"Mizoram tlawha rawn zin Tourist ten an hmuh chak leh hawn chak ber chu Mizo kut chhuak a ni," ~ B Lalchhanzova

Aizawl | Sept 1, 2026: Armed Veng South ZPM Zonu Unit-II (Aizawl East-II) hmalaknaa 'Thiamhnang deh Hawnna' Inkhawm Programme hmanpuitu leh hawngtu Minister of State B Lalchhanzova chuan vawiin khan, "midangte tana malsawmna ni thei tura "Thiamhnang deh" hawnna programme an nei thei chu a rilru a hnehin lawmawm a tih thu a sawi.

"Kutthemthiam nei Nu nih hi a hlu hle a, Mizo nunah phei chuan in lawina chhungkaw tana in chhawm theih thil pawimawh tak a ni," a ti. "Thiamna neite chu Loan lak kawngah pawh puih an nuam bik em em a, mahni in chhung kalsan loa thawh theih a nih avangin a ṭha em em a ni," a ti a. "Thiamhnang deh kan kalpui tur hi tha ka tih em avangin MLA Fund sum tel lovin mahni sum hmanga Sponsored ka ni a, chumi aṭang ringawt pawh chuan ka ngaihhlutzia alang chiang awm e, " a ti bawk.

Minister chuan Tourist an pung chho zel a, Tourist ten mizoram an rawn tlawha an hmuh chak leh an hawn chak ber chu mizo kutchhuak a ni tih sawiin kut themthiamna hian kan ram rohlu tam tak a phochhuahna piah lamah mi tam takina eizawnna atana an hman a nih avangin a pawimawh thu leh chona hlu leh ṭha tak a ni thu a sawi. Mizo Handloom product hi kan uar chho tulh tulh dawn a, Explozer Visit-a phailam kal theihna chance tha tak a ni leh zel te hi kutthemthiamte tan a hlut thu sawiin Zin mi ten min tlawh tam poh leh thiamhnang kan deh chhuah leh hralh kawngah pawh nasa takin hma a sawn dawn a ni a ti bawk.

Khuallian chuan Training nei turte chu an training chhuah hunah an chak zawng leh an duh zawng chauh siamtu nilovin miin eng nge an duh tih rilru pua demand awm angte hrechiang chunga siam chhuak ṭhin tur leh eizawnna atana hmang ngei turin duhsakna a hlan a ni.

Tin, he hunah hian AMC Executive Corporator Christina Roluahpuii Sailo, Veng chhung Local Council, YMA leh MHIP te pawn thu an sawi a. Christina Roluahpuii Sailo chuan, eizawnna atana hman chhunzawm tumlo thiam sathliah nilova chhawrtlak leh hlawhtlinpui theih khawpa thiamna nei ngei tura fuihin Corporator leh khawtlang ang pawhin puih theihna an neih ah chuan theih tawp an chhuah tur thu a sawi, Corporator chuan Mizo thil ngaihsanna lamah kan thanharh nasa a, tute kutchhuak nge tha tiin kan zawng thin a, chutiang anga an zawn leh an lungawina khawp siam chhuaktu ni thei turin training turte a fuih a ni.

Christina Roluahpuii Sailo chuan, AMC in Supreme Court Order a hmuh angin Municipal huam chhungah Bawlhhlawh paih dan Door to Door a kalpui tan dawn thu sawiin Bawlhhlawh chu chi 4-ah thliar a ni tur thu a sawi a, Bawlhhlawh thliar kawngah kan taihmak leh zual a ṭul tih a sawi. September thla atangin In tinah kalin Bawlhhlawh an Collect tawh dawn a, Bawlhhlawh Collect tute tana harsatna a awm loh nan a thliar thatna kawngah chhungtin ten tan kan lak thar theih nan vawiina Thiamhnang deh Programme hawnna kaltlangin mipute hriatah ka sawi tel a ni a ti. Thiamhnang deh chhuah kawngah Veng hmasawn leh entawntlak ni thei turin Training turte duhsakna a hlan a ni.

He hunah hian Thiamhnang deh Instuctor State Awardee Kaphnuni pawhin traning na atana thil pawimawh sawina hun nei in training turte chu thahnemngai taka zirturin a chah a ni. Thiamhnang deh Phase-I ah hian mi 15 training tura thlan an ni a, traning na hmun atana 1st Bn. MAP Quarters a thlawna hman phalsaktu Commandant chungah ZPM Zonu Unit-II Armed Veng ten thinglung takin lawmthu an sawi a ni. Thiamhnang deh Training Phase-I hi thlakhat nei tura ruahman a ni.