ZONUN MAWI NGE YMA / MUP NUN MAWI?

~ JH Biakmawia

YMA Life Member (1976)

June ni 15/1935-a Zosapte hruainaa vawiin thlenga Mizote zinga NGO hlu leh chhuanawm tak YLA/YMA din a nih hma leh kum 1894-a Kristian Missionary ten Chanchin Tha an rawn hril hma daih khan ziakin dah nilo mahsela tuna YMA Thupui leh a dinchhan/thil tum tha tak tak te hi Mizote zingah ataka kalpui a lo ni daih tawh. Tanpui ngai te tanpui te, Thlan laih te, Zualkova tlan te, Mithhi lumen te, Khawhar lenpui leh inral te, damlo tlawh leh menpui te, Damlo zawn/Mitthi zawn te leh a dang tam tak kha Zonun Mawiin a ken tel tlat te an ni. YMA a pian hma daihin kan Pi leh Pu te nun mawi kha vawiin thlengin kan la vawng tha a, YMA hi ding ta lo sela an bo vek tawh angem? “BO VEK LOVANG” kan ti a nih pawhin “chhawm nungtu leh vuan tlattu NGO kan neih chu YMA NGEI HI A NI E” tih chu hnial rual a ni lo ve.

YMA hruaitu : CYMA, Sub-Hqrs, Groups, Joints, Branches Elections kan neih thinah te hian Campaigns awm thina sawi kan hre teh tlat thin a. Hruaitu fel leh taima te hnung zuiin kum 1968 atanga 1997 thleng khan Office Bearers zingah ka telve a, Campaigns lam hawi ka hriat ngai loh avangin – YMA ELECTIONS TEA CAMPAIGNS AWM THIN TIH HI CHU KA AWIH THEI LO. Votes a darhsarh lutuk loh nan tiin Nomination chu siam chang a awm a, Nominated zingah pawh thlan tlin nih nana lo khel (play) an awm kan hre ngai lo mang e. YMA meuh pawh hian sawipawr duhtu a nei ve a ni maiah ngai ila.

YMA hruaitu nih emaw Active Members nih emaw hi zawng – Mi te tana hlawh nei hauh lova rawngbawlna a ni si a. Heti taka tangkai em em a nih avang erawh hi chuan hun tam takah Fak leh Chawimawi a lo hlawh thin a, a la hlawh zel bawk ang. Khawtlangah leh Ram pum huap meuh pawhin YMA ngaih dan leh duh dan chuan bengkhawn a hlawh thin a, Sorkar meuh pawhin YMA thu leh hla chu a ngaichang thin a nih tak hi. Heti taka YMA/MUP-in hmun pawimawh a luah takah hian Thuneihna(Executive Power) chelhtu ni ta hiala inngaih palh erawh chu a awm thei hial ang. YMA/MUP chu roreltu ni lovin kan khawtlangah leh kan ramah hian roreltu te tawiawmtu, tichaka fuihtu ni zel rawh se.

Mizo kan nih avanga ZONUN MAWI kha YMA/MUP a pian hma daiha kan Pi leh Pu atanga kan pianpui te kha, A CHUAI TA DEUH tih chang a awm pawhin YMA bawk hian a tuai tharin a chhawm nung thin a nih hi. Kum 30 zet chu a ni ta e, chhiat tawh hun a lo thlen hian chhiat tawk chhung te atanga thusawiin LAWM THU kan sawiin, “Kan YMA te… “ tiin kan sawi thin. Mizo Nunmawi tak kan kalpui mek hi kan ti YMA ta lutuk alawm maw le… tih hi kan Senior Citizens thenkhat ti ti atanga hriat tur a awm zeuh thin. Mizote kan nih avanga kan Bat/Tihtur a kan ngaih sa reng a ni si a… tiin.

Hruaitu te phei chu fak leh chawimawi nih aiin “Rel bur” nih chang a tam thei khawp mai. Natural Calamity emaw, Accidents emaw Thihna hial a lo thlen te hian, “Khawnge kan YMA Hruaitu te hi? An hmel a va lang lo/lang har ve? Tih tawngkam han hriat te hi a nuam lo. Mizo tlangval/nula te chuan kan tih ve theih apiangah hma kan lo la ve thin tur a ni zawk e. Hruaitu te phut reng reng leh khawi kipah/eng hunah pawh Hmahruaitu ni zel tura kan phut palh a nih chuan a fel lovanga, Tlawmngaih chhuaha hruaitu chanvo chelhtu te rilru kan hliamin insitna avangin an tinsan mai ang tih a hlauhawm hlel lo ve. Chhungkuah, eizawnnaah mi tul tak tak, indaih lo ve tak te an ni ve si a. Hruaitu tur kan inhmu zo lo palh mai ang tih hlauvin YMA / MUP dinchhan leh thuvawn te hi Zonun Mawi pianpui ten kan kalpui mai tur niin a lang e. Tanpui ngai te kan tanpuiin, hei YMA hmingin kan rawn thawk e… kan ti kher ngai lo va, Zonun Mawi tung dingin kan tha leh zung kan seng thin a ni tih hre tlat ila.

A chhe lam, a tha lamah kan Zonun Mawi te hi kan ti YMA ta lutuk thei ve bawk tih hriain, a chhawm nungtu leh tungdingtu nih tum theuh ila : chutianga kan chetnaa YMA-in hming that a lo hlawhin thik hauh lo ila – Keimahni vek kan ni si a, Zonun Mawi leh YMA/MUP vul reng rawh se.

18.09.2024 (J.H.BIAKMAWIA)

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]