ZPM Rajya Sabha MP candidate-in thu dik lo a sawi kha a pawi hle

Aizawl | June 17, 2026: MNF Legal Board member leh MNF MP(RS) Candidate Agent Eva Lalduhawmi chuan vawiin khan thuthar thehdarhtute kawmin, "ZPM Rajya Sabha MP candidate-in Cross-Voting awm thei lo leh Party MLA ten Party official candidate an vote lo chuan an vote thi tur anga thu dik lo a sawi kha a pawi hle," a ti.

ZPM in Rajya Sabha MP atana an candidate-in Zonet interview-naa a Cross-Voting awm thei lo leh Party MLA ten Party official candidate an vote lo chuan an vote thi tur anga thu dik lo a sawi kha a pawi hlein kan hria a. He thilah hian thu dik, danin a sawi ang tak hi Mizoram mipuite hrilh hriat hi a tul kan ti a. ZPM candidate kan sawichhiatna hrim hrim ni loin, thu dik zawk sawi fiah a tul avangin kan han sawi lang ve dawn a ni.

India Danpui Article 80-na angin, Rajya Sabha-a State tin aiawh turte chu an Legislative Assembly member thlante’n an thlang thin a. Rajya Sabha inthlanah hian MLA-te chu an party candidate-te vote tura beisei an ni a. Kum 1998 thleng khan, Rajya Sabha inthlan result hi a hma atanga hriat lawk theih a ni deuh vek ṭhin.

Amaherawhchu, kum 1998 June thlaa Maharashtra-a Rajya Sabha inthlanah khan cross-voting a awm tan a. Chuvangin, MLA-te chu cross-voting an tih loh nan, Representation of the People Act, 1951 chu kum 2003-ah siamṭhat a ni a. Section 59-na chu siamṭhat a ni a, Rajya Sabha inthlana vote thlak dan chu open ballot hmanga tih tawh tur a ni. He dan thar a lo awm hnuah hian The Conduct of Election Rules, 1961 ah pawh Rule 39AA siam belh leh a ni a. Rule 39AA ang hian Party ten Rajya Sabha MP inthlannaah authorised agent pahnih (2) an ruat thei a ni. Dan tharah chuan MLA te chuan an duh duh an vote thiang a. Amaherawhchu, an party authorized agent te kha an vote an hmuhtir phal tur a ni a. an phal lo emaw, mi dang an hmuhtir emaw chuan an vote kha a thi thei ta zawk a ni. Independent MLA-te erawh chuan an vote kha tu mah an hmuh tur a ni lo thung.

India Danpui siamṭhat vawi 52-na (sawmnga pahnihna) chuan kum 1985-ah Tenth Schedule hmangin anti-defection law a rawn tichhuak a. He Schedule hian Parliament emaw State legislature member-te chu an political party member nihna an bansan emaw, an party thupek kalhin House-ah vote an thlak emaw chuan House aṭanga ban theih an ni tih a tarlang. Nimahsela, Rajya Sabha inthlan hi dan chuan Legislative Assembly chhunga thil thleng angin a ngai lo ni.

‘Open ballot’ dan hi Kuldip Nayar vs Union of India (2006) case-ah Supreme Court-ah khin a ni a. Mahse, CJI Y.K. Sabharwal kaihhruai judge 5 awmna bench chuan ‘open ballot’ system hian Danpui a kalh lo tiin he thubuai hi a hnawl a. Tin, Kuldip Nayar vs Union of India (2006) case vek hian, “Rajya Sabha inthlan hi Legislative Assembly "House proceeding" a ni lo a, chuvangin he inthlanah hian Anti-Defection Law - 10th Schedule - a hman ve theih loh” a ti bawk a ni. Hemi bakah hian Election Commission of India chuan kum 2017 khan thuchhuah siamin, "Party thupek bawhchhiaa a vote thlak chungchangah ‘Anti-Defection law - 10th Schedule dan’ hi Rajya Sabha inthlanah hman a ni dawn lo” tih a lo tarlang tawh bawk a ni.

Tun hma kha chuan Rulling Party candidate kha tling sa mai tura ngaih a ni mai ṭhin kha a ni a. Tunah hetiang thu sawi a lo nga ta hian Ruling/ZPM party MLA te zingah ngaihdan/duhdan hrang a awm a ni tih a lantir niin kan ngai a ni.