Aizawl-ah India Zalenna Ni ropui takin lawm; Sawhthing lei leh hralh kan kalpui chhunzawm zel a. Kumin 2026-ah hian Support Price cheng vaibelchhe 22 vel kan pe tawh; Mizoram State University (Amendment) Act, 2026 kan siam a, chak takin kan bawhzui

Aizawl the 15th August 2026: Aizawl Lammualah India ramin zalenna a hmuh champha 2026 chu vawiin khan a lawmna ropui tak buatsaih a ni a. Chief Minister Lalduhoma chu khuallian a ni.

Khuallian hian hnam puanzar pawt pharhin, Parade Contingent 27 te chibai bukna a chhanglet a, tun hnaia Mizoram hmasawnna langsarte tarlangin, lawmman chi hrang hrang semna a nei bawk.

Thu sawiin Chief Minister chuan, India ramin zalenna a hmuh theih nana beitu ram hruaitu te, an nunna hlu tak hlantute chibai a buk a. Ram hmasawn, ram ralmuang leh mi tin huapzo din zel tura thawhpuiah mipuite a sawm. “Kan thawhhona a that avangin hmasawnna hmel thar pawh kan hmu zel a ni”, tiin tun hnaia Mizorama hmasawnna langsarte a sawi a ni.

A thusawi tlangpuite chu:

1. The Mizoram Bana Kaih (Handholding) Scheme chu Mizoram economy siamṭhatna tura kan hmalakna lian ber a ni a. Kan Progress partner-te nena sum leh paia ṭhawhhona mai piah lamah, an thiamna tihpun kawngahte hma kan la a; eizawnna ṭha zawk kawhhmuhin, ram hmasawn nan hma kan la mek a ni.

2. Thalaiten eizawnna kawng thar dap a, sumdawnna hlawk zawk an neih theih nan Mizoram Bana Kaih Venture Capital Fund siam a ni a. Cheng vaibelchhe 20 corpus fund dah niin, mahni kea din tum ten bul an ṭan theihna tura puihna tur venture capital fund Mizoramin a siam vawikhatna leh hmasa ber a ni.

Investment Policy, 2025 kan nei thar a; investor lian tak takte koh luh nan Investment Promotion Agency kan din bawk a. Hengte bakah PM DeVINE leh NESIDS kaltlanga kan hmalaknate hian mipuite tan eizawnna a siam belh ang a, kan economy ṭhan zelna turah nasa takin kawngro a su ang.

3. Mizorama kalpui theih chi Centrally Sponsored Scheme (CSS) zawng zawng chu SNA SPARSH ah kan dahlut vek tawh a.Hun tiam chhunga ṭha taka kan kalpui avangin sawrkar laipui chuan hmalak ṭhat lawmman (incentive) cheng vaibelchhe 350 min pe.

4. Chhiah lak dan siamṭhatna pawhin rah ṭha tak a chhuah mek a. Kum 2025–2026 chhunga kan chhiah tlingkhawm chu cheng vaibelchhe 1,278.55 zet a tling a, 3.35% aṭangin 11.20%-ah a pung a ni. GST 2.0 hian chhiah lakkhawm dan felfai leh zau zawk min siam sak a, hei hian kan ram tana hmasawnna hna kan thawh zelna turah min ṭanpui ang.

5. Secretariat tiamin sawrkar office 45 zetin e-office an hmang tawh a. Hei hian hna a tihchak bakah langtlang sawrkar siamna kawngah min pui a ni.

6. Sawrkar ṭha nei tura mipuite pawimawhzia hriain kan ram mipuiten sawrkar inrelbawlnaah lungawilohna emaw, rawtna emaw an thlen theihna tur kan siam a. CPGRAMS kaltlanga case lo lut 90% chinfel tawh niin, Mipui Aw kaltlanga lut 91% chinfel a ni.

7. Revenue inrelbawlna changtlung leh ṭha kan neih theih nan e-ram portal kan siam a, Digital India Land Records Modernization Programme (DILRMP)-ah land record tam tak kan chhinchhiah fel tawh a ni.

