Ramri buai chungchangah Dawrpui leh Chhinga veng te Ward Corporator kaihhruaina hnuaiah inremna siam

Aizawl | June 16, 2026: Ramri buai chungchangah Dawrpui leh Chhinga veng te AMC Ward IX Corporator B Lalawmpuii kaihhruaina hnuaiah inremna an siam.

Vawiin 16th June, 2026 (Thawhlehni) 2:00 PM a Ward Corporator hoa Ward Committee room-a Dawrpui leh Chhinga Veng Joint Meeting chuan ni 16th June, 2026 (Thawhlehni) zinga Dawrpui leh Chhinga Veng inkara thil thleng chu pawi an ti a. Local Council pahnih te inbiakna neih a nih hnuah Dawrpui leh Chhinga Veng mipui te inbeng dai a, Local Council te thu ngaichang theuh turin an inhriattir.

Joint Meeting chuan, A tul angin DC Ieh AMC lamah te pawh meeting-a hmalak zel an remti a, Hemi thu ching fel tur hian Dawrpui leh Chhinga Veng Local Council ten a tul angin hma lakho zel an tum.

HRIATTIRNA

Vawiin 16th June, 2026 (Thawhlehni) 2:00 PM a Ward Corporator hoa Ward Committee room-a Dawrpui leh Chhinga Veng Joint Meeting chuan ni 16th June, 2026 (Thawhlehni) zinga Dawrpui leh Chhinga Veng inkara thil thleng chu pawi kan ti a. Local Council pahnih te inbiakna neih a nih hnuah Dawrpui leh Chhinga Veng mipui te inbeng dai a, Local Council te thu ngaichang theuh turin kan inhriattir e. A tul angin DC Ieh AMC lamah te pawh meeting-a hmalak zel a ni.

Hemi thu ching fel tur hian Dawrpui leh Chhinga Veng Local Council ten a tul angin hma kan la ho zel dawn e.

B Lalawmpuii

Ward IX Corporator

K Lalchhuanawma

Chairman, Dawrpui Local Council

TBC Lalchawiliana

Chairman, Chhinga Veng Local Council

CHHINGA VENG THALAI PAWL THUCHHUAH

Tunhnaia Chhinga veng leh Dawrpui inkara inhriatthiamlohna lo thleng hi Chhinga Veng Thalai Pawl chuan pawi kan ti hle a, he thil lo intan dan Mizoram mipuite hriatah sawi lan tha in kan hria a ni.

Tun hma in ramri buai kan neih kan hre ngai lo a, Electric Veng Sakawrpului atanga Bazar pan chhohna atanga ABC lane hi pi leh pu atanga Chhinga Veng chhung a ni a, kum 2020-2021 Covid len lai khan helai area ah hian Dawrpui lamin dawr in khar tura hriattirna lehkha an rawn sem a, Chhinga Vengin an veng chhung a nih avangin dawr in hawng turin an hrilh ve leh a ni.

Kum 2025 kum tawp lam khan Chhinga Veng Local Council leh NGOs te chuan Chhinga Veng chhunga dan phalloh a sumdawngte titawp turin hma an la a, vai sumdawng tam tak pawh tihtawp tir an ni a, March 2026 khan Dawrpui Local Council chuan ABC lane a awmte chu Dawrpui Veng hming lanna Sign board tar turin an hriattir a ni.

Y.M.A day tuk, ni 15.6.2026 khan Dawrpui hnatlang chuan Chhinga Veng chhungah hna an rawn thawk a, tawngkamin Chhinga Veng KTP leh Y.M.A building te chu ‘Dawrpui Venga awm in ni e’ tiin an sawi a.

He thil hi hrethiam lovin Chhinga veng thalaite kan che chhuak ta a ni.

Tin, ni 16.6.2026 zingkara Chhinga Veng Thalai hnatlang thenkhatin kan Veng chhunga Armed Veng Kohhran Thalai hoarding tar an lo la thla palh a, a pawi kan ti tak zeta, an mi ngaihdamna pawh kan dil a, hoarding te hi thalai ten an tar tha leh vek tawh bawk a ni.

Chhinga Veng hi Aizawl a veng hlun tak zinga mi a ni a, 1912 ah Pi Phiri m/o Rev. R. Lalengkima te pawh awm tawhin 1932 ah phei chuan in 25 lai a lo ding tawh a, Dawrpui Veng atanga indang nilovin, Kohhran erawh chu Dawrpui Kohhran atanga indang a ni. Chuvangin kan veng humhim tur hian Chhinga Veng Thlai Pawl chuan hma kan la zel dawn a ni.

(LALHRIATPUIA) (V.L. THLAMUANA)

Convener Secretary

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]