Sports Minister-in Mizoram Taxi Association infiamna hmanpui; Asian Games hmeichhe hockey gold medalist Lalremsiami Hmar leh Lalthantluangi ten an ṭawiawm

Aizawl | Oct 21, 2026: Sports and Youth Services Minister Lalnghinglova Hmar chuan October 20, 2026 zan khan Mizoram Taxi Association kum 10 tlin lawmna atana buatsaih taxi khalhtute tana futsal inelna chu ITI Vengah a hawng a; Asian Games hmeichhe hockey gold medalist Lalremsiami Hmar leh Lalthantluangi ten an ṭawiawm.

Lalnghinglova Hmar chuan taxi khalhtute chu eizawnna pawimawh tak chelhtute an nih avangin ram leh hnam hmel lanna an nih thu a sawi a, "Khualzin pung mekah pawh hian taxi khalhtute hian mawhphurhna sang tak in nei a, khualzinten an tawn hmasak ber an nih ṭhin avangin ram leh hnam hmingthat leh hmngchhiat in kutah a awm lian hle a ni," a ti.

Taxi khalhtute chu zing chhun zan zawma hnathawmtu an nih ṭhin avangin hriselna atan a khat tawka infiam a mamawh thu leh, thlan titla ve fo turin a chah a, an hriselna ngai pawimawh turin a fuih.

Sports Minister chuan, "Mizo mipa a hun hmaa thi an tam em em a, hei hi hriselna ngai pawimawh loa nun dan inthlahdah avang te, zu leh ruihtheihthil lama kal nasat nghawng a ni," a ti a, Mizo mipaten nun an uluk zual a ṭul thu a sawi.

Mizoram Taxi Association kum 10 tlin lawmna futsal tournament-ah hian Aizawl hmun hrang hrang aṭangin team 45 an tel a; Minister hian infiamna hmanrua bakah sum leh pai a hlan a ni.