MOBILE PHONE LEH TUNLAI THALAI TE

- B. Lalrohlua

Tunlai thiamna sang zelah kan kut a hum theih mai hmangin khawvel kan thlir thei tawh a, social media hman nan phei chuan kan hmang nasa hle mai. Mobile phone changkang tak tak nei si, instagram, WhatsApp, Facebook etc., khawih a hmang thiam viau si hian chhungkaw mamawh leh thla tin kan buaina, tui bill/electrict bill/online application etc., ah te kan hnufum leh ṭhin si a - A zahthlak zawk khawp mai.

Ṭhalai lehkha thiam, English/Hindi etc. a dak zat zat thei te bill pe tur leh mi dawr a Online application man chawi a ti kan awm fur zel hi zawng a hahthlak a ni e.
Kan mobile phone chu Online Games khelh mai mai nan te kan hmang uar a, PUBG, Mobile Legend, etc a rank san inchuhin kan intlansiakin hun kan khawhral a, kan status velah kan han pholang chiam zel hi chu phone hman tangkaina kan hre lo mai nilovin kan hman zia kan pholang mai tihna a ni.

Mobile phone a games khelh addict ho hi chuan chhungkaw thil pawimawh hi an ti hman meuh lo, 'ka hman lo, lawks, ka laklawh lutuk" tiin chhuanlam an siam chul zel a, tirh leh sawnchhuah hi a inthlahrunawm ngawih ngawih zel. Online Games khelh nana mobile phone hmang thiam viau si hian Online application kan harsat em em leh lawi si.!

Mizoram Sorkarin bill hrang hrang pekna BHIM te, BBPS te launch a tum thar chauh a, a lawmawm viau na in thil tul ber a ni kher lo. Launch a nih hma hian E-payment tamtak a awm tawh a, Google pay, Internet banking leh Mobile banking application hrang hrang hmangin bill hi pek theih reng a ni a. Kan mobile aṭang pawh hian awlsam tak a pek theih mai a ni.

Electrict Bill, Tui bill, phone recharge, leh a dangte hi kan phone atang hian kan ti thei vek.  Amaherawhchu, hemi transaction ti tur hian Debit/Credit card emaw Internet Banking neih erawh a ngai a, tunlai ah kan nei fur tawh.

Bill pe tur a reitak intlar ṭhin te zingah ṭhalai bright hmel tak tak han hmuh te hian ka rilru an ti na ṭhin. Social media lam duhthusam a khawih a hmang thiam si, thil harsa lo tak, intlar ngai miah lova bill pek te hi thiam kan tum lo hi a buaithlak a, hun a heh loh bakah minute 2/1 lek a inchhung emaw mut hmun aṭang pawh a tihfel theih mai a ni.

Kan kut a kan ken reng kan mobile phone hmang hian Online application hman thiam tum ila, online bill payment, recharge te hi thiam ila, hun a heh loh bakah tha leh zung senna tur tamtak a veng ve a ni.

Inchhung khur a mobile hmang thiam ber tur leh chhungkaw mamawh digital system taka chingfel thei turin mahni in inzir thiam tum ila, ṭhalai entawn tlak, mobile phone hmang ṭangkai thiam nih hi intihhmuh zel ila, Games khelh ringawt te hian hmasawnna min pe lova, kan tihtur tamtak kan tih loh phah bakah hun hlu tak kan paih zel a ni tih hi pawmtlan a ṭul hle a ni.  Internet hi social media khawih nan leh online games khelh nan chauh hman tum lovin kan nitin mamawh awlsam taka chinfel nan i hmang ṭangkai zawk ang u.