thuchhuak te ngai pawimawha, tha taka an zawm avangin Lunglei District mipuite chungah pawh lawmthu a sawi a ni.
He hunah hian Lunglei DHO leh District Supply Chain Committee Member Secretary ni bawk Pu L.Lalhmingmawia Pachuau pawhin thu sawiin Lunglei District huamchhunga khaw 29 - Tuipui D, Thawizawl, Tlawng, Zawlpui,Tuisenchhuah etc atangin thlai hrang hrang 40 chuang Lunglei khawpui leh a chhehvela sem chhuah turin lakkhawm mek zel anih thu a tarlang a. He hmalakna hi 28th March, 2020 atanga kalpui tan niin tun dinhmunah thlai thar trip 43 lak luh tawh niin heng thlai tharte hi a zavaiin cheng nuai 22.4 man hu a chhut a ni, a ti a. Mipuiten thlai thar eitur kan neih zel theihnan leipui, lo leh chuktuah huanah te uar taka thlai kan chin chhunzawm a tul takzet a ni tiin HPC Lunglei kaltlanga thlai chi tlawm zawka sem chhuah a ni chu kuthnathawktute leh mipuite tan malsawmna ropui tak a ni, a ti bawk.
SEDP-Maize hnuaiah hian Agriculture Department chuan vaimim chin beihpui a thlak dawn a. Vaimim tharte hi ran chaw atana hman tur niin sawrkarin a hralhna a buaipui nghal dawn bawk a ni. SEDP-Maize hnuaiah hian Lunglei District chhungah vaimim chinna tur khaw 18-ah Cluster 19 ruahman niin ram zau zawng hi a zavaiin Acre 475 a ni a, kuthnathawktute mi 619 an tel dawn a ni. Vaimim chinna tur hian acre khatah a chi kg 6 zel an dawng dawn a. A chi bakah hian tanpuina hrang hrang – Plant protection chemicals, sprayer, a pho rona leh transportation subsidy te an dawng bawk ang. Cluster tinah hian Farmer Interest Group (FIG) din tawh niin FIG tinah hian Maize Sheller (vaimin mal thlakna khawl) leh sawngbawlna (Post Harvest Activity) atan tanpuina Rs.10,000/- theuh pek a ni dawn a ni.
Thlai chi tlawm (Subsidized seeds) hi Horticulture Department Refrigerated Van hmangin Aizawl atanga lak mek a ni a. Tun kar nilaini (15th April, 2020) atangin Lunglei DAO Office leh DHO Office-ah te lei theihin a awm dawn a. Tin, thingtlang khua te tan ruahmanna hranpa siam sak niin Lunglei District huamchhunga Agriculture Circle Office sawm (10) leh Horticulture Circle Office pariat (8) ah te in report tur a ni a, Circle Officer-te hian an area theuhah anlo sem chhuak leh dawn a ni.
Tin, Horticulture Sales Emporium, DHO Office-ah kuthnathawktuten an thlai chi neihte an zuar chhuak mek zel bawk a, tun dinhmunah cheng nuai khat sing thum sang hnih (Rs.1,32 000/-) man hu lai thlai chi an hralh chhuak tawh a ni.
Post a Comment
He post chungchanga i ngaihdan lo sawi ve rawh: