YMA Electric Veng Branch-in Thisen Unit 100 pe; C Lalremruata'n a vawi 100 nan thisen pe bawk

Aizawl | July 24, 2026: YMA Electric Veng Branch-in Thisen Unit 100 pe; an veng tlangval C Lalremruata'n a vawi 100 nan thisen pe bawk.

Mizoram a Unit tlinga thisen vawi 100 pe hmasa ber – C Lalremruata, Electric Veng Aizawl

July ni 24, 2026 (Zirtawpni) chawhma dar 11:00 khan Electric Veng YMA Hall-ah Electric Veng Branch YMA chuan an Member Tv. C. Lalremruata, Mizorama Unit tlinga thisen vawi 100 pe hmasa ber pualin Thisen pek runpui an buatsaih. He hun hi Pi Lalrinpuii, Hon’ble Minister, H&FW chuan a hmanpui.

Pi Lalrinpuii, Hon’ble Minister chuan thusawiin “Tv. C. Lalremruata’n a vawi 100-nan a, unit tlinga thisen a pe chu a ropui a tih thu leh midangte ṭanpui nan leh nun chhan nân 100 a pe thei ta hi zahna chibai ka buk a, Pathianin vengin awmpui se, hei aia tam a pek zel ka beisei a ni,” a ti a, lawmpuina thuziak leh pawisa fai a hlan bawk.

“Thisen pek hi a pawimawh hle a, kan mihring puite nun chhanhim nan thisen pek hi kan uar deuh deuh a ngai a ni .Thisen mamawhtu damlo an pung tual tual a, thisen mamawhna a sang tual tual. India ramah pawh a ti ṭha pawl tak kan ni a, thisen pek hi a mimal leh pawl anga kan uar zel a ngai a ni. Nunna hlu tak chhan nân thisen pe turin ka ngen a che u, tiin kalkhawmte a sawm a ni.

Pu C. Lalnunfela, Electric Veng YMA President chuan “Electric Veng tan ni chhinchhiah tlâk tak a ni, vawiin hi a ropui bîk em em chhan chu kan Member Tv. C. Lalremruata’n thisen Unit tling ngeiin vawi 100 a pek ni a ni a, a Member puite chuan kan chhuang tak zet a ni” a ti.

Tv. C. Lalremruata hi chawimawina leh lawmpuina thuziak mi eng emaw zatin an hlan a, Electric Veng YMA Member mi 100, Mipa - 94, Hmeichhia - 6-in thisen hi an pe a ni.

Pu K.Sapdanga, Hon'ble Home Minister, Bialtu MLA chuan Electric Veng Branch YMA hnenah ₹15,000/- lawmpui nân a hlan bawk.