Mizoram Diabetis Society (MDS)-in annual general meeting hmang

Aizawl | July 24, 2026: Mizoram Diabetis Society (MDS) General Hqrs, Annual General Meeting Dr R Lalchhuanawma, Mission Director, National Health Mission in a hmanpui.

Vawiin Chawhma dar 11 khan Mizoram Diabetis Society (MDS) General Hqrs. Mizoram chuan I&PR Auditorium-ah Annual General Meeting an nei a, Dr. R. Lalchhuanawma, Mission Director, NHM chu khuallian a ni. He hun hi Pu T. Saikunga, President in a kaihhruai a, kalkhawm te hnenah lawmthu sawina a nei bawk. Pu C. Lalhmingthanga, Jt. Secretary, MDS in report a pe a, Mizoram Diabetis Society chu 13.4.2009-a din tan a nih thu leh member 1096 an awm mek thu leh an member mi 209 thi an awm tawh thu a sawi. MDS-ah hian tupawh member a nih theih thu leh Sawrkar Registration nei thlap a ding an nih thu a sawi bawk.

Khuallian Dr. R. Lalchhuanawma chuan Diabetis pawl a ding chu lawmawm a tih thu a sawi a, he pawl hi Diabetis vei tam tak te tan malsawmna thlentu anih ngei ang tih sawiin theihtawpa hmala chhunzawm zel tura a duh thu a sawi. Khuallian chuan Diabetis vei avanga thi hma turah indah ngawt tur a nih loh thu leh chumi tura insum ngai leh eitur tha erawh chu kan ei a, kan tih a ngaih thu a sawi a, Kan hriselna hi kan kutah a awm a, inthlahdah lova kan nun uluk a pawimawh a ti a. Mizoram pumah mi 100 zela mi 6 vel bawr zunthlum vei ang kan ni a, India ram hriselna lam tehna-ah Kum 15-49 inkarah hmeichhia 100 zel a 5, leh Mipa 100 zel a 7 te zunthlum nei kan awm thu a sawi bawk a. Kan ei leh in fimkhur tawk loh avang leh kan nunphung kan uluk loh vang a nih thu a sawiin tunlaia natna kan vei nasat em em Natna inkaichhawn theih loh ; Zunthlum, Thisen sang, Heart Attack, Stroke etc.. kan tih te-ah NHM hnuaia Programme pakhat NP-NCD in nasa taka hma a lak thu leh heng natna kai/vei hmaa invenna dan turah rim takin hma a lak dan a tarlang bawk. Kalkhawmte chu mahni hriselna ngaipawimawh a, Ei leh in tha chauh ei a, nunphung uluk taka hmang a, Exercise tha taka la a, hriselna tha tak nei zel turin a chah a ni.

Pi Margaret Lalremruati, Dietician, Civil Hospital, Aizawl in Hriselna atana eitur tha ei dan tur chungchang zirtirna a nei a, Diabetis veite in enkawl dan tur chi hrang hrang sawiin invent dan tur dik a kawhhmuh bawk. Hriselna hi ro hlu a nih thu leh kan damchhung reilo te pawh hi rohlu anga kan ngaih a ngai a, kan lo hrisel zawk nan Thlai hring lam ei uar turin a duh thu a sawi bawk. Hriselna atana pawimawh em em chu a tawk chiah a chaw ei a nih thu te Exercise regular taka lak a pawimawh a ti a. Pathianin a hun min pek Mut hun leh thawh hun dik taka hman a pawimawh a, kan taksa peng hrang hrang hi duat a tul thu a sawi bawk.

Kum 2026-2028 chhunga MDS hruaitu tur hetiang hian an thlang ;-

President - Dr. Eric Zomwia

Vice President - 1) Pu T. Saikunga, MJS (Rtd) 2) Rev. Dr. F. Sangkhuma

Secretary - Er. R. Lalthakima, MES (Rtd)

Joint. Secretaries - 1) Pu C. Lalhmingthanga 2) Pu KL. Liannghaka

Treasurer - Rev. Biakliana Sailo

Finance Secretary - Pi H. Ramsiamthari

He meetingah hian kum 2026 chhunga an member thi mi 7 te an ui zia leh an hrereng a nih tih lan tir nan sunna hun an hmang a, Dr. Eric Zomwia, Vice President chuan kalkhawm te chungah lawmthu sawina a nei a. National Health Mission te nen-a thawhhona tha tak an neih avangin leh NP-NCD Staff ten kalkhawmte hriselna an ekdik sak avangin NHM chungah lawmthu a sawi a, Diabetis mai piah lamah hriselna atana thawktu an ni tel chu lawmawm a tih thu a sawi bawk.