HUN HARSA AH PAWH PATHIAN I RING TAK ZET EM?

_Pathian Ṭhatna Hnuaia Len_

By Rick Warren

July 7, 2026

“Aw Pathian, i hnênah ka lo tlulût ta a, min lo hum rawh. Lalpa hnênah, ‘Ka Lalpa chu i ni, nang chauh hi ka tân i ṭha,’ ka ti a.” [Sam 16:1-2]

I nuna thil thleng zawng zawngte kha an  ṭha vek kher lo. Mahse Pathian erawh a  ṭha – i nunah a  ṭhatna a chhungkhat fo ṭhin. 

I hun tawn mek kha a harsa a ni mai thei, amaherawhchu Pathian chuan thil  ṭha lo chu thil  ṭhaah a chantir thei a ni. Hun harsa berah pawh hei hi i ring thei ang: Pathian chuan tum mumal tak a nei a, a chhan leh vang a hrechiang a, a bulthum aṭangin engkim a hmu tlang vek. 

Sam 16: 1-2 chuan hetiang hian an sawi, ““Aw Pathian, i hnênah ka lo tlulût ta a, Min lo hum rawh. Lalpa hnênah, ‘Ka Lalpa chu i ni, Nang chauh hi ka tân i ṭha,’ ka ti a,” tiin. 

Tunah khan khawi lai hmunah pawh awm la, Pathian ṭhatna thu chu i inhrilhnawn thei ang. A chang chuan thil chhinchhiah theih dan ṭha ber chu ṭawngṭaina hmanga Pathian nena sawi dun a ni.  

Tunah khan thildang dah ṭhain a ṭhatna thu chu Pathian i hrilh thei ang em? Hetiang deuh hian i sawi thei ang: 

“Lalpa, i van ṭha em. I ṭhatnate hi ka phu ngai lovang. I ṭhatnate chu ka theihnghilh a, ka rinhlelh fo avangin pawi ka ti hle mai. Ka lawm tawk loh avang leh mahni hmasialna-chapona avangin min ngaidam ang che. I tel lo chuan engmah ka ni lo. Bible kan hmuh Lal Davida ang mai khan, i ṭhatna thu ka hriat loh chuan ka hnual hle ang. I ṭhatna thukzia ka hriat theih nan ka mit min tihvarsak la, i ṭhatna chuan ka nun hi thlak danglam vek rawh se.  

“Lalpa, ka thlarau hian i siamtharna a mamawh a. Ka ngaihtuahnate hi a dik lo fo. Ka thlang reng lo che a. Keimah pawhin dik ka inti reng lem lo. Ka thla hliam hnu, ka rilru na, ka duhna ṭha lo leh rilru hliam hnu hi tidam leh rawh. I ṭhatna te chu ka zir thar leh zel ang chiahin, ka sualnate chu ngaihdam an ni tih ka hria e, a chhan chu i bulah ka lo kal a, chhandamtu chu ka mamawh si a. Min tinatute chu ka ngaidam dawn a, anmahni ṭhatna dilin ka ṭawngṭaisak dawn a ni. Ka phurritte chu chawi kang turin nangmah ka thawhpui dawn che a, chung chu Isua hmingin ka dil e, Amen.” 

Pathian ṭhatna tarlangtu ropui ber mai chu Isua nun, thihna leh thawhlehnate chu an ni. A chhandamna chu i chan tak tak hma chuan a ṭhatna tak tak chu i hmelhriat ngai lo vang. Isua chu i chhandamtu a la ni lo a nih chuan he ṭawngṭaina hmang hian ṭawngṭai ang che: 

“Isua Krista, nangmah hriat che ka duh a. Nangmah hmangaih che a, nangmah rin dan zir chu ka duh e. Ka sualnate avangin min ngaidam ang che. I chhungte zingah chuan min lo pawm la, ka phu vang ni lovin, kraws vang zawkin, chutah chuan ka sual man bat chu min lo tlaksak tawh si. I chhandamna thilthlawnpek avang chuan lawmthu ka sawi e. Ka lo lawmin ka Lalpa i nihna anga rinawm taka ka zui theihnan che min pui ang che. Isua hmingin hengte hi ka dil e, Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

Ngaihtuah zui atan. 

Pathian ṭhatna pawm duhlohna chu eng vangin nge chapona a nih theih? 

Pathianin i nuna thil ṭha lo thil ṭhaa a thlak danglam lai chu engtiangin nge i lo hmuh ve tawh? 

I nun i thlir kir changin i nuna Pathian ṭhatnate chu engtin nge i hmuh a, i tun dinhmuna buainate i hmachhawn danah engtin nge a tihchak che? 

*[Lettu:Sangpuia]*