ZMC&H-ah a vawi khat nan hlawhtling takin lung an zai hawng; darkar ruk leh a chanve chhung zet an zai!

Aizawl | August 20, 2026: Zoram Medical College & Hospital (ZMC&H)-ah nimin khan a vawikhatna atan Open Heart Surgery (Coronary Artery Bypass Graft) chu hlawhtling takin an kalpui.

Lung zai thiam Cardiothoracic Surgeon Dr Mary Hmingthantluangi leh phai lam atanga doctor thiam lo kal Apollo Excel Hospital, Guwahati Cardiothoracic Surgeon Dr Intekhab Alam ten hlawhtling takin damlo kum 69 mi hi an zai a. Damlo hian thla 6 kal ta khan Heart Attack neiin, Lung natnaah chuan zai hautak ber chi - Triple Vessel Disease natna a vei a; darkar 6 leh a chanve chhung zet an zai a ni.

Doctor-te hian thisen zam pawimawh pathum block te an siam that chhungin, damlo lungphu an titawp lailawk a. Lung hnathawh hi khawl (Heart-Lung machine) hmanga chhawk niin, thisen-zam siam ṭhat a nih hnuah Lung hi an tinung leh a. Lung-a thisen zam chhia te siam ṭhat nan hian damlo ke-a thisen zam (saphenous vein) leh damlo awm (chest)-a thisen zam (LIMA) te an hmang a ni.

He Inzaina hautak takah hian ZMC&H Anaesthesiology Team, thiam leh rintlak tak ten khawl changkang leh ṭha tak tak hmangin damlo hi an vil reng a. Cardiologist Dr Lalṭhafala pawhin uluk takin zai chhung zawng hian a vil bawk a ni.

Damlo hi zai zawh a nih hnuah ICU-ah enkawl chhunzawm turin dahluh a ni a. Damlo hi hlawhtling taka zai niin, damlo chhungte pawh a zaitu Surgeon, Anaesthesiology Team leh OT team te chungah an lawm hle a ni.

Phai aṭanga Cardiothoracic Surgeon lo kal pawh hian vawiina Open Heart surgery atana Surgery Team, Anaesthesiology Team leh Nursing leh mi dangte inbuatsaihna ṭha a tiin, a fak hle. Damdawi In lam hotute pawhin Lung zai hi an ngaihven a, ngun takin an vil reng a ni.

Open heart surgery (Coronary Artery Bypass Graft - CABG) chu lung a thisen zam (artery) block/chhiate siamthatna leh thlakna (bypass) atana inzaina pawimawh leh hautak tak a ni a, Mizoramah pawh hlawhtling taka tih tan a ni tawh.

Mizoramah July 19, 2022 khan Trinity Hospital-ah lung zai hawn (open heart surgery) tih a lo ni tawh a, mi pahnih zai an ni a; niminah ZMCH-ah tih a ni ve leh ta. Ebenezer Medical Center-ah June 21, 2026 khan lung zai hawng loin damlo pakhat chu aortic valve thlaksak a lo ni tawh bawk.