MFA-in match fixing kaihhnawihah kum thum chhhung atan Kanan FC mi leh sa pathum a hrem!

Aizawl | Sept 17, 2026: Mizoram Football Association (MFA) chuan match fixing kaihhnawihah Kanan FC mi leh sa pathum a hrem a, heng a hremte hi Assistant manager leh Player pahnih an ni.

Mizoram Football Association (MFA) chuan Kanan FC Asst. Manager Lalrammuana,

palyer pahnih - Lalrintluanga leh David Lalchhuanawma te chu kum thum chhung MFA hnuai a football leh a kaihhnawih thil reng reng a tel khap, football kaihhnawiha inhnamhnawih thei lo turin a hrem a, Cheng 10,000 ṭheuh chawi tura tih an nih bakah MFA hnuai a football tournament huaihawt anihna hmun eng stadium ah mah kum thum chhung luh phalloh, tein an chungah hremna a lekkawh a ni.

Heng mi pathumte hi, "Mizoram Premier League Season 13 khelh mek ah Match Fixing/Corruption kaihhnawih ah inhnamhnawihna nei ngei a hriat i nih avangin ni 7.9.2026 khan MFA Disciplinary Committee hma ah he Match Fixing / Corruption kaihhnawih a inhnamhnawih a puh i nihna chungchang ah insawifiahna hun pek i ni a.

Ni 12.9.2026 ah MFA Disciplinary Committee chuan i insawifiahna te leh i chungchang thu ngun tak a a ngaihtuah hnu in MPL Season 13 ah hian Match Fixing / Corruption kaihhnawih ah i inhnamhnawih ngei a, match fixing a nih theih nan hma i la ngei tih a finfiah a ni. Hei hi MFA Disciplinary Code 2025 hnuai a Code No. 62.1 leh 62.2 te chiang tak a bawhchhiatna a ni tih kan hriattir che a. MFA Disciplinary Committee chuan hetiang hian MFA Disciplinary Code 2025 hnuai a Code No. 62.1 leh 62.2 te tlawhchhanin i lakah hremna a lekkawh ta a ni:

1. Kum 3 chhung MFA hnuai a football leh a kaihhnawih thil reng reng a tel khap.

2. Cheng 10,000/- (Singkhat) fine.

3. MFA hnuai a football tournament huaihawt anihna hmun eng stadium ah mah kum 3 chhung luh phalloh.

MFA Disciplinary Committee chuan i lak a hetiang a thununna lekkawh a ngai hi pawi a ti a. Tunhnu ah chuan infiamna zahawm leh ropui, Football hmel ti bawlhhlawhtu ni tawhlo turin a a hriattir in a ngen che a ni.

He thununna hi insiamthat nan a lo hmang ngei turin MFA Disciplinary Committee chuan a duhsak a che." tiin MFA Disciplinary Committee chuan lehkha a thawn a ni.