Sialhawkah MIFCO hmalakna inhrilhfiahna hun hmang; man to zawk leh kalphung ṭha zawka lakhuihthei lak chhunzawm an tum

Aizawl | Sept 17, 2026: Sialhawk Pineapple Growers Society chuan September ni 15, 2026 (Thawhleh) zan khan MIFCO hmalakna inhrilhfiahna leh MIFCO in lakhuihthei an leina pawisa semna hun an hmang.

He hun hi MIFCO Chairman Lalṭhazuala Rawite chuan a hmanpui a. Lalṭhazuala Rawite chuan thu sawiin, "Sialhawk khawtlang taimakna chuan Mizoram pum nghawngin sawrkar buaipui tham lakhuihthei an thar chhuak thei chu lawmawm," a tih thu a sawi a. Sialhawk leh a chhehvel khua te hnathawh nasat zia chu Chief Minister Lalduhoma pawhin hriain a ngaihven em em a, a bik takin Sialhawk lakhuihthei chu hralhna awm loh vanga a chhiat a remtih tawh loh thu Chief Minister-in a sawi bawhzuiin MIFCO chuan kumin 2026 ah Sialhawk leh a chhehvel khua a lakhuihthei thar chhuahte chu a la ta a ni," tih a sawi a.

Lalṭhazuala Rawite chuan, Kum lo kal leh zel turah pawh kumin aia man to zawk leh a lak dan kalphung pawh ṭha lehzual zawka lakhuihthei lak chhunzawm zel chu Chief Minister duh dan a nih avangin, sawrkar hmalakna tihlawhtling turin MIFCO chuan theih tawp a chhuah zel dawn thu a sawi a ni.

Kumin 2026 hian Sialhawk khua hian lakhuihthei quintal 12000 vel an thar tawh a, a tunah hian an la hralh chhunzawm zel a ni.

Kumin 2026 a MIFCO in Sialhawk lakhuihthei a lak hi a quintal 976.12 a ni a. MIFCO in a lei bakah hian Mizoram hmun hrang hrang leh Assam ah te Sialhawk lakhuihthei hi hralh chhuah a ni.

Lakhuihthei hralhna awm loh vanga tih chhiat awm miah lova an hralh theihna tura hma laksaktu Mizoram Chief Minister Lalduhoma leh MIFCO Chairman Lalṭhazuala Rawite te chungah Sialhawk Pineapple Grower Society chuan lawmthu an sawi a ni.