PATHIAN NENA INREM AWMZIA

_Malsawmna Nih Theihna Kawng_

By Rick Warren 

— June 16, 2026

“Hetah hian rinna avâng chauhva Pathianin mi thiam a chantîr dân a lo lang ta a ni, “Rinna avânga thiam chang chu a nung ang,” tih ziak ang khân.” [Rom 1:17]

“Felna” tih thu hi Bible-ah thu pawimawh tak a tling a. Vawi za tam hman a ni hial. Entirnan, Bible chuan Pathianin felna a duh thu leh Pathian fel tak a nihzia a sawi. Pathian chuan engtik niah emaw khawvel chu fel takin ro a la relsak tur thu a sawi bawk. Sam 23 chuan Pathianin felna kawnga a hruai thu a sawi. 

Mahse, “felna” tih thu chu eng nge a awmzia ni chiah? 

Ṭum khat chu theological dictionary-ah a hrilhfiahna ka en a, phek 27 a ni hem mai! Mahse thil pahnih chauhah ka sawr zim ang: Felna chu Inlaichinna leh nun dan kawng a ni. 

Felna tih awmzia chu Pathian nena inlaichinna dik neih tihna a ni. Rom 1: 17-ah hetiang hian kan hmu, Hetah hian rinna avâng chauhva Pathianin mi thiam a chantîr dân a lo lang ta a ni, “Rinna avânga thiam chang chu a nung ang,” tih ziak ang khan,” tiin. Chanchin Tha chu hei hi a ni, Pathian chuan Isuan kan sual man a tlak hmang chuan inlaichinna dik min siamsak a ni. Isua thihna hmang chuan Pathian nena inlaichinna mumal tak kan nei thei. 

Felna chu nunphung a ni bawk. Dik taka nun a ni a, Pathianin min duan dan ang chuan. Bible chuan I Johana 2: 29-ah hetiangin a sawi, “Amah chu mi dik tak a ni tih in hriat chuan, dik taka titu apiang chu a fate an ni tih hre rawh u,” tiin. 

Tichuan Pathian nena inlaichinna dik neih chu eng vangin nge i ngaih pawimawh ang? A chhan chu mihringte tana nun kawng awm chhun, leh vanram kaina kawng awm chhun a ni. 

Pathian aṭanga lak hran i nih chuan, nung lo ang vel i ni, i awm ve tawp a ni ber. Khawvela mi tam berte hi nunna tluantling an nei lo. An khawsa ve tawp a, kar tawp an nghak chhuak ve tawp. Mahse, nangmah Siamtu nena inmihran chu i dam chhan tlansanna ang vela awmze nei lo a ni. 

Hringnun awmzia hi bungrua nei tura beih emaw thil tum hlen tuma tlan ngawr ngawr a ni lo. Nun awmzia chu Pathian hriat a ni – nangmah siamtu leh chhan mumal tak nena dintu che chu. Pathian nena inlaichinna dik i neih hma leh inlaichinna nung i neih hma chuan i nung tak tak lo. 

Felna chu vanram kalna kawng a ni. Pathian chuan a fa a hmangaihte tan vanram a siam a, chatuan atan i kianga awm a duh a ni. Vanrama i kai a duh a, mahse vanramah chuan i duh lo chung a nawr chho lovang che. He leiah hian Pathian kalsan chu i thlang mai thei a, mahse he leia i nun a tawp meuh chuan, i chatuan hun hman dan thuah hun ṭha pek nawn i ni leh tawh lovang. 

Pathian chuan inlaichinna in neih theih nan tunah khan hun ṭha a pe che. I duhthlanna ngeia Amah thlang turin a duh che! Chutianga i tih chuan amah nen inlaichinna dik in nei ang. I nun a thlak danglam ang – he leiah leh chatuan atan!

Ngaihtuah zui atan. 

Pathian nena in inrem hnu chuan eng vangin nge thlarauva puitling turin i ṭhan len zel a la ngaih ang? 

Pathian nena inlaichinna tih chu eng nge a awmzia? Chu chu i nunah eng angin nge a lan chhuah? 

Nangma ṭawngkam ngeiin mite laka felna tih awmzia chu han sawi teh? I nunah Pathian nena inlaichinna dik tih thu chuan eng nge a tih danglam?  

*Vawiin hian Pathian nen inlaichinna dik i nei thei.* 

I sualna chuan Pathian lak aṭangin a tihrang che a, nangma lamah chuan tihṭhat leh theih dan kawng reng a awm lo. Tichuan i sualna lak atanga chhandamtu tur che leh Pathian tana pawm tlaka siamtu che i mamawh a – mi fela siamtu tur che chu. 

Chuvang chuan Pathianin Isua a rawn tir a ni. Kraws-a Isua thihna chuan I tihsual tawh leh la tihsual zawng zawng lakah a chhandam che a. Pa Pathian nena inlaichinna dik neih dan a kawh hmuh che. Bible chuan, “Isua Krista an rin avângin tu pawh a ring apiangte chu Pathianin thiam a chantîr a ni, danglamna rêng a awm lo” tiin [Rom 3: 22]

Isua nena in zin kawng chu amah ring chung leh i sualte thupha chawiin i ṭan thei ang. Isua hnena inpumpek i duh a nih chuan, he ṭawngṭaina mawlmang tak hian bul ṭan ang che: “Lalpa duh tak, ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com - ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

*[Lettu: Sangpuia]*