8. Hmarchhak state-te zingah SMAVITA Property Card semchhuak hmasa ber kan ni hi kan chhuang hle a. Urban land record siamṭhat nan Aizawlah NAKSHA pilot project kan kalpui ṭan a. Department-a surveyor indaihlohna phuhru turin private firm kan ruai bawk. Ram chhiah awlsam taka pek theihna tur Online Land Tax Payment System Version 2.0 kan nei leh tawh a; mipuiten awlsam leh him zawka Stamp Duty kan pek theihna tur e-Stamping kan siam bawk a ni.

9. NABARD RIDF leh SASCI hmangin hmasawnna ruhrel tam tak kan din mek a, cheng vaibelchhe 61 sengin link road leh PCC pavement kan siam a. Leitha (fertilizer) kan mamawh khawp a awm reng theih nan a tawlhruk chingte tihrem tumin chak takin hma kan la.

10. Sawhthing lei leh hralh kan kalpui chhunzawm zel a. Kumin 2026-ah hian Support Price cheng vaibelchhe 22 vel kan pe tawh a. DoNER Ministry chuan Champhai district-a sawhthing processing unit din nân cheng vaibelchhe 30.13 min pe a, Mizoram chu Ginger Capital of Indiaah min puang tawh a ni.

11. MIDH hmangin Off-season tomato leh zikhlum chin lamah nasa takin hma kan la a. Kum 2025-ah off-season tomato metric ton 2,770.5 leh zikhlum metric ton 3,712.64 tharchhuah a ni a, kuthnathawktuten cheng vaibelchhe 40 vel zet an lei a ni.

12. National Livestock Mission hnuaiah Animal Insurance Scheme kan kalpui a. Ran 3,290 vel insurance tihfel tawh a ni a, Insurance claim 60 chinfel tawh a ni.

13. Bawnghnute tharchhuah kawnga hma kan sawn theih nan Mizoram Milk Producers’ Cooperative Union Ltd. leh National Dairy Development Board te chuan thawhhona thuthlung an ziak.

14. Mizoram Water Information and Governance Bill, 2026 chu kan pawm tawh a. Mizoram State Water Informatics Centre pawh din a ni tawh a. Ruah sur zât, lui tui chim chin tehna leh lei hnuaia tui dinhmun en theihna turin Mizoram hmung hrang hrangah RTDAS station 81 kan bun a. Loneitute tan a tangkai chho tial tial dawn.

15. Kan Cooperative Society ten internet hmanga awlsam zawka hna an thawhna tur RCS Portal kan siam a. Computer hmanga PACS te thuam chak kawngah India rama hma la ṭha ber zingah kan tel a. RBI chuan Mizoram Cooperative Apex Bank chu scheduled bank-ah a pawm tawh a ni

16. MGNREGA thlakna VB-GRAM (G) hmang tura inpeih fel hmasa ber state zingah tel a, kan bulṭanna tur sum pawh cheng vaibelchhe 611.65 dah a ni.

17. Vibrant Village Programme-II kan kalpui ṭan a, hei hian ramri khua 109 a huam ang.

18. Buhfai lama harsatna kan tawh loh nan Mizoram State Special Ration Package hmangin ṭan kan la a. He package hi chhungkaw 29,000-in an chhawr ṭangkai tawh a ni. Kum 2026–27 atan monsoon stock buhfai kan dah khawl tawh a. Stock enkawlna ṭha zawk kan siam avangin sawrkar sum luangral tur cheng vaibelchhe 73.24 vêl zet kan hum a ni.

19. Ration sem dan phung pawh SMART-PDS hmangin kan tichangtlung a. Mualkhang LPG Bottling Plant lian zawk siamna tura kan thawk a, kudam 24 sak mek a ni.

20. Kawlphetha lamah Megawatt 10 pe chhuak thei Thenzawl Solar Plant chu kan hawng tawh a. Megawatt 24 pe chhuak thei tur Tuirini Small Hydel Project pawh kan thawk tan a. Tuirini Project hi kan zawh hunah chuan kum tin kawlphetha unit million 64 vêl a pechhuak thei dawn a ni.

21. Tui in tur hnianghnar kan neih theih nan NESIDS, AMRUT 2.0, SASCI leh NABARD kaltlangin project lian tak tak kan thawk mek.

