Ex Minister F Malsawma a herliam!

Aizawl | July 4, 2026: Ex Minister F Malsawma, Chaltlang Bethel, Near MBSE chu zanin dar 7:30 khan Trinity Hospital, Aizawl ah a boral.

F Malsawma nupui Zorami hi hranghlui zaithiam Laikunga Hmar fanu a ni.

Pian leh murna:

Pu F. Malsawma hi Pu Khawtinkaia (K.T. Kaia) (L) leh Pi Sangkungi (L) te fa tlum ber a ni a. Zanlâwnah October ni 2, 1947-ah a piang a, kum hnih mi lek a nih laiin a pa hian a boralsan a, a nu-in Matric a pass hlim hlawtin (1966-ah) a boral san leh a ni. An unau zinga naupang ber a nih avangin a nu leh a unaute kaihhruaina hnuaia sei lian a ni a. A unau hmeichhiate hian pasal an neih hnu hian a nu leh a u mipa pali te nen an khawsa hova. Buh den, thlei leh ṭhâp leh tuichawi te bâkah inchhûng khawsak rél ṭul ang ang te hi tih hreh nei lovin a thawk ve vek ṭhin a ni.

An unau hi pariat (8) an ni a -

1. F Lalsângliani (L)

2. F Lianzâwni (L) W/o RK Pachhûnga (L), Kawnpui.

3. F Liankhuma (L)

4. Upa F Lianhlira H/o Biaksiami, Kawnpui.

5. F Lianchhûnga (L)

6. F Lalramchhana H/o Rozikpuii, Ramhlun Vênglai.

7. F Ngurfanzauva (L) H/o Laichhingpuii (L), Kawnpui.

8. F Malsawma H/o Zoramthangi, Chaltlang.

Zirna leh infiamna lam:

Primary School hi Zanlawn Khanṭhuam (tuna Zanlawn khua)-ah zovin, Middle School hi Kolasib leh Kawnpui-ah a kal a. High School chu St. John’s High School, Kolasib, Jawahar Lal Nehru (JNM) High School, Hmâr Chaltlâng leh Govt. High School, Shillong-ah a kal. Zirlai thiam thei tak a nih avangin an zirtîrtuten Class VIII an bawhkân tîr a. Pre- University (P.U.) hi St. Edmund’s College, Shillong-ah a zo va, St. Anthony’s College (Evening), Shillong-ah B.A. Honours hi a zo bawk a ni. Lehkha zir zawm tura Shillong-a a chhuk hian an khawsak a harsat avangin hostel- ah te a awm ve thei lo va, a pu (a nu nau) Hony. Captain F. Aibaka (L) te chhûngkua bêlin an bulah a khawsa a. 1972-ah Gauhati University aṭangin M.A. a zo leh a, M.A. hi First Class-ah a pass a, University-ah (Assam) palina (4) a ni pha hial a, a zir lai hian MZP leh Mizo Post Graduate Union debate-ah te pakhatna a la a ni. 1973 kum tîrah Pachhunga Govt. College (PMG, tuna PUC)-ah Lecturer (tuna Asst. Professor), Political Science Department-ah hna a zawm ta a ni.

Infiamna lam tui mi tak a ni a. Tun hmâ-a Assam rama lâr tak ṭhin ~ Steel Trophy (Hockey), 1971-ah Runner-up, 1972-ah Championship MZP hminga Mizoten an lâk ṭum khân a khêl ve.

Politics lam:

Mizoramah PC Party a rawn ding chho va, rambuai laia sipai ho hrâng kârah Brig Ṭhenphunga Sailo (Rtd.) chuan ram tâna pên chhuak ve turin a sâwm a, Politics-ah kum 1975, June khân a lût ve ta a ni.

Kum 1978 MLA thlanna-ah Suangpuilawn Bial aṭangin thlan tlin a ni a, kum 30 leh thla kua (9) mi chauh niin Brig. T. Sailo (Rtd.) Ministry-ah Cabinet Minister-in a lût a, a hunlai hian India rama Cabinet Minister naupang ber pâwl a ni.

