MNF Rajya Sabha MP Candidate atan Zothansangi Hmar puang

Aizawl | June 8, 2026: MNF party chuan vawiin khan Hnam Runa an chhung inkhawmah Rajya Sabha MP candidate atan Zothansangi Hmar an puang.

MP Candidate hi MNF Senior Vice President Dr R Lalthangliana'n a puang.

Zothansangi Hmar hi MNF party tana mi ṭangkai, thlahtute aṭanga mikhual lo, MNF Legal Board member ni lai a ni.

Fam ta - Thanghuta, MNF ramhnuai sorkar senator tunu, Rualkhuma Hmar, MNF Legal Board member lo ni ṭhinte tunu leh fanu a ni.

Tuna MP Rajya Sabha nilai, K Vanlalvena hi MNF aṭanga thlan tlin a ni a. A term a tawp dawn tak avangin Rajya Sabha MP hi thlan a lo ngai ta a ni.

MNF MP (RAJYA SABHA) CANDIDATE ZOTHANSANGI HMAR

Vawiin June ni 8, 2026 (Thawhṭanni) hian Mizo Hnam Run Chhung Inkhawmah MNF MP(RS) Election 2026 atana MNF Candidate puanna neih a ni a. MNF Legal Board Treasurer ni mek Zothansangi Hmar chu MNF Candidate atan ruat a nih thu MNF Sr. Vice President Dr. R. Lalthangliana'n a puang.

Candidate Chanchin Tlangpui :

Zothansangi Hmar hi Advocate Pu Rualkhuma Hmar (L) leh Pi Rosangzuali te fanu a ni a. College Veng, Aizawl ah an cheng.

Zirna lamah B.A, (Political Science) LLB niin, kum 2015 aṭangin Ukil hna a thawk ṭan a. MNF Ministry term hmasa khan Asst. Public Prosecutor-ah ruat a lo ni tawh a. Tunah hian Private Law Firm, Ukil Saihmingliana Sailo (MNF Legal Board member zinga mi) nen an din a. Ukil hna rim takin a thawk mek a ni.

Kum naupangtein, chanchinbu-ah ram leh hnam issue hrang hrangte auchhuahpui nan article eng emaw zat a lo ziak tawh a. Tunah pawh freelance/occasional writer a ni mek. Mizoram Information Commission-in kum 2015-ah, RTI leh Mizote chungchang essay inziahsiak a buatsaihah lawmman pakhatna a lo la tawh a. Kum 2015 vek hian a Pa-in, Arvind Kejriwal lehkhabu "Swaraj" letling tura a tih angin a letling a. Kum 2016-ah MC Lalrinthanga’n a publish sak a. He lehkhabu "Swaraj" (Mahnia Ro Inrel) hi lehkhabu lehlin ṭha thlan chhuah zingah Top 5-ah a lang phak nghe nghe a ni.

Zothansangi Hmar hi mahni tawka ram vei em em, thuziak hmanga ram a veina thu auchhuahpui ṭhin a ni. A phak ang tawkin khawtlang rawngbawlnaah pawh inhmangin an chenna College Veng Branch YMA-ah Executive Member te pawh a lo ni tawh a. Veng chhung chanchinbu leh Kohhran chanchinbu pawh a lo enkawl tawh ṭhin.

Tunah hian MNF Legal Board Treasurer a ni mek a. Tin, Mizoram Hindi Board leh Mizo YouTuber Association te tan Legal Adviser a ni mek bawk.

Politics lamah pawh an chhungkaw thlahtute aṭanga mikhual lo tak niin a pu, Pu Thanghuta(L), Mizoram Underground Sorkara Senator ṭhin a ni a. A pa hi Rualkhuma Hmar (L), MNF Adviser leh MNF Legal Board chairman nihna rei tak lo chelh tawh ṭhin a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]