Mixed Martial Arts hmangin Aug 22 zanah Mizo hming a tha leh dawn!?

Aizawl | Aug 20, 2026: Mizoram State Mixed Martial Arts Association (MISMA) chuan professional fighter chher chhuah kawngah leh amateur lama national level-a hlawhtlinna ropui tak a tawn hnuin, Mizo hnam hming chawimawi turin kârtawp (weekend) pui tak a hmachhawn leh dawn a ni.

Mizo Fighter-te Hmachhawp:

South India-a professional fight night lian ber, Legacy Fighting Championship 2-ah August ni 22 zan hian, hneh loh la nei lo (undefeated 2-0-0 record) Lalnunsanga (Chawnpui, Aizawl/ Khawzawl) chuan co-main event-ah Delhi pro-fighter tha, record 3-2-0 nei mek Dushyant Singh a tum dawn a. Hemi rual hian Lunglei nula Lalramhlimpuii pawhin a pro bout vawi hnihna atan amateur lama international medalist Fathima Afshan a tum ve thung ang. Heng fight pahnihte hi MMA tuitute nghahhlelh rawn an ni. Sanga hi MISMA affiliated club SPES-a training a ni a, Puipuii hi Elbruz-a training a ni ve thung. Mizo fighter-te hi Coach Lalramsangliana'n a hruai a, he event-ah hian Telangana Sports & Youth Services Minister, Sri Vakiti Shrihari chu khuallian a ni ang. An hlawh pawh tha tak a ni dawn a ni.

MISMA Official-te: Hetih rual hian MISMA official-te thiamna leh hlutna hriatpuiin, India rama professional fight night lian berte zinga mi, flyweight title belt leh cheng nuai 5 inchuhna tur Aturto 4.2-ah August ni 22 zan vek hian MISMA hruaitute an inlan dawn a. International R&J leh MISMA General Secretary Samuel Lalrozama chu Event Commissioner a ni dawn a, ani bakah hian National R&J leh MISMA Treasurer Lalthakima leh MISMA ECM Lalchhuanmawia te chuan Referee leh Judge hna an thawk bawk ang.

Thlawptute Chungah Lawmthu: Heng event-te hi MMA India national federation sanction-na hnuaia buatsaih a ni. MISMA President T. Lalrinpuia chuan, "Source of income mumal kan nei lo chung pawha hruaitute inpekna, mipuiten min rina min thlawp tlatna, leh sorkar min puihna avangin kan pawl hi hma sawnin a kal ve zel thei a, ram dang mite rinna pawh kan hlawhchhuak zel a ni," a ti. Hemi rual hian MISMA fight night hlawhtling taka buatsaih theih nana theih tawp chhuahtu, thalaite hmakhaw ngai em emtu, Sports Minister Lalnghinglova Hmar chungah lawmthu sawiin, a zarah hmasawnna lian tak an neih phah thu a tarlang bawk a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]