1979-a MLA inthlanna neih a nih leh kh^n a Bial ngai aṭang bawkin thlan tlin leh a ni a, Brig. T. Sailo (Rtd.) Ministry-ah Cabinet Minister-in a lût leh a. Hetih lai hian Zoram politics hi a buaiin a chiri êm êm a, an term a zawh hmâ-in, “Remna leh Muanna kawng a awm theih nân,” tiin Minister nihna bansanin an chhûngkuain a puzawn Pu Laikunga Hmar te chhûngkua Châltlâng lamah an han fin ta a ni.

P.C. Ministry-ah hian Education (Social Welfare, Sports & Youth Welfare, School Education, Higher & Technical), Co-operation, Industries (Sericulture & Industries) Minister a ni.

Kum 1979-a Pu Choudhury, SDO, PWD, thih avanga buainaah, Mizo tam tak Silchar-a tangkhang te zuk luhchilha rawn hruai hawtu kha a ni.

Kum 1993-ah MNF Party ticket-in MLA-ah Aizawl North-II bial aṭangin thlan tlin a ni a, Estimate Committee leh Public Undertaking Committee-ah te Chairman a ni. Kum 1998-ah Aizawl North-II bial aṭang bawkin thlan tlin nawn leh a ni a, MNF Ministry-ah hian Cabinet Minister-in a awm leh a. School Education, Law & Judicial and Parliamentary Affairs, Health & Family Welfare, Tourism, Information & Public Relations Minister-ah a ṭang leh a ni. Kum 2013 aṭangin ṭhangtharte hmun ken ve tawh ṭha-a hriain politics chawlhsan a rilrûk a, 2015 khân politics hi a chawlhsan fel ta a ni.

A mizia leh khawtlâng lam:

Pu F. Malsawma hi ram hmangaihna thinlung thûk tak nei mi a ni a, lehkhabu ṭha tak tak chhûng inkhâwma hman chi leh ram leh hnam veina lam chungchâng te pawh a lehlin b^kah a ziak bawk a ni. A mihringpuite hmangaihna leh duhsakna thinlung nei mi niin mi pawisawi duh lo mi a ni. Harsatna leh retheihna tam tak lo paltlang tawh a nih avangin dinhmun ṭha a chan lai pawhin amah mamawha pantu mi harsa zâwkte hi a hawisan ngai lo. Y.M.A Life Member a ni a, Association hrang hrangah Patron leh Adviser nihna te a lo chelh tawh ṭhin a ni. A phâk ang tâwka khawtlâng inrêlbâwlna hrang hrang te ngaipawimawh mi a ni bawk a ni.

Rawngbawlna lam:

A pa boral hnu-a a nu-in Pathian thu-a a châwmlen chhungkua aṭanga seilian a ni a. A nu hi chhangchhe tak ni mah se, Kohhrana thuhriltu a ni ṭhin. An unau ho hi naupang Sande Sikul a kaikim, chângvawn leh in examna-a lawmman la ṭhin an ni. Zu leh ruihtheih thil lam ti ngai miah lo mi a ni.

1965 June thla-ah Chhandam nih inhriatna (Piantharna) neiin Class X a zirlai hun tam zâwk chu Pathian thu lam buaipui n^n a hmang ta a.

1966-a Madanrting Kohhran din chhotu zinga tha leh zung seng nasa ber pâwl a ni ve a, B.A. a zawh thlengin Madanrting-ah a awm a ni. 1967 (B.A. 1st Yr. a zirlai) aṭangin Pulpit-a thuhriltu ni ve-in tun thleng hian khaihlak awm lovin a awmna Kohhran apiangah a la ni zui ve zêl a ni.

Madanrting Branch KṬP din tirh a Secretary hmasa ber a ni a, kum 1966-1968 thleng Secretary hna hi a chelh a, kum 1968-1968 chhungin Asst. Secretary a ni bawk. Madanrting-ah hian naupang takin Kohhran Committee Member-ah a tel ve bawk a ni. Shillong-ah hian Pathian Thu a tuipuiin a theihtâwpin rawngbawlin a pên chhuak ve \hin a ni.

