MENG RENG MUMANG

~ David Sailo

28th July 2026

MUMANG CHU:

Khehpuam hi a hlawk a niang, hmanah ka mang tawh a, ka mang phan leh ta a ni.

Ka lo kheh ve leh a lawm mawle, tah chuan ka nei ve tawk viau tawh a, khehpuamah mai ni lovin Smuggling thil dangah pawh ka hmingchhe ve zuai zuai a, mahse chutih lai chuan tuman min chîk teh chiam lo. Keipawh SUM ber ka nei tho a, pawi tihna leh pawisak vak ka nei lo. Sum thiltihtheihna hi ka lo hrechiang khawp mai a, kan Politician te nen SUM lam tluangah 'HOW DO I GET MONEY' tiin kan tlan ho ta dual dual a... a tlan chak pawl ka ni bik ta hauh lo a!!

FARM-HOUSE NEN:

"Aizawl chu insawi sep sep kan peih e mai..Social Media pawh keu ṭha ngam mang lovin kan awm reng a" tiin ka sum hmanna zawn pahin Delhi daifem, hla lutuk si lovah Farmhouse tur ka lei ta a, changkang takin ka cheibawl a, ka chamchilh a, nula lam leh Drinks nen lam hnianghnar takin ka thuam a, a fianrial ṭha angreng sia, a tih chi phian.

Ka khawsa tê vak lo bawk a, ṭhianṭhate aṭang te in Politician ṭhenkhat, India Hmarchhak lam te nen kan inbe ṭha cho a, hmelhriat leh ka Farmhouse tlawh a rawn tlangnel milian leh thiltithei, nuam ti tak tak ka chhar thar ta ṭeuh mai a..A fuh chho zel a, NUN hi a tluang chho viau hian ka lo hria a, Sorkar lam thil pawh ka hre thuk thei ta khawp mai.

INHMUN KA COMMISSION:

Chutianga hun ka hman zarah chuan vaipa hausa tak mai hian Mizoramah inhmun lei tuma a veh a veh thu ka hre ta a, a ngam huai bawk si a, Delhi a awm deuh reng chu Mizoramah vaipa inhmun tur chu ka buaipui ta a ni. Ka buaipui vanglai chuan buai tak hi ka ni!! Inhmun chu dan leh dan lo pawh chingfel thlip thlep lem lo chuan ka hmanhmawh em avangin nuai 10 man vel tur chu nuai 1200 vela a lei duh avangin tlawm te te in ka lei ta a, vaipa hnenah ka hralh ta a ni.

KHEHPUAM AIA HLAWK:

Khehpuam kha a hlawk viauin ka lo hria a, mahse kha ai khan a hlawk dan chu namai lo tak a ni. A hlawk a ni satliah lova, mi thiltithei pui pui hi ka bawhbeh phah nasa hle a, an ka an ang ngam lova, keipawh ka ká ka ân a thiang hek lo.

Helai Game vel hi nuam ka lo ti khawp mai a, ka lo nui chhuak hial a ni awm e. Smuggler a hriat hlawh lak lawh tawh kha mi thiltithei pui pui biak râwn, a ruka an biak fo han nih kha nuam tak a ni.

MAHSE KA HARH!!

Nuam vanglai ka leng phar phar lai chu tawp chawih na tur khawp ka hmu tlat. Delhi a ka Farmhouse hrulah chuan mi pakhat, ka la hmuh ngai reng reng loh hi a lo vei sek mai a, a chhungah chuan tutenge lut chhuak tihte chu Note bu ah hian a lo chhinchhiah nghauh nghauh hi ka hmu fuh a, a ban lehlamah chuan LSC hi a lo zakzeh ṭeuh bawk a, ka Phone Number a ka biak ṭhin ho Number hi a lo ziak tlar dul bawk a.

Chu mai a ni lo, Bank Account Statement hi File pakhatah hian a lo zakzeh tel bawk a, chupa chu ring taka auh vak ka tum a, ka harh ta zawk mai. Thlan fim hial min lo bual huh vek a lo ni a.

TLIPNA:

Ka Burma thosilen zar a chung kiar uai fual hnuang tawh, ka dul rawn si lek lek chu chung lam hawi zawngin ka beng pawng chho pawp a, ka in let thawk a..."Hausak hman tawh teh reng nen, mumang mai mai lah ni" ka ti nuap nuap a !!

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]