I THIL CHÂNAHTE LUNGNGAIH I ZIR A ṬUL

_Malsawmna Nih Theihna Kawng_

- Rick Warren 

- June 8, 2026

_"Engkim tan hian hun ruat a awm a, van hnuaia thiltih zawng zawng tan hun remchâng a awm . . . Ṭah hun a awm a, nuih hun a awm; sun hun a awm a, lam hun a awm."_ (Thuhriltu 3:1, 4)

Hringnun hi hahthlak tak mai a ni. Khawvel hi a keh chhe tawh a, eng kawng mah hi famkimin a thawk lo a ni ber. I taksa khan duhthusama famkimin hna a thawk lo, sik leh sa anih dan tura famkimin a awm lo, ei leh barah duhthusamin kan awm hek lo, inlaichinna te pawh hi a ṭha famkim lo. Hringnun hi chânna hlir a ni.

Hringnuna kan pumpelh theih hauh loh chânna te i zir chhoh mek lai hian thlir dan ṭha zawk i neih theih nan hengte hi i hriat a ṭul.

*A hmasa berah chuan, englai pawha hlim reng turin Pathianin a beisei lo che*

Kristiante chuan hlim hmel an pu reng tur a ni a, an hlim reng tur a ni a, engah pawh an lawm zel tur a ni tih ngaihdan puithu tak hi a awm. 

Mahse Bible chuan,  _"Engkim tan hian hun ruat a awm a, van hnuaia thiltih zawng zawng tan hun remchâng a awm . . . Ṭah hun a awm a, nuih hun a awm; sun hun a awm a, lam hun a awm."_ tiin min hrilh (Thuhriltu 3:1, 4).

A chang chuan kan hun tawn mek kan chhan let dan mil ber leh fuh ber chu lungngaihna hi a ni ve chawk. Bible chuan i thil hlohte chungah te, i lawm lohnaah te, i sualah te, khawvela tawrhnaah te leh i ṭhian, thlarau bote avangin i lungngai tur a ni a ti. Pathianin englai pawha hlim reng turin a beisei lo che. I lungngaihnate kha i tum reng vang nise a duh a ni.

*Pahnihnaah chuan, lungngaihna hi taksa hriselna atan a ṭha*

Engah mah lungngaihna i nei ngai lo a nih chuan heng pathum zinga pakhat tal hi i nihna a ni: a tak ramah i nung lo, i rilru sûkthlek nen in kal rual lo, i hmangaih lo. Hmangaihna i nei a thil lungchhiatthlak tak i hmu a nih chuan lungngaihna hi i chhan letna hmasa ber a ni.

Lungngaihna hi rilru sukthlek hrisel leh ṭangkai a ni. Pathianin nun inthlak danglam chho mek i paltlang theihna tura a pek che a ni.

Kum tam tak kal ta khan na taka hliam i lo ni tawh a ni mai thei. I nu leh pa te an inṭhen a ni mai thei. Tihduhdah i tuar a ni mai thei. Miin i chanchin a chhe zawnga an sawi avangin i na a ni thei. Naupang mai i nih avang khan a ṭha lamzawnga lungngaih kha i lo thiam lo a ni thei, chuvang chuan i nun chhungrilah nem lut thla daih rawh.

I natnaah te i lungngaih a ngai. Engvangin? I lungngaih loh chuan i rilruah a cham reng a, i damchhung zawngin tute emaw chungah chu i lungngaihna chu i leihbaw leh ṭhin a, chu chu a hrisel lo a ni!

Sam 32:3-ah Davida chuan hemi chungchang hi heti hian a sawi: _"Ka ngawih reng lai khan, nilenga ka rum ṭhinna lamah ka ruhte hi a chang zo vek a ni."_

I chunga thil ṭha lo thlengte kha i duhthlan a ni miah lo. Mahse lungngaihna chu duhthlanna a ni! Rilru leh thlaraua nun hrisel zawk i neih theih nan i chânnaah te lungngaih i zir a ṭul ang.

Ngaihtuah zui atan.

* Eng i chânah nge i lungngaih miah loh? Chu chuan engtinnge i taksa, rilru leh thlarauah nghawng a neih?

* Lungngaihna hi mi zawng zawng chungah inangin i hria em? Engvangin?

* Tuna lungngaihna hmachhawn mekte khan eng kawngin nge i chhawmdawl theih ang?

*[Lettu: Sangpuia]*