22. Khawpui hrang hrangah cheng vaibelchhe 467 chuang sengin hmasawnna ruhrel din leh chei hna kan thawk mek.

23. Industry-a hma kan sawnna tura kan hmalakna - Luangmual, Pukpui, Zote leh Kolasib-a Flatted Factory Complex sak mek te chu zawhfel ṭep a ni tawh a. Ramria sumdawnnaah hma kan sawn theih nan Zokhawthara Land Customs Station pawh tihchangtlun a ni a, Integrated Check Post-ah hlan kai kan tum a ni.

24. Khualzin lo lut an pung nasa hle. Tourism-ah tan kan la zel a, kan hmathlir tam tak zingah India thlasik khawpui “Winter Capital of India” atana Aizawl siam tumna a tel.

25. Mizoram State University (Amendment) Act, 2026 kan siam a, chak takin kan bawhzui a. Mizoram Engineering College-a kan hmalakna hi April 9 khan AICTE pawmpuina kan dawng a, kum 2026-27 session-ah chuan class ṭan theih kan inbeisei.

26. Ruihhlo ngai enkawltuten rualkhai leh mumal zawka inenkawlna an kalpui theih nan Mizoram Drug Treatment-cum-Rehabilitation Accreditation System chu duan niin, Rehab Centre 21 te an inziaklut tawh a ni.

27. Demand reduction lama kan hmalakna langsar tak chu Hulhliap Short-Stay Centre a ni a. Kohhran leh tlawmngai pawlte nen thawkhoin ruihhlo ngaite kan enkawl a, skill training-te kan pea, pek tlak nia kan hriatte hnenah CM Special Package kan pe hial a ni.

28. Infiamna lamah pawh Bana Kaih Empowering Mizoram Sports (EMS) kan kalpui mek a. Olympic Games 2036 lo awm turah Mizo infiammite an tel theihna tur thlirin talent nei ṭha naupangte thlang chhuakin kan kaihruai mek. Nippon Sports Science University, Japan-te nen ṭangkawpin EMS digital portal kan siam a; hei bakah hian sports discipline 8 thlang chhuakin a bika training buatsaih a ni. Heng kan hmalaknate avang hian “Best Upcoming State Promoting Sports and Physical Education” Award kan dawng nghe nghe.

29. MUHCS kalpui mekah hian April 2025 aṭanga April 2026 chhungin damlo inenkawlna senso cheng vaibelchhe 178.58 pek chhuah a ni.

30. Khua leh tuite dikna chanvo humhimsaktu tur Mizoram State Human Rights Commission kan din thar a, criminal justice system tiphuisui turin Directorate of Prosecution kan din a. Mizoram Regulation of Inner Line Pass, 2026 hmangin Inner Line Permit pek dan kan siam ṭha a, traffic inrelbawlnaah mipuite nen thawhhona ṭha zawk kan neih theih nan Aizawl City Traffic Police Warden Scheme pawh kan hmang ṭan.

31. Zu leh drugs zuartute dona kawngah beihpui kan thlak a, mi engemawzat man leh case siam sak an ni. Kan ram loneitute tharchhuah aṭanga fruit beer siam leh zawrh chhuah dan tur ruahmanna kan siam thar a. Hriselna kaihhnawih atana a mamawhtuten Indian Made Foreign Liqour an lei theihna tur special permit ‘red card’ kan siam bawk.

32. Khuarel chhiatna thleng thei laka kan himna tur National Landslide Risk Mitigation Programme, Project Pre-Feasibility Report kan buatsaih a, NDMA ah kan thehlut tawh a. Aizawl, Siaha, Champhai leh Serchhip District chhung hmun hrang hranga lung tla leh leimin nasa thlen theihna hmunte chu zirchiangin a tihziaawmna tur ruahmanna kan siam.

33. India rama ramngaw nei zau ber kan la ni chhunzawm zel hi a lawmawm a. Green India Mission, Project Tiger, Project Elephant leh CAMPA hmangtein hma kan la a; kumin chhung khan ram hectare 1800 a zauah thing kan phun a ni. Ram kang venna lamah leh ramsate venhim kawngah pawh hma kan la zel a. 70 People’s Biodiversity Register pawh kan buatsaih fel tawh a ni.

