Formosa Foundation-in Joint YMA Thenzawl tan bawlhhlawh paihna lirthei hlan; "Mizoram rawn tlawhtuten min fak thinna langsar chu faina leh thianghlimna hi a ni a, mi tinin kan uar zel a ngai, ~ CM

Aizawl | June 17, 2026: Formosa Foundation chuan vawiin khan Joint YMA Thenzawl hnenah bawlhhlawh paihna lirthei (Garbage Tipper) an pe a. A hlanna inkhawm hi Chief Minister Lalduhoma chuan khuallian niin a hmanpui a, Aizawl South III MLA Baryl Vanneihsangi'n Chief Minister hi a tawiawm.

Lirthei inhlanna hun hi Joint YMA Hall, Bazar Veng Thenzawlah buatsaih a ni a. Chief Minister chuan thu sawiin, "Mizorama khualzin lo kalten min fak thinna langsar tak mai chu khawi hmun pawh a lo thianghlim viau zel hi a ni a.Faina leh thianghlimna hian kan ram leh hnam a chawimawi mek a ni. Chuvang chuan Mizoram mipuiten faina kan uar deuh deuh a ngai.

Thenzawl khua hi India ram huapa Mizoram khaw lar ber zinga mi a ni mek a, a hmunhma a remin a, khualzin pawhin an hre tawh hle a, tlawhtu pawh in ngah tial tial a. Khaw dang zawng zawng aia in lo fai bikte pawh hi a tul ve a. Chu mi hre chung chuan Formosa Foundation pawhin he lirthei hi an rawn pe che u a ni, a ti a. Faina leh thianghlimna lo uar deuh deuh tura chahin Thenzawlah home stay tam zawk siam a nih tur thu a tarlang.

Mizoram tana thil tha tam tak pe thintu Formosa Foundation te chungah lawmthu a sawi bawk.

Baryl Vanneihsangi MLA pawhin thu sawiin, faina hi hriselna bakah min tizahawmtu a ni a. Thenzawl hian paltlangtu leh tlawhtu a ngah avangin fai taka enkawl hi mi dangte entawn atan pawh a tul a ni, a ti. Fai leh thianghlim taka kan awm theih nan bawlhhlawh tha taka sawngbawl a pawimawh thu a tarlang bawk.

Lirthei inhlanna hi Joint YMA Thenzawl President Lalmuanpuia'n a kaihruai a, Pu Samuel Lalrinpuia, Vantawng Group YMA Secretary-in inlawmna thu a sawi a, Pu Jonathan Lalremruata, Chairman, Formosa Foundation-in thu sawiin, Clinton Sherwood, Legal Advisor Formosa Foundation kaihruainain lirthei inhlanna buatsaih a ni.