Transport Secretary-in phur takin NE-a e-motorcycle Ultraviolette Space Station hmasa ber a hawng

Aizawl | June 19, 2026: Transport Department Secretary C Lalruaia chuan, sorkarin a ngaih pawimawh tihhlawhtlinna tur a nih thu sawiin Vawiin khan NorthEast-a a hmasa ber turin, Mizoramah electric motorcycle chak leh changkang zawrhna hmun Ultraviolette SpaceStation a hawng.

Zangena Petrol Pump bul Ramhlun North, Aizawlah ribbon chep chatin India hmar chhaka Ultraviolette Space Station hmasa ber hi a hawng a, "Electric motorcycle hralh theihna tur khuh hawna a ni ta hi a lawmawm a, mipuiin intihhmuhin lei zel se ka duh hle a ni," a ti.

Transport Secretary hian petrol leh diesel engine hmang lirtheiin boruak a tichhe nasa a, chu mai bakah oil renchem a nih theih nan India leh Mizoramin oil hmang lova lirthei siam chhuah a ngai pawimawh tih a sawi a; kum 20 lo awm leh turah Mizorama lirthei hralh chhuah 10% tal electric a nih theih nan sorkarin hma a la a, Mizoram Electric Vehicle Policy 2024 duan fel tawh a ni, a ti.

2016 khan Narayan Subramaniam leh Niraj Rajmohan chuan Bangalore-ah Ultraviolette Automative dinin electric lirthei tha leh rin tlak siam chhuah tumin an bei nasa a, 2019 khan electric motorcycle an siam hmasak ber F77 pho chhuakin ngaihven a hlawh hle a, 2022 atangin an hralh chhuak tan chauh a ni.

Bike chak, changkang leh battery rin tlak siam chhuah kawngah an insawrbing a, India ramah boruak an neih len viau bakah Europe-ah a tha tawk a ni tih finfiahna an kalpui nasa a, F77 chauh ni lovin October 2025 atanga an hralh chhuah X47-in fak a hlawh hle.

Business Head Gajanan Umarekar chuan, motorcycle an siam chhuahte Europe ram hrang 10-ah an thawn chhuak tawh tih sawiin India ramah Mizoram chu SpaceStation 43 an hawnna leh hmar chhak state zinga hmasa ber a ni a, London leh Amsterdam khawpuia an hralh ang chiah Mizoramah an zuar chhuak, tih a sawi.

Gajanan hian kum sarih, kum riat vel an zir chian hnuah chauh lirthei an siam chhuak tih a sawi a, Mizorama a vawi khat kalna chauh ni mah se an bike siam chhuahte chu Mizote duh chi a ni a, SpaceStation bunna tur hmun dik tak a nih avangin an hlawhtling ngei dawn tih chiang takin a sawi ngam a ni, a ti.

Mizorama Ultraviolette la luttu MSS Motors-in tun dinhmunah bike chi hnih X47 leh F77 an zuar a, showroom an hawn rualin pathum an hralh nghal thei dawn tih an sawi.

Mizorama an hralh theih ber tura ngaih Tessact erawh an tlangzarh hman rih lo a, Ultraviolette-in electric scooter an siam hmasak ber hi pho chhuah a ni tawh a, mi 70,000-in an hauh lawk nghal. Kumin kum laihawla hralh chhuah hman an tum laiin rin tlak leh tha zawka thuam that an duh avangin January 2027 atanga hralh chhuak turin ruahmanna an siam a ni.

MSS MOTORS ULTRAVIOLETTE SPACESTATION

X47 Original (on-road price)

cosmic blck : Rs 3,09,748

stellar white : Rs 3,03,903

X47 Recon+ (on-road price)

turbo red : Rs 4,70,986

X47 Desert Wing (on-road price)

sandstorm : Rs 5,11,774

F77 Mach 2 (on-road price)

turbo red : Rs 4,72,517

supersonic silver : Rs 4,63,329

F77 Super Street (on-road price)