Gauhati University-a a chhuk hnu-in Mizo Kohhranah Secretary a ni a, E.U leh E.G.F (Evangelical Students Union & Evangelical Graduate Fellowship)-ah te theih ang angin zirlai a nih laiin a inhmang ve ṭhin bawk.

Mizorama a lo haw hnu hian Republic Veng Presbyterian Kohhranah kum 1974 khân Branch KṬP Asst. Leader a ni a, Kohhranah Thuhriltu leh Zirtirtu a ni ṭhin bawk. Kum 1974 tâwp lam khân Châltlângah an rawn chho va, Châltlâng Presbyterian Kohhranah hian Pathianni zan thuhriltu, Naupang & Puitling zirtirtu leh Committee peng hrang hrangah te a tel ṭhin. Kum 2002-a Chaltlang South Presbyterian Kohhran, Chaltlang Kohhran aṭanga a indan khân Pathianni zan thuhriltu, Puitling Sunday School zirtirtu leh Committee peng hrang hrangah te telin khawngaih rawngbâwl hna hi a chelh zui ve ta zêl a ni. Ni 22.08.2019 khân kum 52 (1967 - 2018) chhûng Sunday School Zirtirtu hna chawl lova a thawh avangin ‘Rawngbawlna Jubilee Certificate’ a lo dawng tawh bawk a ni.

ZEF, Leprosy Mission, Tortured for Christ leh Mission Foundation Movement bâkah Para Church lam rawngbâwlna peng hrang hrangah te theihtawp a lo chhuah ve ṭhin a. Tunah hian Chaltlang South Varanasi Prayer Network-ah Chairman ni lai a ni a, Varanasi Mission General Headquarters-ah Executive Member ni lai a ni bawk. Amah hi Kohhran.ngai pawimawh mi a ni a, rawngbawlna peng hrang hrang bâkah Kohhran Inkhawm leh Zing ṭawngṭai inkhawm te a ngai pawimawh >m >m ṭhin a ni.

Bible inghahna, a ngainat êm êm chu Thufingte 3:5-6 a ni a. Chhûng inkhâwm apiangin Thufingte 3:5-6 - ‘I thinlung zawng zawngin LALPA ring la, nangma hriatnaah innghat suh; I kawng zawng zawngah amah hre reng la, i kawngte chu a kawhhmuh zêl ang che,’ leh Marka 12:30 - ‘Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tur a ni,' te hi an sawi rual ṭhin a, an fate hna thawka chhuak tur hi ṭawngṭainain an nupain an thlah ziah ṭhin.

Pathian rawngbâwlna kawngah hian an nupa hi an inlungrual êm êm a, a nupui Pi Zoramthangi hi Châltlâng Pastor Bial Kohhran Hmeichhe Committee Chairman ni lai mêk a ni a, tin, Châltlâng South Kohhran Hmeichhe Committee Member ni lai mêk a ni bawk.

Chhungkaw lam:

Pachhunga Govt. College-a a thawh lai hian, June ni 7, 1974-ah, Republic Veng, Presbyterian Kohhran Biak Inah Zoramthangi D/o Pu Laikunga Hmar (L) & Pi C. Tlangthanmawii (L), Chaltlang nen Rev. V.L. Zaithanga'n a inneih tîr a. He tih lai hian Republic Vêngah in a luah a. Mo lawmna leh lawina hi Upa Selêtthanga leh Pi Lalchhingpuii, Upa H Thangmawizuala nu leh pa te inah neih a ni a, an ni hian nu leh pa chan an chan sak avangin a lawmzia hi a sawi fo ṭhin.

Pathian malsawmna dawngin fapa pahnih leh fanu pakhat an nei a.

Chungte chu -

1. Vanlaldina Fanai H/o Lalrammawii Tochhawng

2. Zoramchhana Fanai H/o Lucy Rampanzuali Renthlei

3. Rebecca Lalhriatzuali Fanai W/o Dr. Lalrintluanga Jahau

te an ni a, tu hi pakua (9) an nei.

