Lawngtai district-a SIR 2026 kalpui mekah Lawngtlai DEO, Lawngtlai East MLA, Central YMA leh Cenral YLA hruaitute inkawm

Lawngtlai, July 23, 2026: Deputy Commissioner Conference Hall-ah District Election Officer (DEO) Donny Lalruatsanga kaihhruaiin Special Intensive Revision (SIR) 2026 kalpui mek chungchangah Central YMA leh CYLA hruaitute, Lawngtlai East MLA Dr Lorrain Lalpekliana Chinzah leh Lawngtlai District hruaituten inkawmna an nei.

Thutkhawmah hian Central YMA Assistant Secretary SF David Ngursangzuala chuan tuna Electoral Roll siam mek chu Mizoram hmalam hun nghawng thui tak tur a nih angin fimkhur tlan a tul hle tih sawiin, hming chuang theilo tur te an chuan palh lohna turin thawktute chu dik taka hna thawk turin a ngen, helam hawia Central YLA hmalakna chu Central YMA chuan a thlawp tlat a. Hemi kawnga sawrkar hnathawk ten dik taka hma an lakna kawnga an lakna vauna emaw harsatna siam emaw an awm chuan Central YMA chu an kianga an din tlat tur thu a sawi.

Central YLA President F Lalrothanga pawhin hearing neih mekah dan kalha E-Roll-a luh tum awm theihna khuate chu CYLA in an thutchilh vek thu leh Branch YLA-te pawh theihtawp chhuah tura hriattir an nih thu a sawi bawk.

DEO Donny Lalruatsanga chuan Lawngtlai District chu Myanmar leh Bangladesh ramri intawm, raltlan engemawzat awmna a nih vangin E-Roll siamnaah fimkhur a ngai hle tih tarlangin, NGO, VC leh Kohhrante nen thawhhona tha tak an neih thu a sawi a. Lawngtlai East MLA Dr. Lorrain Lalpekliana Chinzah pawhin Electoral Roll dik leh rintlak a awm theih nana Central YMA leh Central YLA hmalakna chu fakawm a tih thu sawiin, Political Party-te pawh thahnemngai taka tawiawm turin a sawm bawk.

Election Officer Collin Hlychho tarlan danin Lawngtlai District Draft Roll-ah hian vote puitling 90,699 (Mipa 45,311 leh Hmeichhia 45,388) an awm mek a, SIR 2026 kalpui hma a vote 95,564 awm thin atangin vote 4,865 paih a ni. Assembly Constituency pathumah insawifiah ngai (Anomalies leh Discrepancies) mi 32,373 awmin, July 21 atanga August 10, 2026 thleng E-Roll-a inthun leh paih hun kalpui a ni ang a, September 6, 2026-ah Final Electoral Roll tarchhuah a ni ang.

He thutkhawm pawimawh takah hian ERO, AERO, BLO te, MJA, CYLA, MHIP leh VC Association hruaitute pawh an tel a ni.

Central YMA aiawh te hian ni 23.07.26(Ningani) zanah Chawngte an thleng leh a, Central Young Chakma Association te leh AERO te nen an inkawm a. Vawiin 24.07.2026 (zirtawpni) zing dar 8:00 khan Chawngte BDO Lalnunpuia Renthlei office a hearing an neihna hmunah an telpui leh a ni.