ZPM Treasurer hlui C Laltanpuia'n ZPM a chhuahsan

Aizawl | July 9, 2026: ZPM Treasurer hluiin leh Nimin maia Consultant atanga an ban tak C Laltanpuia chuan vawiin khan ZPM a chhuahsan.

"Hei hian nang leh kan party a kan rawngbawlpuite pawi a lo sawi palh a nih chuan in mi hriatthiamna dil chungin kei chu he kan party ZPM atang hian ka lo chawl rih mai ang e," tiin C Laltanpuia chuan an party a chhuahsanna lehkhaah hian a ziak a.

C Laltanpuia chuan, "kan Party-in sorkarna kum thum dawn kan lo chan mekah hian ram tana hmasawnna ro tling tur ruahmanna mumal, thangthar lo la awm tur te tana ei leh bar a intodelhna ngelnghet siam kawngah hian hmalakna mumal kan hmu lova, kei lah hi kan ram hmasawnna atan a rilru hmanhmawh chi ka nih avangin kan tlai chhe zo dawnin ka hria a, ka thiam dan leh phak ang tawkin chu policy chu ka lo auchhuahpui ta a ni. Hei hian nang leh kan party a kan rawngbawlpuite pawi a lo sawi palh a nih chuan in mi hriatthiamna dil chungin kei chu he kan party ZPM atang hian ka lo chawl rih mai ang e," tiin an party a chhuahsan thu hi ZPM President hnenah ziakin a thlen a ni.

Dated:9 July, 2026

The President

ZPM General Headquarters

Republic veng, Aizawl.

Subj: Party Primary Member atanga chawlhna.

A hmasain ram leh hnam tana rawng i bawlnaah tluang taka i kal zel theih nan duhsakna ka hlan a che.

Kan hriat angin ram rawngbawlnaah hun rei tak kan lo thawkho tawh a, vawi in niah chuan sorkar-na hial kan lo chang ta a, he Party kan din chhan ber hmasawnna leh khawvel ram dangte rual a ke pen ve a, mahni ke-a dingchhuak thei tura ruahmanna siam kha a ni a. Kawng tam takah chuan hmasawnna kan hmu mek zel a, a lawmawm takzet a ni.

Amaherawhchu, kan Party-in sorkarna kum thum dawn kan lo chan mekah hian ram tana hmasawnna ro tling tur ruahmanna mumal, thangthar lo la awm tur te tana ei leh bar a intodelhna ngelnghet siam kawngah hian hmalakna mumal kan hmu lova, kei lah hi kan ram hmasawnna atan a rilru hmanhmawh chi ka nih avangin kan tlai chhe zo dawnin ka hria a, ka thiam dan leh phak ang tawkin chu policy chu ka lo auchhuahpui ta a ni. Hei hian nang leh kan party a kan rawngbawlpuite pawi a lo sawi palh a nih chuan in mi hriatthiamna dil chungin kei chu he kan party ZPM atang hian ka lo chawl rih mai ang e.

Party a kan thawhhona, mawhphurhna min pek te leh in mi duhsaknaah lawmthu ka sawi a. Kan hmangaih Mizoram tan hian theih tawp chhuah zel ula, he ram hi chhuan tam tak tan innghahna tlak `Ro' phumtu lo ni ngei turin nang leh i thawhpuite duhsakna ka hlan a che u.

(C LALTANPUIA)

Chanmari, Aizawl.