Pu F. Malsawma leh Pi Zoramthangi te nupa hian Pathian malsawmna dawngin June ni 7, 2024 khan an inneih Golden Jubilee (kum 50-na) chhûngkhat laina leh ṭhian ṭhate nen Tourist Lodge, Châltlângah Pathian hnena lawmthu sawina hun an lo hmang tawh a ni.

A nat dan tlângpui:

Amah hian dam lohna hranpa a nei ngai lem lo va, kum 2023 vêl aṭang khân insawisêlna neuh neuh a nei ṭan a. Kum 2025 January thla tâwp lam khân Christian Medical College Hospital, Vellore-ah inentîra kalin Thyroid a nei tih an hmu chhuak a; ṭha chho zêl tura beisei a nih laiin June thla vel aṭang khân taksa lam chak lohna-in a tlâk buak ta fo a.

Civil Hospital, Aizawl, Trinity Hospital, Silaimual leh Ebenezer Hospital, Chawnpui Veng-ah te inenkawlin a awm kual a, August thla khân Civil Hospital, Aizawlah cirrhosis (thin ro) a nei tih an hmu chhuak a. January, 2026 khan Max Hospital, Saket, New Delhi-ah refer a ni a, hetah hian cirrhosis (thin ro) bâkah a thin hi a lo cancer (advanced stage) a ni tih an hmu chhuak a, a thinah hian bâwk (lesion) pali a awm a ni tih an hmu chhuak tel bawk a. Doctor ten enkawl zui nghalin Stereotactic Body.Radiation Therapy (SBRT) leh Immuno Therapy te lain February thla lai hawl vêl khân an lo haw a. Kâr thum dan zêlah Immuno Therapy la tura tih a nih avangin, Max Hospital, Saket, New Delhi-ah hian ṭum li lai an kal hman a, an kal hnuhnun ber hian June ni 19, 2026 ah an lo haw a ni. A fapa Machhana leh a nupui C-tei hian inent$ra a kal hian an hruai ṭhin a, a fate Madina te nupa leh Becky te nupa hian theihtâwpin an buaipui ṭhin bawk.

Aizawlah Immuno Therapy hi lâk chhunzawm a duh tawh avangin June, 2026 t^wp lamah Mizoram State Cancer Institute Zemabawk,

Aizawlah Immuno Therapy la tura an buaipui mêk laiin a platelets count leh albumin te a hniam tih hmuhchhuah a nih avangin thisen var (platelets) leh albumin te pêk a ni a. June ni 27, 2026 khân a khua a sik ṭan a, a tûk June ni 28 tlai lamah khawsik bâkah thawhah nasa tak a nei ṭan a, in lamah hian oxygen te pêk niin hmâ a sâwn hleih theih tâk loh avangin, a mâkpa te hospital, Trinity Hospital, Silaimual lamah June ni 29 (Thawhṭanni chhun) khân luh pui a ni ta a ni. ICU-ah dah luh nghâl a ni a, thawk lamah harsatna a neih avangin July ni 1, 2026 (Nilaini) zingkarah ventilator hman a ngai ta a. Scrub typhus, pneumonia, septicemia, chuap vung leh kal ṭha lo te a lo nei lehzel a. Hniam lam a pan zêl avangin July ni 3, 2026 zing dar 2:30 velah dialysis tih a ni a, dialysis hi tih chhunzawm zêl a ngai ta a ni. Doctor te leh nurse ten theihtâwp chhuahin an enkawl a, a natna te a lo nasat tawh êm avangin hmâ a sawn hlei thei lo va. Chhûng leh khat ten ngai tak leh thlahlel taka an enkawl laiin ni July 4, 2026 zan dar 7:30 hian Lalpa hnênah thlamuang takin a lo chawlhsan ta a ni.

A hun hnuhnung lamah hian a chungah eng pawh lo thleng se, Pathianah thlamuanna a neih thu hi a sawi fo a ṭhin a ni.

Pu F Malsawma hian hla chi hrang hrang panga (5) a phuah a, a hla phuahte hi Pu C. Dingthanga’n a thlûk a siam sak a, a hun laia zaithiam tak takten sa-in AIR Aizawl Station-ah te khungin, audio album-ah te an dah a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]