34. Kan ṭhalai hna zawng mekte tan Model Career Centre, MYC leh Employment Exchange kaltlangin counselling te leh career guidance te kalpui thin a ni a. In sakna leh construction work hrang hranga inhlawhfate tan Mizoram Building and Other Construction Workers Welfare Board hnuaiah hamṭhatna tam tak siamin, ṭanpuina dawngtu pawh hi mi 21,000 an awm tawh, tihte an ni.

Chawimawina leh lawmman dawngtute lawmpuina a hlan bawk.

Parade Lawmman dawngtute chu:

Armed Contingent: Pakhatna 34 Assam Rifles, pahnihna 5th IR Battalion, pathumna 1st Battalion, MAP

Unarmed Contingent: Pakhatna Sainik School Chhingchhip, pahnihna 20 Mizo Battalion NCC, pathumna 1st Battalion MAP English Medium School Scout & Guide.

School Contingent: Pakhatna Mt. Carmel School, pahnihna Synod HSS, pathumna St. Paul HSS.

Parade Commander hi B. Lalthakima, MPS, Dy. SP a ni a, 2nd Commander hi Zodinsanga Khiangte, MPS, Dy. SP a ni.

Chief Minister hian lawmman chi hrang hrang a sem nghal a, a dawngtute chu:

State Award to Teachers, 2026 dawngtute:

1. Lalrinmawia Pachuau, Headmaster, PM Shri Govt. Kawrthah, PS-I

2. H. Zohmingthanga, Headmaster, Cheural Sianglairun M/S

3. Lalhmunsiami Fanai, Headmaster, Govt. GM H/S, Champhai

4. C. Lalhmingmuana, Principal, Baptist HSS, Lunglei.

Police chawimawina dawngtute:

1. Lalmuanthangi, Dy. SP (M) – President’s Medal for Distinguished Service

2. Seju P. Kuruvilla, IPS, IGP (ANTF) – Medal for Meritorious Service

3. Lalruatsanga Tochhawng, MPS, Sr. SP, Wireless - Medal for Meritorious Service

4. MC lalhmingthanga, Inspector - Medal for Meritorious Service

5. Fredy Lalramthara, Inspector – Governor’s Gold Medal

6. Melody Lalmuanpuii, Inspector - Governor’s Gold Medal

7. John Vanlalruata Sailo, Sub Inspector, Cyber Crime - Governor’s Gold Medal

8. C. Zodinpuii, Sub Inspector, END - Governor’s Gold Medal

9. Lalsangvunga Sailo, Asst. Sub. Inspector, END - Governor’s Gold Medal

10. C. Lalrinpuia, Havilder, 1 Bn MAP - Governor’s Gold Medal

11. C. Lalfakzuala, Hon Head Constable, CID (SB) - Governor’s Gold Medal

12. C. Vanlalrosanga, Constable, Anti-Narcotics Squad - Governor’s Gold Medal

13. Israela, Constable, Anti- Narcotics Squad, Aizawl - Governor’s Gold Medal

14. H. Laldingliani, Constable, END, Kolasib - Governor’s Gold Medal

15. S. Zahmingliana, Constable, END, Mamit - Governor’s Gold Medal

16. R. Lalhmangaiha, Constable, 5th IR Bn

17. Mary Lalthazuali Hnamte, Sub Inspector, Aizawl DEF - Governor’s Silver Medal

18. Jonathan Lalbiakkima, Asst. Sub- Inspector, Champhai DEF - Governor’s Silver Medal

19. Lalneihsanga, Asst. Sub Inspector, Khawzawl DEF - Governor’s Silver Medal

20. Lalsawma, Head Constable, END, Champhai District - Governor’s Silver Medal

Chhunah Mizoram Governor General (Dr) Vijay Kumar Singh, PVSM, AVSM, YSM (Retd) chuan Lok Bhavan-ah Governor’s At Home a buatsaih a. He hunah hian Chief Minister leh sawm bik mi pawimawh ten zalenna champha lawmna pualin thingpui inhona an nei a ni.