Larsap-in Governor's At Home a buatsaih

Aizawl | August 15, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Aizawl Lammuala Independence Day 2026 lawmna neih zawhah sawm bikte pualin Lok Bhavan Circular Lawn-ah "Governor's At Home" a buatsaih.

Hemi puala thu a sawiah Larsap General (Dr) Vijay Kumar Singh chuan India ramin zalenna a hmuh theih nana theihtawp chhuahtute hriatreng a pawimawh thu sawiin, Mizo zing ami Lalnu Ropuiliani, Nikuala, Lianphunga Sailo, Zakapa, Khuangchera leh adangte inpekna entawntlak a tih thu a sawi a. Ram chhung hmun kilkhawr ber thlengin chak taka hmasawnna kalpui mek zel anih thu sawiin, Mizoram pawhin hei hi a tawng chho mek a, remchannate leiin state thang duang tak, chhuan lo la awm zel turte tana chenna tlak kan siam a ngai a ni, a ti bawk.

Mizorama hmasawnna ruhrel lian tak tak zing ami Bairabi-Sairang railway line hawn tak, Zorinpui thlenga kal tir tum leh Kaladan Multi-Modal Transit Transport Project-te chuan danglamna nasa tak a thlen dawn thu a sawi a. Hmasawnna lo thleng tur atana kan lo inpuahchah lawk a tul thu sawiin, kan ram mawi leh hnam ziarang hausa takte, rimawi, ei leh in bakah mikhual chunga thatnate hi khualzin tam zawk hip luh nana pawimawh em em a ni a. He tih rual hian hmunhma leh hmanraw tha, faina ngaih pawimawh leh khual hip thei tur zawnga hmalakte chu thil tul tak a ni tih sawiin, mikhual lo dawnsawn leh hruai dan training bakah, an thlenna tur homestay leh khawtual siam ngei thil tha tak tak chhawpchhuah kawngah tanlak a tul thu a sawi bawk.

General (Dr) Vijay Kumar Singh chuan agriculture lam emaw, ei leh in sawngbawl, handicraft, handloom leh adang hmanga tualchhung thil dehchhuahte hralh kawnga harsatna a awm loh nan market linkage nghet tak din a tul thu a sawi a. Khawhawi tih zauh a tul thu leh hawiher zim lutuk nuai bo a tul thu sawiin, Mizo thalaite chu thil thiam zung zung thin leh taima an nih avangin ram chhung mai bakah khawvel huapa intihsiaknaa tel tum turin a chah a. Civil Service, IIT, IIM, medical zirna, university, defence service leh a dangahte Mizo thalai tam zawk an luh theih nana hmalak tul thu sawiin, kan thalaite hian mahni inrinngtawk tak chunga hmun dang an pan angai a, midangte nena an va inelna hmanga hlawhtlinna leh tawn hriat an neihte Mizoram tan an rawn hawn a tul a ni, a ti a. Hmasawnnain Mizoram danglam bikna, hnam ziarang hausa tak, khawtlang inlungrualna, chhehvela thil awm leh khawtlang thil hlu tak takte a tih chhiat mai loh nana kan humhalh tlat a tul thu a sawi bawk.

He hunah hian Eklavya Model Residential School, Tlangnuam, Nuehof English Medium School, Aizawl bakah Local Artist ten Independence Day pualin cultural programme ngaihhlut hlawh tak tak an chhawp chhuak a ni.

Governor's At Home-ah hian Chief Minister Pu Lalduhoma, Chief Minister hlui pahnih Pu Lal Thanhawla leh Pu Zoramthanga, Speaker Pu Lalbiakzama bakah sawm bik mi pawimawh dangte an kal tha hle a ni.