Khawhai khuaa in kangah nula pakhat a kang hlum!

Aizawl | Sept 1, 2026: Khawhai khuaah Ngurkhuma in chu vawiin chawhnu dar 1 vel khan a kang a, Ngurkhuma tunu, Lalhriatzuali (21), pianphunga rualban lo (vohbîk) chu a kang hlum.

vawiin chawhnu dar 1 vel khan Khawhai South Venga Ngurkhuma in chu a kang a, electric current kal sual vang nia rin a ni. In kang hi khawtlang mipuiin an hriat veleh thelh mahse, in kan laia he ina awm, Ngurkhuma tunu, nula kum 21 vohbik (pianphunga rualbanlo) chu vanduaithlak takin chhan hman lohin in kang avang hian a thi a ni.

In kang hi Ngurkhuma te chhungkua chenna a ni a, mi pali an cheng a. In kan lai hian Lalhriatzuali chiah hi inah a awm a ni.

An kawm chhaka Sub-Centre-a awmte'n in kang an hmuh hian an thelh nghâl a. In hi a kan ral hmain thelh hman ni mah se, Lalhriatzuali awmna lam erawh a kang chhe hle a, khumah puanin a lo intuam a ni.

In kan chhan hi hriat a ni lo a, kumin kumtir lamah mobile phone charger atangin an in hi a lo kang tawh a, a kan nasat hmain thelh hman a ni.

Lalhriatzuali ruang hi zaninah lumen tur niin, naktuk chawhma dar 11-ah vui tur a ni.

Hemi chungchangah hian CM Lalduhoma chuan instagram kaltlangin, "vanduaithlak takin Ngurkhuma In, Khawhai, Khawzawl District chu vawiin chhunlai vel khan a kang a, a tunu Lalhriatzuali (Vohbik), kum 21 chuan a nunna hlu tak a chan tih ka lo hria a. A pawi ka tiin ka lainat ngei mai. A kalsan tak amah hmangaihtute Pathianin awmpui zel rawh se.

SDRF dan angin Lalhriatzuali hi Ex-Gratia Rs. 4 lakh pek a ni ang a, dan anga chhiatna tuartute tanpuina awm thei apiang ngaihtuahsak an ni ang," a ti.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]