KTP memberte'n Mizoram chhûng hmun hrang hrangah Faina Beihpui hnatlang an thawk.

Aizawl | Oct 17, 2026: KṬP General Conference Saitual 2026-in a rêl angin Oct ni 17, 2026 (Inrinni) khan Mizoram chhûng hmun hrang hrangah Faina Beihpui hnatlang an thawk.

Aizawl khawpui chhûngah hian AMC nêna ṭang kawpin hmun 24 ah hnatlang hi neih a ni a, hetah hian Bial KṬP 51 aṭangin Branch 184 an thawkchhuak a. Hnatlannaa hman tur Garbage Bag, Kutkawr leh refreshment man turte hi AMC lamin an tum a, bawlhhlawh paih motor 10 hnatlang pual hian an tumsak bawk a ni.

Aizawl khawpui pâwnah hian UD&PA Department nêna ṭang kawpin mahni Bial chhûngah ṭheuh hnatlang neih a ni ve thung a. Bial KṬP 160 aṭangin Branch KṬP 700 chuang an thawkchhuak thei a. Hnatlannaa hman tur Garbage Bag, Kutkawr leh refreshment man turte hi UD&PA lamin an tum bawk a ni.

Bial ṭhenkhat vawiina hnatlang theilote karleh lama hnatlang turin an inbuatsaih a, heng bakah hian Mizoram State pawnah October ni 19, 2026 (Thawhṭanni) ah Goa Bial KṬP te an hnatlang dawn bawk a, tuifinriat kam ti faia hnatlan an tum bawk.

Vawiin Central KṬP Faina Beihpui Hnatlangah hian AMC Area chhunga hmun 24 a hnatlang te hi mi - 3288 an ni.